السلام عليكم ورحمه الله وبركاته
جبتلكم اليوم دجاج محمر يهبل وحلو وساهل ومايبيش خبرة طريقتها خديتها من ماما
والله احلى من المطاعم ويطيب كويس
نبدو في الطريقه
اول حاجه انظفو الدجاج كويس من الزوائد من كل مكان
وانظفوها كويس ممكن اديرولها سكرب بالملح والليم وبعدها تمصمصوها بالميه وتخلوها علي جنب
ونديرو خلطه ال body oil اللي مكونه من
ملح – فلفل احمر مرحي – فلفل اسود مرحي – قرفه مرحيه – زعتر ونخلطهم كويس
وهده الخلطة
وبعدين
ناخد طاجين ونحط فيه ملح ممكن ارتفاع اصبعين(( وهدا سر طياب الدجاج ))
ونحط عليه الدجاجه من جهه الصدر زي الصورة
اني حطيت بطاطا معاه لاكن مش ضروري تحطها بس احنى نحبوها البطاطا
وتكونو مشغلين الفرن ويوضع فيها الدجاجه وشوف الساعه لان تبي طياب حوالي ساعه ونص مرات اكتر ومرات اقل
واول ما تدخل الفرن وجهزو السلطة
طبعا سلاطة خس اغسلوها وقصوها وجففوها بالكلينكس من الميه وديرو معاها اللي تبوه
زي الصورة
وبعد حوالي ساعه وربع والدجاج في الفرن ناخدو سكين ونشوفوها طابت والا لا
ولما اطيب نطلعوها من الفرن
ونحولوها من الملح بحدر شديد ونحطوها علي السلطة
ومعاها مايونيز وكتشب لزوم الشغل وتؤكل بالهناء والشفاء
شني رايكم؟
لكن للأسف ماطلعت الصور !!!