السلام عليكم و رحمة الله و بركاته 
ازيكم يا أخوات 
معلش غبت عليكم شوية عشان كنت بادور على طريقة الكعك لكل الأخوات و خاصة لأم وديمة
يا رب تطلع الطريقة مظبوطة معاك المرة دي يا أم وديمة 
و على فكرة الطريقة دي مجربة و نتائجها هائلة باذن الله
المقادير:
كيلو دقيق.
نص كيلو سمنة بلدي.
2معلقة كبيرة سمسم محمص.
معلقة صغيرة رائحة كعك.
كوب ماء للعجن.
معلقة كبيرة خميرة.
معلقة صغيرة سكر.
ذرة ملح.
الحشو:
عجمية ومقاديرها كالتالي:
2معلقة كبيرة سمنة.
2معلقة كبيرة دقيق.
فنجان كبير عسل نحل.
2 معلقة صغيرة سمسم.
ربع معلقة صغيرة رائحة كعك.
كوب مكسرات محمصة و مجروشة.
وطريقة عمل العجمية كالتالي:
نحط السمنة على النار لحد ما تسيح و نضيف الدقيق و نقلبه حوالي دقيقتين و بعدين نضيف السمسم ونقلبه و نشيل الحلة من على النار.
نضيف العسل و نقلبه بسرعة و بعدين نرجع الحلة على النار و نقلب لحد ما يبقى سميك شوية و نرفعه من على النار و نضيف رائحة الكعك و المكسرات ونقلبهم كويس و نخليها على جنب لحد ما نعجن الكعك.
طريقة عمل الكعك:
ننخل الدقيق مع الملح و بعدين نضيف السمسم و رائحة الكعك و نقلبهم كويس.
نقدح السمن على النار ونعمل حفرة في وسط الدقيق و نصب السمن الساخن ونقلب بمعلقة خشب لحد ما يبرد و بعدين نفرك الدقيق مع السمنة كويس و كثيييير قوي لحد ما يشرب السمنة كويس.
نذوب الخميرة مع السكر في نص كوب ماء دافي و نضيفه للعجينة ونعجن كويس و نضيف باقي الماء تدريجيا مع العجن لحد ما تتكون عجينة متوسطة القوام .
نغطي العجينة و نسيبها تتخمر في مكان دافي .
بعد كده نقطع العجينة قطع في حجم عين الجمل و نعمل في وسطها حفرة و نحشيها بقطعة من العجمية بس ما تكونش كبيرة عشان ما تطلعش من العجين و تتحرق .
وبعدين نشكل الكعك بواسطة قوالب الكعك أو المنقاش و نرص الكعك في الصواني و نسيبه يخمر شوية و بعد كده نخبزه في فرن متوسط الحرارة لحد ما يبقى لونه ذهبي نطلعه من الفرن.
نرش الكعك بالسكر البودرة عند التقديم .
وبالهنا و الشفا
ربنا يجعل أيامكم كلها أعياد
مشكووووووووره عيوني …….وما قصرت…….اشكرك جزيل الشكر عزيزتي ..غلبتك معايه……….
يعني السر هو فرك السميد بالسمنه جيدا وكثيير يعني نعجنه نصف ساعه…..او اقل؟؟؟؟
وتسلم ايديك يا عزيزتي والله يعطيك الف الف عافيه……..
يا رب يعجبكم الكعك
أم وديمة ما غلبتنيش ولا حاجة
و بعدين تعبك راحة يا ستي، فعلا السر هو انك تفركي الدقيق مع السمنة كتييير لحد ما يتشرب كويس أوي و مش محدد بوقت معين 
بس خدي بالك احنا بنستخدم الدقيق الأبيض مش السميد و ألف هنا وشفا. تسلمي لي يا أم مهدي و يا رب تجربيه و يعجبك