والله ادري فيكم ماتفهمون بس بشرح بتفصيل شوي ..الحين يابنات بليس تغسلون اللحم زين وتقطعونه باحجام متوسطه يعني اصغر من صابونة الرقي او نصها .. ولاتنسون تغسلونه زين مفهوووم .. وبعدين تحطون جدر وتفوحون فيه اللحم مع بهارات .. دارسين خشن..ملح .. هيل .. مسمار .. فلفل اسود .. كمون .. ونتيفة كركم .. وتفوحونه لما ينضى ,, وهو يفوح طبعا تكونون مجهزين كل شي يعني قاصين البصل والطماط له قصتين وحده صغار عشان الحمسه والثنيه شرايح وحتى البصل نفس الشي والبطاط هم يصير شرايح جنهم براطم بلاع البيزه وتقلونه نص قليه وتخلونه على كتر..وبعدين تسون المشيخيله وعلمتكم عنها من قبل تشخلونه تفوحون العيش مع ماي وملح وتشخلونه بالمشخال وتخلونه على كتر.. الحين تحطين دهن خفيف بالجدر وتحمسين البصل والطماط المقطع صغار مو تعفسون السالفه مع الويه .. وتحركينهم وتحطين عليهم بهار .. فلفل اسود ولومي اسود وكمون ودارسين ونتيفة كاري وكركم وكزبر وهذا كله مطحون طبعا وهم تحطين جم حبة مسمار خشن وهيل خشن وفلفل اسود خشن ووتحمسينهم مع بعض .. واذا نضى اللحم تشيلينه من الماي وتحطينه بالجدر مع الحمسه وتحمسينهم مع بعض وتحطين فوقه الثوم المدقوق عشان يشرب الريحه وتحركينه عدل وكل ماتشوفينه يتلزق حطي فوقه شوي من ماي اللحم وتحركينه وعقب شوي حطي شوية معجون طماط يعني قفشتين كبار و تحمسينه مع الخلطه وبعدها بشوي حطي نص قوطي روب وتقدرين تستغنين عن الروب بس انا ذكرته لان تدرون الكويتيات يحبون التفلسف والشحاطه .. ماعلينا .الحين تحطون الطماط والبصل والبطاط المقلي نص قليه فوق الخلطه وتحركونهم بالعدال وطبعا نسنا نقول عن الملح حطو ملح على الخلطه لان اللحم مفيوح بدون ملح واعتقد هذي شغلات صغيره ماله حاجه كل شوي اقولها ؟؟ والله ادري انكم كمخه وماتفهون شي لكن يالله امري لله بشرح لما ينشف ريجي .. اي وين وصلنا ؟؟ الحين نيب جدر حجمه زين ونسوي طبقات يعني نحط تحت شوية عيش وفوقه شويه من الخلطه وبعدين عيش وفوقه خلطه يعني نصفهم فوق بعض بس اخر شي يكون العيش انزين يالكميييخ ؟؟ وييييي نسيت اقولكم ان لازم تجهزون الزعفران ويكون منقع بماي ورد .. حظي المخ صار كلش .. اي اذا زاد الكبر المخ دثر .. تضحكون ها ؟؟ يعلكم الضحكه اللي تشلع معلاقكم يابنات بليس .. ماعليه اكملكم وبعدين اراويكم شغل الله .. الحين ترشون الزعفران فوق العيش عشان لون العيش يصير مصوفر من الخلطه والزعفران وتسكرون الجدر وتحطونه تحت حديده وعلى نار هاديه .. وعليكم بالعافيه ..
عاد البرياني يبيله اجااار ومعبوج وخضره ايي هالله هالله بالخضره تراها زينه وخصوصا ادوات الخيسه ومشتقاتها لانها تذبح ريايلكم وماتخليهم يطلبون منكم اكل .. لكن اذا طحتي في واحد خايس الله يعينج هني لاتحطينله اي خضره بس بربير وريحان … المهم جربوا الطريقه وقولوا امنا العوده دندره ماقالت .. ادري اني اهذر مع روحي ولا انتوا حولي المهم سويت اللي علي وعلمتكم واللي ماتبي تفتهم بالطقاق اللي يطقها وعلى قولة القايل هبالها على خبالها
ونسيت اقولكم ترى برياني اللحم والدياي نفس الشي مفهوووووووووووووم وترى في ناس يحبون التبربس يعني اللي تحط بزاليا واللي تحط جزر واللي تحط عمات عين وانتوا وهواكم
مع تحيات امكم العوده
دندره
وهذا ايميلي يمنع وضع الايميل