بسم الله الرحمن الرحيم
السلام عليكم ورحمة الله تعالى وبركاته
أكلة اليوم أكلة كل البلدان العربية تعرفها
ولكن كل بلد يعملها على طريقته
سمعت أنه بالسودان بيطحنوها وبيعملوها بعدين بوصفتهم الخاصة
وللعلم عندنا بالشام بيسموها أبوات ولها أسماء أخرى كثيرة مثل: حفاتي – كرشة (اسمها الحقيقي عند الشراء)
يعني لكل بلد طريقته الخاصة بعملها
بس اليوم ساويتها لكم طبعاً على الطريقة الشامية
مثل لما بتذكر من وقت ما وعيت على الدنيا وشفت أهلي بيعملوها
ما بعرف ليش لما تغربت صرت بشتاق كتير لهالأكلة
حتى أني بحملي بابني توحمت عليها كتير
وساعدتني واحدة من معارفي الله يذكرها بالخير بعملها
رحت واشتريت يومها كل أغراضها ورحت لعندها وساويتها عندها بالبيت
طلعت هي كمان بتحبها بس ما عم تلاقي وقت لتساويها
صحيح هي أكلة بدها وقت شوي بس بالآخر بتنسي كل التعب
أول ما تحطي أول لقمة في فمك منها
ويلا نبلش بالطريقة بسم الله ::
تحضير الكرشة:
في البداية نشتري بالطبع الكرشة من السوبر ماركت
أو من عند اللحام وبيكون شكلها هيك أول ما نشتريها
نغسلها بالماء ولو بدك بالصابون كمان ما في مشكلة
بس انتبهي إذا غسلتها بالصابون فسوف تحتاجين لوقت أكبر لتنظيف أثر الصابون منها
ثم نبدأ بتقطيعها قطعاً شبه مربعة لكي يسهل علينا تشكيلها بعد ذلك
وعند التقطيع يجب علينا مراعاة التخلص من العروق التي لا يمكن أن تستوي
وبكل كرشة فيها عرقين أو ثلاثة حسب حجمها
الحشوة:
جهزي الحشوة الخاصة بالأبوات وهي عبارة عن :
رز أنا حطيت كاستين رز
ملح
بهار
فلفل
لحمة ناعمة بمقدار كأس تقريباً
حمص مستوي ولكن منزوع القشور بمقدار كأس أيضاً
يتم نقع الحمص قبل يوم ثم تصفيته ووضع ماء نظيف له وغليه على النار
نضع قليلاً من بيكربونات الصوديوم لكي يستوي الحمص أسرع
ثم نقوم بنزع القشور عنه حتى نضعها بالحشوة
تكون الحشوة بهالشكل لما تخلص:
بعد ذلك نقوم بجلب خيطان وإبرة ومقص
حطيهم بجانبك وقطعي خيطان طويلة بجانبك حتى لا توسخي كركر الخيطان
كلما أردت خيطاً
أنا بصراحة ابني الله يرضى عليه هو اللي صار يقطع لي خيطان كلما احتجت
الآن قومي بجمع أطراف الكرشة المقطعة بشكل مربع على بعضها
يعني الضلع على الضلع المقابل
وابدأي بالخياطة
نخيط ثلاثة أضلع لكل قطعة نترك الضلع الأخير مفتوحاً لكي نحشي من خلاله
قطعة الكرشة بالحشوة
كما في الصورة:
نحشي بشكل جيد ولكن لا نقوم بتعبئة القطعة كثيراً
حتى نترك مجال للرز حتى يستوي وما يعجن داخلها
بعد الحشي نخيط الضلع الأخير حتى نغلق قطعة الكرشة كاملة
بعد تخييطها بشكل كامل توضع على الصحن ويتم توزيع الحشوة بشكل متماثل في جميع أنحاء قطعة الكرشة
وتعيدين نفس الخطوات السابقة حتى تنتهي جميع قطع الكرشة المقطعة والتي تم تخييطها
نقوم بوضع ماء وملح على النار وعندما تغلي نضع قطع الكرشة المحشية
ونقوم بكشط الزفرة التي تظهر بعد قليل
بعد كشط الزفرة نغطي الطنجرة وننتظر حوالي ساعة حتى تستوي اللحمة والرز بداخلها
خلال هالوقت بإمكانك تحضير الطبق الذي سيقدم مع الكرشة عندما تستوي
نكون قبل ليلة قد جففنا رغيف خبز على صينية بالمطبخ نتركه ليجف لوحده
نكسر رغيف الخبز المجفف بصحن التقديم ثم نقوم بتحضير التتبيلة
التتبيلة سنقوم بوضعها على وجه الخبز بعد تسقيته بمرقة الكرشة التي تستوي على النار
التتبيلة:
حوالي 4 ملاعق لبن
ثلاث ملاعق طحينية سائلة
فصين ثوم مدقوق
ملح
نخلط الجميع في زبدية على جنب
عندما تستوي الكرشة نأخذ القليل من المرق الذي استوت فيه ونسقي به الخبز
حتى يصبح طرياً
نقوم بفرد التتبيلة على الخبز الطري
ثم نقوم بتصفية قطع الكرشة المستوية ووضعها على وجه الصحن
وصحتين وعافية
وهي الطبق بعد الانتهاء من عمله كلياً وقبل أكله طبعاً
ملاحظة: يمكن إضافة الصنوبر أو اللوز المحمص على وجه الصحن
بس هون ما ضفتهم لأني كنت مستعجلة ما مصدقة ايمتى أبدأ أكلها
بس قوليلي شو قصتك مع اللسانات والابوات
بتصدقي كنت عم دور عن هيك موضوع يعني الو صلة بموضوعك عن معنى الامعاء المحشية بالعربي في واحد صيني عم يسال زوجي عن معناها وما عاد اذكر اسمها شو منقول عليها
يسلمو يا عسل ست بيت معدلة ماشاء الله عليكي
فعلا كنت عم شوف الشيشيبرك قلت ولي اجيت لسكر لقيت هالموضوع قلت ولي وستين ولي ههههههههه يسلمو ايدكي يا عسل فعلا معدلة وشي بشهي
يعطيك الف عافية
هاى احنا فى فلسطين نسميها كرشات
وطريقتها زيك بنعملها مع البمبار بالمصرى والفوارغ بالفلاحى
بس بعد ما اطبخهم برش عليهم ملح وليمون وبحمرهم تحمير فى الفرن
عندى الكل فى البيت بحبهم ما عدا بنت وحده بتهج من البيت لما تسمع فيهم ههههههههه
تسلم ايدك
والف هنا وعافيه
تسلم الايادى الكريمه
كتبت بواسطة ritagriad 
ماشاء الله على هالايدين اكلة شهية كتير وبدها لما بدنا نساويها احتفال ريتو عوافي ربي بتستاهل التعب هالاكلة
الله يسلمك
هي بنفسها عملها بده احتفال
أنا أول ما بشم ريحتها على النار بكون ما بصدق ايمتى بدي أكلها
وبصراحة بتستاهل التعب لأنها لذيذة
بصراحة ما بعرف ليش بتوحم عليها هي بالذات من بين كل الأكلات كلما حملت
ولما يروح حملي بساويها مباشرة انتقاماً من وحامي