₪موضوع متميز₪ لعيون أم البنين ملوخية و رز وووووووووومحاشي 2024.

السلام عليكم و رحمة الله و بركاته
مرحبا يا حلوين
حبيبة قلبي أم البنين جاية على بالها الملوخية و صرلها زمااااان ما داقتها
قلت يا بنت لا تخليها بنفسها حرام و قدميلها هالطبق
و طبعا" مو حلوة قدمه لحالو بركي حبت تعزم حدا من الصبايا معها عملت معه صحن محشي

1- الملوخية
أنا عاملتها مفرزة بما أنو الآن مافي طازجة و نفس طريقة الطازجة و نفس الطعم
الناشفة ما بحبها و ما بعملها يعني اذا وعوووود الخير حبت تجي ما بتجيب معها سي السيد..أصلا" ممنوع دخول الرجال….
خلونا بالمفيد
عملنا الملوخية بالدجاج مشان هيك نحضر دجاجة او قطع و غالبا" استعمل الأفخاد بيحبوها الأولاد أكتر
ننزع الجلد عنها..نفركها بملح و طحين و خل و شوية بهار..نتركها مقوعة حوالي نصف ساعة و بعدين نغسلها و نتركها تصفي من الماء.
نحضر وعاء الطبخ ..نضع الدجاج و ملعقتين زيت و نقلبه حتى يتحمر قليلا".
نضيف الماء و البهارات التالية وتكون كاملة مو مطحونة ( زنجبيل، عود قرفة ، فلفل أسود، قرنفل، جزرة، كرفس أو بقدونس، بصلة، سن توم، هيلن ورق غار)
نغطي الوعاء و نسلق الدجاج حوالي نصف ساعة.

في وعاء آخر نضع ملعقتين كبار زبدة و ملعقتين زيت و نقلب بهما نصف ضمة كزبرة خضرا و شوية توم مقطعين شرائح صغيرة

بعد أن نضج الدجاج نضيف الملح( ما ضفناه من البداية لأن الملح يشد اللحم و بيخليه ياخد وقت أطول بالنضوج).
نضيف الملوخية و هي مجمدة ( الخضار المجمدة نضيفها قبل ذوبان التلج للمحافظة على قيمتها الغذائية اذا كان بقى شي بعد القطف و الغسيل و الفرم و التجميد)
اللحم يجب أن ننتظر حتى يذوب التلج عنه..
المهم نضيف الملوخية و عليها مرق الدجاج بد ما نصفيه..

نغطي الوعاء و نتركها تنضج على نار هادئة.
لا نضيف الملح حتى ما تسود بيكفي الملح يلي بالمرق و في الآخر رح نذوق و نظبط الطعم.
بس تستوي الملوخية ….
ننزع العظم عن اللحم و نضيف اللحم إلى الملوخية لأنو الجماعة عنا مدللين و ما بيحبو يوسخوا ايديهن

نتركها مع بعض حوالي 10 دقائق…
نضيف التوم المهروس الآن و كذلك كمية قليلة من الكزبرة الخضرا( غير يلي ضفناهم بالأول)
نتركها على النار 5 دقائق و تكون جاهزة للتقديم
و طبعا" الملوخية بدها معها رز مفلفل بالشعيرية و نعصر عليها ليمون

مع ألف صحة و هناااااا
2- المحاشي
عملت كوسا و شوية بيتنجان و بطاطا ( وسيم بيحبها كتير)
نحفر حوالي 2 كيلو كوسا و البيتنجان و البطاطا و نحتفظ باللب

بالنسبة اللب لاترموه كتير طيب
نقلب شوية توم بزيت الزيتون و نطبخ معه اللب و في الأخر نضيف النعنع الناشف

بالنسبة للحشوة أول ما نبدأ نحفر ننقع حوالي 2 كاسة رز قصير.
نضيف الحمة المفرومة حسب الكمية يلي بتحبو
نضيف الملح عادة منضيف ملعقة كبيرة لكل كاسة رز
البهارات( فلفل أسود…زنجبيل مطحون…كمون…بهارات مشكلة…عصفر لإعطاء اللون الأصفر للرز..و على فكرة العصفر بيساعد بتخفيض الكوليسترول يمكن لهالسبب بيضيفوا للمحاشي باعتبارها أكلة دسمة..) ..ربع كوب زيت و نخلط المواد جيدا"

نحضر وعاء الطبخو نضع في أسفله شرائح بصل و توم مدقوم و فليفلة خضرا حلوة و حدة
اليوم ما حطيت لحم و عضام لتخفيف من الدسم شوي

و على فكرة بيعطو طعم طيب للمحشي.
نحشي الخضار يلي حفرناها و نرتبها بالوعاء بالترتيب..الكوسا، البيتنجان ، البطاطا

نضيف علهن عصير البندورة الطازجة أو دبس البندورة ذا مو متوفرة البندورة الطازجة
و نضع وعاء ثقيل عليها أو الفخارة تبع المحاشي

نغطي الوعاء و نترك النار قوية حوالي ربع ساعة و بعدين نتركهم يستووا علة نار هادئة بحيث يكون مجمل الوقت ساعة وأحياناط أقل شوي حسب نوع الخضار و الكمية
نسكبها و نقدمها

و أكيد ما رح ناكلها ناشفة لازم نقدم المرق تبعها جنبها و هو طبعا" كتييييير طيب

تفضلوا مع ألف صحة و هنااااااا