**البيتزا نجحت معايا الحمد لله فى بوتاجازى الكبير 2024.

انا عملت مواضيع قبل كدة عشان استفسر عن البيتزا بتخرب منى ليه
كانت دايما تطلع مكتومة او شبه معجنة لما بسويها
وكمان كانت معايا مشكلة مع فرنى
عشان بوتاجازى 5 شعلة والفرن كبير والنار تحت صاجة فى قاع الفرن
والحرارة بتتوزع فيه بصعوبة مش زى الأفران الصغيرة
والأخوات فى المنتدى ماقصروا فى النصايح جزاهن الله خيرا

بس لما الأخت نبعة الريحان عملت موضوعها عن البيتزا
وكان الشيف اللى علمهالها موصيها ان الفرن تبقى سخنة جداً قبل وأثناء طبخ البيتزا
قلت خلاص اجرب من جديد

وكانت النتيجة الحمد لله
البيتزا طلعت رقيقة وفى نفس الوقت طرية وهشة وخفيفة
عشان غيرت طريقة خبزى ليها
لإنى كنت باتبع وصفات الناس ومش براعى نظام فرنى

الكل بيحطها ع الرف الوسطانى على حرارة 180 او 200
انا حطيت شبكة الفرن فى اول رف من تحت
وبولع الفرن من اول ما ابتدى افرد العجين واحط الحشوة على اعلى حرارة
ولما احط البيتزا اقلل الحرارة على 200
15 او20 دقيقة واطلعها وتبقى تمام

بس خلوا بالكم من الفتحة اللى فى قاع الفرن اللى بنولع الفرن منها
عشان الصينية لو جات فوقها بتحمص العجينة من تحت
يعنى الصينية لو اتحطت فوقها ماتخلوهاش تطول

المقادير
***

العجين
تكفى صينيتين وسط
2ونص كوب دقيق
قطعة خميرة صغيرة
ملعقة صغيرة سكر
ملعقة صغيرة ملح
3 او 4 ملاعق كبيرة زيت
ماء حسب نوع الدقيق ممكن كباية او اقل او اكتر
انا كل مرة لما بكون جايبة الدقيق جديد باستخدم ميا بكمية مختلفة

الإضافات
جبنة موتزاريلا
صلصة
فلفل اخضر شرايح – طماطم شرايح – زيتون حلقات
واى حاجة من اللحوم او السى فود زى ماتحبوا تحطوا عليها

الصلصة
بعملها كمية واشيلها فى الفريزر
زيها زى الصلصة اللى بعملها للمكرونة بس زيادة عليها الزعتر

2كيلو طماطم
بصلة متوسطة
كام فص ثوم مفرومين
زيت
ملح – كمون – فلفل اسود – سكر – زعتر

جوزى جابلى صلصة بيتزا من هاينز
ابرز حاجتين حسيتهم فيها السكر والزعتر
عشان كدة كترت السكر فى الصلصة دى

الطريقة
***

الصلصة
بحمر البصلة فى الزيت لما تبقى لونها بنى
اضيف عليها الثوم المفروم واقلبه حاجة بسيطة
وبعدها اضيف عصير الطماطم المصفى
واضيف سكر كتير
واضيف التوابل والزعتر
واسيبها تتسبك
بعد ماتتقل بضربها فى الخلاط عشان تبقى ناعمة زى المعلبة
بحطها فى قوالب واشيلها فى الفريزر واطلع منها حسب الحاجة

العجين
بحط السكر على الخميرة واقلبهم لغاية ما الخميرة تبقى سايلة
بحط الملح ع الدقيق المنخول واقلبهم سوا
بحط الزيت عليهم واقلبهم وادعك الدقيق بين ايديا
بحط الخميرة المتقلبة مع السكر عليهم واقلبهم سوا
بحط الميا حبة حبة واعجن
بعجن كتير يمكن نص ساعة
لما تبقى العجينة خلاص تمام ومش بتلزق فى الإيد
بزودها شوية ميا واعجن واخليها طرية وبتلزق حاجة بسيطة جدا فى الإيد
احطها فى وعاء عميق مدهون زيت خفيف
اسيبها تخمر فى مكان دافى
فى العادة انا بعجنها قبل ما انام واليوم اللى بعده بخبزها

التجهيز
بدهن الصينيتين زيت
واغمس ايدى فى الدقيق وانفضها عشان العجينة بتكون ملزقة شوية واقطع نص العجين وافردها فى الصينية
طبعا بتلم منى شوية عشان الزيت بس مش مهم
وللعلم المقدار ده البيتزا بتبقى رفيعة
بس بتطلع طرية وهشة
بحط الصلصة وبعدها الموتزاريلا
وبعدها باقى الإضافات
وممكن احط شوية موتزاريلا تانى ع الوش
احطها على اول رف من تحت على حرارة 200 لمدة 15 او20 دقيقة بس
وبالهنا والشفا

باعتذر الصور مش واضحة قوى عشان بنتى ماكانتش سايبانى

يا فرحتي بيتزا من الصبح يم يم يمي يم والله فعر عاشت ايدج ام جوجو تخبل روعه بمعنى الكلمة الف عافية عليكم وصحة ما شاء الله فنانة ربنا يحفظ لج جوجو ويرزقك ببنين وبنات اللهم امين