أخواتي
ابنتي في الصف الثالث الثانوي علمي معدلها 95( سعوديه الجنسيه)لكنها محتاره وحتى الان لا تعرف ماذا تريد من تخصصات
اقترح عليا بعضهن أن تدرس الديكور في الجامعة الامريكية بجدة
ارجو من التي عندها فكره عن هذا التخصص وهذه الجامعة تجاوبني
ولو في أحد عنده اقتراحات اخرى ياريت ممكن تساعدها
بعض البنات خوفوها من جامعة الملك عبد العزيز ومن اخلاق بعض البنات هل هذا صحيح؟
هي لا ترغب في الطب ولا مجال الكمبيوتر ولا اللغة العربية ولا التدريس بشكل عام
ولا التغذيه(لاتريد أي شيءفيه فيزياء)ستقولون لي ماذا بقي ؟
لا أعرف – لذلك أستشيركم أخواتي و أتمنى أن أجد لديكم الإجابه
هي بصراحه تريد تخصص سهل
و أي وحده داخله فرع حلو وسهل تكتب عنه لنتعرف عليه
وشكرا لكم مقدما
ومبروك لبنتك النجاح وماشاءالله نسبتها حلوة وممكن تدخلها اللي تبغاه
انا بصراحه مااعرف عن الجامعه الأمريكيه اي شي
بس بالنسبة لجامعة الملك عبدالعزيز فأنا أدرس حاليأً فيها وصارلي 3 سنوات فيها
وخذي الكلام من وحده موجودة في الجامعة احسن من كلام القيل والقال اللي الناس تقوله عن الجامعة هذي اليومين.
أول شيء أنا اتخرجت من الثانويه على أساس اسجل في جامعة الملك عبدالعزيز
بس للأسف الناس ماقصروا في الكلام عنها " ماخلوا ولابقوا"
سمعت كلام سيء عن هذي الجامعه لأبعد الحدود ومن كل مكان ,, زي ماسمعتوا انتو
لدرجة اني سجلت فيها انتساب يعني قلت خليني من بعيد لبعيد
وبعد سنه الحمد لله جبت معدل عالي يعني صار بإمكاني احول انتظام واحظر محاظرات واداوم زي الناس,, فكرت في التحويل إنتظام كثير وفكرت في الكلام اللي سمعته وأخيراً قررت إني أحول إنتظام وأجرب وأشوف بنفسي هل هذا الكلام اللي ينقال صحيح ولا لا..
وإذا ماعجبني الوضع رجعت أنتساب..
والحمد لله مشيت أموري وحولت إنتظام ,,
بس بعد ماحولت إيش اقولك صارلتلي صدمه واتفاجئت لما شفت اللي شفته
وين الكلام اللي كنت اسمعه وين اللي شفته
بصراحه ندمت اني سمعت كلامهم ودخلت انتساب بالبدايه
انا بقولها لك وبكل صراحه وربي شاهد على كلامي .
والله ماشفت غير بنات في قمه الأدب والاخلاق واستاذات ودكاتره متعاونين وطيبين
يعني بجد انصدمت فين الكلام هذاك كلو أبغى أشوف بس شيء واحد..
وبعدين انا لي سنتين منتظمه وكنت في كلية الآداب والآن في إقتصاد منزلي يعني متنقله من مكان لمكان ومروا علي بنات كثيييييييييييييييييير وكل ترم لي صاحبات جديدات الحمد لله ماشفت منهم أي شيء..
وزي ماهو معروف في كل مكان في الطيب وفيه السيء ..
مافي مكان نظيف مية في الميه بس مقارنه باكلام اللي سمعته صراحه
ماشفت ولا شي في الجامعه .
وبعدين بنتك ماشالله كبيره وواعيه وتعرف تختار وتنتقي صاحباتها..
أنا من رأيي ماتسمع لكلام الناس عن الجامعه وخذيها مني الجامعه حلوة ومافيها أي شيء وانشاءالله تلقى فيها كل اللي تبغاه..
وبالنسبة للتخصصات إذا هي ماتبغى تدريس فممكن تدخل كلية الإقتصاد والإدارة فيها تخصصصات كثير ( إدارة أعمال , إدارة عامه , قانون , محاسبه , علوم سياسية , الإقتصاد)
بس بصراحه كل البنات اللي أعرفهم في هذي الكليه يقولو صعبه الدراسه فيها وتعتمد بشكل كبير على دراسة الرياضيات ..
لكن في كلية الآداب فيها تخصصصات حلوة وخفيفه ومو صعبه مره
( علم نفس , علم إجتماع ,اللغات الأوربية :فرنسي أو انجليزي , إعلام ,التاريخ , جغرافيا ، المكتبات , اللغة العربيه , دراسات إسلامية)
طبعاً مو لازم إنها تتوظف في التدريس فيه فرص وظيفيه كثير وموجوده في موقع الجامعه على هذا الرابط:
http://art.kau.edu.sa
فيه كمان عندك كلية العلوم بس أغلب تخصصاتهم علميه
(فيزياء , رياضيات , كمياء إحصاء …)
وفيه كلية الحاسبات وتقنيةالمعلومات وعلى ماأظن إنها صعبة جداً وطالبين معدل عالي فيها وداستهم تعتمد على الحاسب الآلي .
واخر كلية هي كلية الإقتصاد المنزلي (كليتي) هههههه
طبعاً مو عشانها كليتي حمدح فيها لا والله بس بصراحه كليه ولا أحلى وتخصصاتهم رائعه جداً ومنوعه وخاصة للي مايحب التدريس لانها تتيح المجال ان الوحده تتوظف في اي مكان حتى لو في بيتها كمان ميزة ثانيه فيها دراستها مررره حلوة وممتعه وسهله بس عيبها كثرة الطلبات هههههههه
المهم هي لو حابه العملي أكثر من النظري ممكن تدخلها وتخصصاتها هي :
( غذاء وتغذية , تصميم داخلي , إدارة سكن ومؤسسات , الفنون , دراسات طفولة ,
الملابس والنسيج , الإقتصاد المنزلي التربوي)
وممكن تلاقي كل اللي تبغي تسألي عنه في هذا الرابط:
http://homeecon.kau.edu.sa/
أنا بالنسبة لي تخصصت تصميم داخلي والحمد لله
مبسوطه في الجامعه وفي كليتي وفي دراستي .
المهم هذا اللي اعرفه عن جامعه الملك عبد العزيز
انشاءالله اكون قدرت افيدكم.
وأي سؤال أنا حاضرة ..
جزاك الله كل خير واسعدك في الدارين
أنا ليس لدي معلومات لكن دخلت لأدعيلك ولبنتك بالتوفيق لأني مررت بهذه الحيرة لما كنت بعمر بنتك.. نصيحتي هي أن تختار تخصصا تميل له حسب اهتماماتها وهواياتها، فلو كانت تحب الرسم وتستمتع به تدخل كلية الإقتصاد المنزلي ..
بابا الله يحفظه كان دايما يوصينا أنا واخواني واخواتي ويقول اختاروا دراسة جامعية تحبوها وتستمتعوا فيها حتى تبدعوا بحياتكم وتخلصوا بعملكم.. وهذا فعلا اللي حصل وكل واحد منا محب لعمله ومخلص فيه..
اجلسي مع بنتك وفكروا باهتماماتها وانصحيها لأنه بسنها الاختيار يكون محيّر الها.
و بالتوفيق
