بسم الله الرحمن الرحيم
السلام عليكم ورحمة الله تعالى وبركاته
رح تقولوا لحالكم شو قصتها هالمخلوقة لسه كوسا بكوسا
بس شو بدي أعمل بحب الكوسا وبحب أكلاته وأنواعها
اليوم جبت لكم أكلة كتير كتير كتير كتير طيبة ولو كان فيني سجل لكم صوت ابني
ما شاء الله عليه لما أول ما بيحط أول لقمة بفمه
يعني هالطبخة إذا ما بطبخها بالشهر أربع مرات تقريباً ما بيرحمني ابني
الأكلة هيدي بسيطة كتير وسهلة ولذيذة وخفيفة لكل من لا يطيق تحمل مرقة البندورة
بسم الله نبدأ
أول شيء مثل موضوع مقبلات الكوسا
نقيس حجم الكوساية بالمحفارة بهالشكل :
حتى لا ندخل المحفارة زيادة فتثقب الكوساية
وبعدين ندخل المحفارة شوي شوي وندورها بنفس الوقت لحتى تطلع معنا الماسورة الأولى
ونظل ندور الكوسا ونحفره لحتى نحس أنه صارت الكوساية محفورة بشكل مطلوب
لا كتير لسه مليانة لب الكوسا ولا كثير محفورة
بعد ذلك نقوم بتحضير الحشوة:
وكل ذلك اختياري حسب الطلب
يعني فيه ناس بيحبوا اللحمة زيادة بالحشوة
وفيه ناس مثلي يقللوها لأنو مثل زوجي عم يبعد عن اللحمة لأنه الله يعافيه الكوليسترول عنده مرتفع
المهم أنا بعمل لكل كيلو كوسا كاسة رز
طبعاً لازم تعرفي كم كيلو الكوسا اللي عندك من لما تشتريه من السوبر ماركت
نضع الرز ننقعه فترة نصف ساعة تقريباً
ثم نصفيه نضيف له اللحمة ثم البهارات والملح طبعاًّ
فيه ناس بتحط للحشوة عصفر بس أنا ما بحبه كتير
البهارات اللي عندي بشتريها مخلطة خالصة من السوبر ماركت بذوق منها شوي ولما بتعجبني بشتري منها
المهم ما شمها لأني لو شميتها كل السوبر ماركت رح تظل تسمعني عم عطس
بعد تزبيط الحشوة
نقوم بحشي الكوسا وطبعاً الطريقة ما بدها اختراع بس رح أذكرها
في حال كان هناك اخوات لساه جدد على طريق الطبخ مثل لما كنت قبل سبع سنين ما بعرف الكوسا من الباذنجان
عم أمزح ما لهالدرجة كنت
نمسك الكوساية وفمها لفوق نحمل قليل من الحشوة بيدينا ثم ندكهم داخل الكوساية برفق
وندخل طرف اصبعنا كلما وضعنا حشوة داخل الكوساية
وهكذا حتى نترك مجالاً فارغاً لسلامتين من الاصبع داخل الكوساية
وبعد أن ننتهي من حشي كل الكوسا
نكون قد حضرنا على النار ماء مغلي فيه ملح
نسقط الكوسا المحشي بالماء شوي شوي
ونغطي الطنجرة بغطائها ونقوم بتحديد مدة نصف ساعة تقريباً
كل واحدة تعرف عيار الغاز عندها وقوته وسرعته والمدة اللازمة للطهو عليه
نكون قد حضرنا في خلاط الطعام
– لبن رائب (الكمية حسب الرغبة وحسب كمية الكوسا)
أنا وضعت لاثنين كيلو كوسا كاستين لبن مثلاً
– ثوم غير مدقوق
(الكمية اختيارية حسب اللي بيحب الثوم كثير ولا قليل)
– كزبرة يابسة
يمكن الحصول عليها من السوبر ماركت
أحياناً تكون حبوب وتحتاج لطحن شبه ناعم
– ملح
– طحينية سائلة وهي سر الخلطة والطعمة بعدين
صحيح هي اختيارية ولكن عند اضافتها تضفي نكهة خفيفة ناعمة على اللبن لما يستوي مع الكوسا
جربوها وما رح تندموا على اضافتها
– وطبعاً نشاء مثلاً لكل كاسة لبن ملعقة طعام كبيرة فيها نشاء
هيدي أول صورة لبين لكم المكونات قبل خلطها
وهي صورة ثانية نسيت بالصورة اللي قبلها تصوير الملح
وكنت قد نسيت شيء آخر وهو وضع النشاء فاضطررت بعد خلط المقادير وتذكري للنشاء وإضافته
أن أصور مرة أخرى كرمال النشاء
طبعاً أنتم فيكم تحطوهم كلهم مع بعض وتخلطوا مرة واحدة
بعد ذلك نسكب الجميع في طنجرة على النار ومعهم القليل من الماء
نزيد الماء حسب حاجتنا إن وجدنا اللبن جامد شوي نضيف لبن
ونحرك باستمرار حتى نرى بأن اللبن قد استوى
يعني يصير يلصق بخلفية الملعقة كمية لبن تغطي خلفية الملعقة كاملة
وطبعاً بالتذوق نعرف إذا استوى اللبن أم لا
بعد أن يستوي الكوسا نخرجهم من الماء المغلي
ونضعهم باللبن ونقلبهم مع اللبن لمدة خمس دقائق على نار هادئة حتى لا يلتصق اللبن بقعر الطنجرة
يتم سكب الكوسا مع اللبن في وعاء للتقديم ويمكن تزينه بقليل من الكزبرة الخضراء المفرومة ناعماً وهو اختياري كمان
وصحتين وعافية
وطبعاً ما تنسوا يمكن أكل هالطبخة مع الخبز العادي وحتطلع أطيب
يمي على هالاكلة شو لذيذة و ما بينشبع منها
ماشاء الله
اكله شهيه
كتبت بواسطة ritagriad 
لك يعيشو هالادين الهي
يمي على هالاكلة شو لذيذة و ما بينشبع منها
ماشاء الله
الله يسلمك يا رب
وتسلميلي شو مذوقة
وهالأكلة بالفعل ما بينشبع منها
بتكفي أنها بتبرد على القلب بهالصيف