الستيك بالبيبر صوص مع اعاده تحميل الصور 2024.

اهلا وسهلا بكل العضوات
انا بقالي زمااااااااااااااااااااااااااان منزلتش اكلات بس طبعا انتو عارفين ظروف الحمل والولاده واول فتره بعد الولاده عقبالكم جميعا

انا بقى كل فتره بيهف عليا الستيك بالبيبر صوص وطبعا الستيك سهل بس المشكله كانت في البيبر صوص اللي طبعا مش بيتعمل الا في المطاعم
وانا بقالي مده عامله ريجيم والنهارده كان يوم الفري فقعدت افكر اكل ايه؟
فقلت نفسي في الاستيل بالبيبر صوص بس كان مستحيل اكله برا لان زوجي اليومين دول بيرجع البيت الساعه 11 بالليل وبيبقى هلكان فطبعا حرام انزله بعد كده
فقلبت الدنيا لحد ما جبت وصفته والحمد لله عملته وطلع والله والله نفس طعم المطعم وطبعا انظف واضمن

رغيت كتير يلا عالطريقه

المقادير

كيلو ستيك

(التتبيله)
بصله متوسطه
2 ملعقه كبيره ثوم مفروم
2 ملعقه كبيره صلصه طماطم
2 ملعقه كبيره زبادي
3 ملاعق كبيره خل
عصير ليمونتين
ملح فلفل شطه قرفه بابريكا

(البيبر صوص )
ربع كوب صويا صوص
4 ملاعق كبيره دقيق
ملعقه كبيره سكر
4 ملاعق كبيره فلفل اسود مطحون ناعم جدا
ملعقه زبده
نص ملعقه صغيره ثوم مفروم ناعم
نص ملعقه صغيره بصل مفروم ناعم
كوب ماء

الطريقه

نحط كل مكونات التتبيله في مفرمه البصل ونضربهم لحد ما البصل يختفي ويصبح الخليط متجانس تماما
ونحط اللحمه في التتبيله وتبات في الثلاجه من بالليل للصبح وده شكلها بعد ما خرجت من الثلاجه

وبعدين نجيب صينيه تيفال كبيره ونحط فيها 4 ملاعق زيت ذره ونشوح اللحم لحد ما لونها يتغير

واول ما تستوي كميه اللحمه بتبقى بالشكل ده

وبعدين نجيب طاسه تيفال ونحط فيها الزبده والدقيق و نقلب لحد ما يبقى ذهبي وبعدين تضيف السكر والصويا صوص والفلفل الاسود وتقلب لمده دقيقتين وبعدين نحط البصل والثوم وتقلب دقيقتين كمان بتلاحظي ان لون الخليط بقى غامق نضيف كوب الماء ونقلب بسرعه علشان ميكلكعش والافضل بمضرب سلك صغير ونوطي النار ونسيبها لحد ما تبقى بالمنظر ده مع ملاحظه سمك القوام

وبعدين نجيب صينيه بايركس ونرص طبقه لحم وطبقه صوص وبعدها لحم وبعدها صوص لحد ما الكميه تخلص وبتبقى بالشكل ده

وبندخلها الفرن على درجه حراره 180 لمده ربع ساعه وبتخرج بالمنظر ده

وتقدم مع الارز الابيض

بجد والله يابنات ماتفرقيها عن اللي في المطعم واول مره جوزي يقولي اكلك احلى من المطاعم

والف هنا وشفا