حبيت اطرح ها الموضووع بصفتي وحده من الزوجات اللي زوجها كان متزوج وعنده عيال من طليقته
ابي اعرف كيف حياتكم اليوميه مع مثلا العيال
مع العلم ان زوجي عياله مع الام يعني مب عايشين ويانا
بس ابي اعرف يوم يطلع وياهم شو تسوون
كيف علاقتكم مع العيال سواء كبار او صغار
بس
ومشكورين
ارد انشا الله الاخوات يفيدونك
موفقه انشا الله
أختي .. أنا لم أمر بتجربتك ولكن سأحاول أني أفيدك من خلال اطلاعي على قضايا زي كذا ..
شوفي حبيبتي .. عيال زوجك لازم تكرمينهم وتعزينهم .. مهما كان يبقون عياله .. وصدقيني انك راح تكبرين بعينه كل ما اكرمتيهم وراعيتيهم ..
صحيح انه في عيال الله يهديهم يكونون مرة شايلين على زوجة ابوهم .. لكن غالبا السبب يكون من الأم لأنها تتكلم معهم وتقولهم كلام المفروض ما تقوله .. ومادام ابوهم يبغاهم ويبغى شوفتهم ووجودهم معه لازم انت تتفنين معاهم وتحاولين تكسبينهم لأنهم مثل ما قلت لك يكونون ماخذين فكرة غلط عنك واحتمال كبير يتصرفون على اساسها .. طبعا العمر يأثر .. الأطفال يتأثرون أكثر .. والكبار يعاندون ..
عموما انت حاولي انك تكونين صديقتهم وتقربي منهم وخلي زوجك يحس انك تهتمين فيهم عشانهم عياله .. ولك الأجر ان شاء الله 
صراحة انا لسه ما تزوجت
بس لو الله كتب لي اكون زوجة رجل مطلق وله عيال من طليقته
فراح اعاملهم مثل عيالي لأنهم وبكل بساطة أبناء زوجي
وحتى لو كانوا شايلين مني مثل ما قالت الأخت بسبب كوني زوجة ابوهم
فماراح ارتاح لين اكسب حبهم لي و مودتهم وصداقتهم بعد
وأنا أتفق مع الخوات أن لازم تكون معاملتك لهم كويسه لأنهم عيال زوجك اللي أخترتيه واختارك وأكيد راح يكون لك معزه كبيرة بقلبه لما يشوف أنك تعاملينهم كويس حتى لو كانوا راعين مشاكل حاولي تتغلبي وتتحكمي بالوضع أنتي وشطارتك
الله يجزاج خير
وانا ما أعترض على شىءوعادي بالنسبة لي المهم هم بعيد عني ونلتقي كل نهاية أسبوع في بيت جدهم ( أهل زوجي) وعادي سلام وكلام مأحاول أحتك بهم ،يعني حدي أسألهم عن صحتهم ودراستهم اللي أنا أعرف عنهم كل شىء لان زوجي الحبيب 
ما ينسى عياله ولو لحظه واحدة أعتقد انهم منسوخيين في مخه ما في سالفة أو موضوع إللا يجيب اسمهم كانه يقول لي حرام تنسى ولو لحظه واحدة إني كنت متزوج وعندي عيال 
أحيانا أطنش وكأني ما سمعت أسمهم وهو يفهم وأحيانا أغير الموضوع وأفتعل خناقة يعني بسيطة (كأن الموضوع سوء فهم) هو يزعل يمكن فاهم سبب المشكلة بس والله غصب عني .
بس هذا ما يعني إني أكره أولاده لا سمح الله بالعكس أنا أحبهم وهم عاقليين بالنسبة لكثير من البنات اللي أشوفهم من سنهم وأشجع زوجي بالأهتمام بهم لأن من غيره راح يهتم بهم ويراعيهم. وزوجي يقدرلي هذا الشىء
أنا ما أريد حد يفهمني خطأ وينصحني أن أحب عيال زوجي عشان خاطره لأني فعلا أحب زوجي الطيب وأحب اللي يحبهم وخصوصا أولاده لانهم أهم شىء في حياته ومتاكدة إذا يحب أولاده من مطلقته فهو مليووون في المية يحب أولادي أكثر وأكثر الله لا يحرمني منه 
بس أنا إنسانه وأحب زوجي يكون لي أنا بس وهم ماخذيين جزء كبير من حياته .
اختي غانية تقريبا نفس مشكلتي بس شو نسوي انا بعد زوجي قعد فترة ظويييييييييييييله لين ما تزوجني يعني تقريبا 12 سنه يعني مو اانا السبب في طلاقه لاني ما كنت اعرفه ولا شيء
الشيء اللي يضايقني هو يوم يكلمهم ويدلعهم احس انه في حد ثاني في حياته غيري قلبه مب لي انا وبس لا في ولدين
مع العلم الولد الاكبر يمكن عنده 13 او 12 سنه والصغير 10 سنوات
يعني بعدهم صغار لان زوجي تزوج وهو صغير في السن بس اللي قاهرني اني ما كنت اعرف عن الموضووع شيء يعني كنت شايله فكرة ان عنده عيال من طليقته بس شو نسوي الحمد الله
والاولاد عايشين مع امهم عادي ويشوفهم تقريبا وايد واتصالات بينهم وكل شيء واي شيء يبونه يشتري لهم يعني مو مقصر وياهم في اي شيء بس المشكله ان عمره ما يجيب لي طاريهم بالمرة لان يراعي مشاعري يعني ادا انا ما سالته هل شفتهم اليوم ما يقولي او هل اشتريت لهم كدا او طلعتهم ها المكان ما يقولي لازم اساله انا
او هل اتصصلت فيهم اليوم ما يقول يمكن عشان خايف على مشاعري يعني مول ما يتكلم عنهم جدامي
واحنا اتفقنا ان احنا نتلاقا في بيت جدتهم مرة في الاسبوع يعني سلام وسلام وبس عشان ما ياخدون اخباري لامهم
وامهم ما تكرهمم في ابوهم بالعكس عادي يحبونه ولا شايلين عليه في شيءوهدا الموضووع كله وقلت له يعني يوم بنبي بيت كبير يعني ممكن ييون يعيشون معانا قالي لا بيعيشون عند امهم مافي حتى لو بيت كبير وبس
الله يكتب اللي فيه الخير
(عامل الناس كما تحب أن يعاملوك)
الله يوفق الجميع ويكتب لكم السعادة مع ازواجكم وعيالكم