اول شي المقادير:
خيار كبير احنا هون في نابلس معروف عنا بس اللي ما بيعرفوا هالاكلة جيبو خيار كبير وبالنسبة للكمية انا وزوجي بناكل 2 كيلو 
اه ما تستغربوا لانو كتير خفيف
رز مصري لكل كيلو تقريبا كيلو او اقل شوي مغسول ومنقوع لمدة ساعة
لحمة مفرومة ناعم متل اللحمة اللي بتستعملها للمحاشي
بهار وفلفل وملح وقرفة مطحونة
لبن رايب او زبادي
هلا بدنا نبلش نطبخ
اول شي بنغسل الخيار منيح والافضل انا نفرشي بفرشاية الخضار
بنتركو ينشف شوي من المي بعدين بنشيل القمعة 
ما بعرف انتو شو بتسموها بس يعني راس الخيارة من فوق وبنبلش ننقر فيها متل الكوسا بالزبط بس نقر الخيار اسهل بننقر شوي شوي لحتى تصي الخيارة فاضية بس مو كتير عشان تقدر تتحمل غلي
انتبهوا على لب الخيار ما تكبو
بنحضر الرز وبنخلط معاه اللحمة والملح والبهار والفلفل والقرفة والزيت (انا بحط زيت زيتون كتير زاكي بس ازا في ناس بيحبوا الاكل اخف ممكن زيت ذرة او عباد الشمس وممكن تخلطوا مع زيت زيتون برضة زاكي)
هلأ بنبلش نحشي الخيار بالرز بنحشي متل الكوسا يعني بنخلي فراغ من فوق قد عقدتين من الاصبع
بعد ما خلصنا حشي بنصف الخيار بطنجرة وبنحط على وجه الخيار ملح وبنصب عليه ماء ساخن ونضع على الوجه ثقل عشان الماء يغمر كل الخيار وبنغطي الطنجرة وبنخلي يغلي لحتى يستوي
بتعرفي انو استوى لما يتغير لون الخيار من الاخضر للاصفر شوي بعدين بالشوكة ازا الشوكة دخلت بيكون استوى بس ما تخلي يستوي كتير
استوى الخيار هلأ بنكب المي عنو وبنحطو في مصفاه وبنحضر المقلى اللي فيها زيت عميق بس مش كتير بنسخن الزيت وبنبدا نقلي بالخيار
بيصير مقحمش من برة وزاكيييييييييييييييييييييييي
لب الخيار اللي نبهتكم ما تكبو (مش تكونوا كبيتوا )
بنحطوا في مصفاه لحتى تنزل كل المي اللي فيه بعدين مع بنخلطة مع اللبن الرايب وبندق الثوم وبنخلطه معاه وبنملح وعلى الوش رشة نعنع ناشف بينحط على السفرة مع الخيار المحشي
وبالنسبة لمية الخيار اللي نزلت من اللب حطيها في مرطبان من الزجاج وامسحي وجهك فيها كل يوم وشوفي النتائج رح تدعيلي
وصحة وهنا
اجمل ما في الوصفة إنك استفدتي بكل المكونات انا أكره ماعندي اني ارمي اي شئ
تسلم الايادي
والاهم بتستفيدي من مكوناتها مشكوره عزيزتي
حبيبتي رندوش شهادة افتخر فيها من شيف درجة اولى
شكرا
ان شاء الله بنجربها
تسلم الأيادي
شكرا يا اجمل اخوات على المرور
