بسم الله نبدا
اولا يغسل الحمام وينظف بالطريقة اللى تريحك وهو بيجى من عند الفرارجى متنضف وكل اللى عليكى تشطفيه وبس
الخلطة بقى وياريت والنبى تدعولى لان انا متاكده منها 100%
بالنسبة للمقادير كل حمامة بتاخد تقريبا فنجان ونصف من فناجين القهوة فريك
كوب لبن او كوب ونصف او كوبين حسب كمية الفريك
3 حبة صغيرة طماطم
بصلة متوسطة الحجم
2 مكعب فاين فودز
لحمة معصجه حسب الرغبة يعنى تقدرى تكترى اللحمة او تقلليها حسب رغبتك بس اعملى حسابك اللى تزوديه لحمة تعايريه بالفنجان علشان تشيلى من الفريك وطبعا الملح والفلفل حسب رغبتك وعموما متخافيش من اى زيادة فى الخلطة لان الزيادة ممكن تشيليها فى الفريزر لمرة تانية بس تطلعيها تفك واستعمليها على طول يعنى محدش يخاف من اى زيادة
الطريقة نغسل الفريك بعد تنقيته ولا ينقع وباكد على عدم النقع لانه هيبقى مايع ويشرب ماء وطعمه هيبقى ماسخ
بعد غسل الفريك نضع قدر على النار ونضع فيه سمنه حسب الرغبة يعنى حوالى 2 او 3 ملعقة طعام سمن ونضع فيهاالفريك حتى يجف الماء ويتغير لونه نسبيا يعنى لا يظل اخضر المهم تحمريه
فى اثناء التحمير على نار متوسطة الحرارة نكون قطعنا البصلة تقطيع صغير عادى كانك هتعملى قليه عادية
ونضع البصل المقطع على الفريك وهو على النار
وبعد دقيقتين تقريبا يكون البصل دبل من الحرارة
نضع الطماطم مع اللبن والماجى فى الخلاط ونضربهم جيدا ونضيفهم للفريك ونضع الملح والتوابل (كمون كزبرة فلفل اسود)
بعد ما ينضج الفريك نسبيا حافظى على النضج حتى لا يستوى الفريك تماما ستجديه نىء بعض الشىء لا تنسى انه سوف يوضع على النار ثانية مع الحمام
بعد ما يشرب الفريك اللبن والطماطم ابعديه عن النار حتى يبرد ومن ثم اضيفى اللحم المعصج
طريقة اللحم المعصج انا كتباها فى الكانيلونى الايطالى للى عاوزة تعرف طريقتى فى تعصيج اللحم
بعد اضافة اللحم الى الفريك ناتى بالحمام المغسول من قبل ونقفله من فوق بخلة الاسنان من فوق فقط ومن ثم نحشى الحمام ومن تحت نضع كبد او راس الحمام ونقفله بوضع ا لرجل فى مؤخرة الحمام ونفعل ذلك مع كل حمامة ويوضع فى ماء مغلى على النار مع مكعب ماجى وشوية ملح وفلفل ويترك لمده نصف ساعة او حسب تقديرك لحجم الحمام وسنه كبير او صغير وبعد ذلك ينشل ويصفى ويحمر ويقدم وبالهنا والشفا والله الطريقة دى مجرباها فى البيت ومتاكده منها 100%
يعطيك الف عافيه
كتبت بواسطة البشاري كوم شكرا اختي على الطريقة .. عندما كنت حامل في بنتي من سنتين وكان رمضان كنت بتوحم عليه وكان نفسي فيه جدا بس ماكنش حد بيعرف يعملوه حتى سألت ابلة مصرية ماكنتش بتعرف .. انا اللي نفسي فيه البلدي او الفلاحي الحمام المسحب اللي تتاكل في قضمة واحدة زي الموزة من غيرعظم يعني .. وانشاء الله احاول اجرب دي ..
ان شاء الله تلاقى اللى بتدورى عليه وربنا يخلليك ولادك وانا متاكده ان الطريقة هتعجبك جدا وبالهنا والشفا
كتبت بواسطة marwa sabry مشكووووووره
العفو يا احلى مروة وبالهنا والشفا