يامساء الفللللللل
النهارده يابنوتات جبتلكن فطيرة الجلاش بالمكرونة …. وااااو
شوفوا بأه بتتعمل إزاى
المقادير والطريقة مع بعض كالعادة
الأول قطعت جزر صغنن فى حجم حبة البسلة حوالى جزرايه متوسطة
وبعدين سلقت الجزر مع شوية بسلة قدهم
وبعدين بصلاية وسط وقلبتها فى شوية زيت أو سمن حسب الرغبة
وآدى احمرت البصلاية
ضفت ملعقتين كبار دقيق وقلبت بسرعة
وآدى بعد ماقلبت كويس والدقيق داب
رحت ضايفة كباية لبن وكباية شوربة
وكده يبقى الباشاميل بالبصل جاهز
سلقت مكرونة سباجتى حوالى نص كيس
قلبت كله مع بعضه ( المكرونة والبسلة والجزر والباشاميل ) وظبطت الملح والفلفل
دهنت الصينية اللى حافرد فيها الجلاش بالسمن
فردت ورق الجلاش بحيث يغطى قاع الصينية وتتدلى الزوائد بره علشان حانغطى بيها بعد كده ودهنت سمن
صبيت خلطة المكرونة ورشيت جبنة رومى
وقفلت الجلاش على الخلطة ورشيت سمن
وبعدين قلبت بيضايه فى كباية لبن وملح وفلفل وصبيتها على الجلاش
وتدخل الفرن وتستوى براحتها لغاية ماتحمر … ولحد هنا عندك اختيار من اتنين : ياتقطعيها فى الصينية زى انا ماعملت
ياإما لو كنتى عملتيها فى صينية تيفال يبقى ممكن تقلبيها فى سرفيس وتبقى عامله زى الفطيرة وزينى حواليها بشرائح أى حاجه …. 
ودوقى الطعم وادعيلى …..
وتنجدينى من العالم اللى هنا اللى مابيبطلوش أكل …… … وياحبيبة قلبى ماتغلاش عليكى الصينية واللى عملت الصينية واللى أكلوا الصينية كمان …. وكل سنة وانتى بألف صحة وهنا يارب …. ما شاء الله و شكلها يجنن
ههههه مش لاقيين ولا جزر ولا خس تفتكري ايه السبب 
ههههه
ربنا يحفظك يا كارمن وتسلم ايديكي
sama_sehab ….. اسكتى ماتفكرنيش بموضوع الجزر …. انتى عارفه الجزر بكام ؟ …. ب 8 جنيه الكيلو حضرتك …. واكيد مش انا السبب …. لسه مابقتش ارنب …. … لكن الخس مالى الدنيا … بلاش اشاعات مغرضه … ومافيش خس فيه كابوتشى …. والدنيا جميله ولا غاليه ولا حاجه …. … وتسلمى ياجميله ومانحرمش منك ….