الموضوع بسيط كتير والسؤال أبسط …
وصفات وطرق أطباقك بتعطيها للجميع ولمين ما سألك من أقاربك ومعارفك بالتفصيل ؟!
هذا السؤال ببساطة … يا ريت تجاوبوني واللي معها وقت ساعتين تلاته فراغ تقرأ البقية تحت !!
————–
واحكيلكم سبب السؤال …
أصلي من النوع اللي بفرح لما بعطي وصفاتي للآخرين , وبفيد قريباتي أو صديقاتي ومعارفي
وبحس إني بكسب أجر إن طبقت الست فيهم وصفتي وأدخلت السرور على زوجها واطفالها.
فبتلاقيني وصفاتي موزعه مسموع ومرئي ومكتوب 
ودفتري بين إدين الكل , واللي بده يصوره يتفضل ,
والإيميلات شغاله طول نهار أبعت وصفات خاصة للي بدهم .
أحيان بكون عندي وصفه خاصة أو طريقة سرية لعمل شيء معين , وبكون تعبت لما وصلتله وتعبت وأنا أجرب واحترف الشي
لكن لما وحده تطلب مني الطريقة ما بتردد اعطيها أبدا لإني بخاف أكون بكتم علم (ومن كتم علما ألجمه الله به يوم القيامة) أو بما معنى الحديث , وحتى لو كان علم بسيط يخص الأكل والحلويات أنا بعتبره علم …
بس من فترة , بديت أستغرب تصرفات البعض …
أحكيلكم كم مثال ….
بعمل الأطباق وبتكون مميزة جدا وبتطير العقل , بياكلوها(فلان وعلان من الناس) وعضلات وجوههم تعبانه بحاولوا يخفوا الإعجاب …. ما بقولوا حتى يسلمو إديكِ
وفجاة بعد شوي بصدر منهم أمر ملكي بكل ترفّع وهم حتى مش مستنضفين يطلعوا بوجهي : شو الطريقه ؟!؟!؟!؟
انا على نياتي بجاوب وبالتفصييييييييييييييييييييييييييييييييييييل الممل !
———-
بتبعتلي مثلا سلفتي بكرة ادخلي الماسينجر بدي اسألك كم سؤال …أنا بزغرت : يااااااااااااي اتزكرتني وأخيرا …
بندخل وبتبدا تدحّ فيي أسئلة وأنا أجاوب بمجالات شتى (وانا فرحانه لإنه خير الناس أنفعهم للناس)
وفجأة بتحكي معي بعنفوان : أنا هلأ مش فاضية , ابعتيلي على الإيميل طريقة الاكلة الفلانية , والحلو العلاني …. باي !!
ياي!!
ببعت الطرق عن نفس رضيه بس فوق راسي علامة استفهام أكبر مني !!!
——–
وحده اتصلت فيي , بتقولي : في حفلة العيد كنتِ عاملة سويسرول والكل فكره جاهز , ابعتيلي إيميل بالطريقه خلي سامر يعمللنا اياه (سامر <<<<ابنها الصغير عمره 9 سنين بده يعمل وصفتي !!) يعني اخدمني وأنا سيدك وفوقها بهدله كمان 
——–
والاعجب إني مرتين بحياتي بس سألت عن وصفات , اول مرة , وعدتني تعطيني الوصفه ,
ولليوم الوصفه بتوصلني…يعني وعدت وطنشت (مع العلم إنه هاي الأخت بالذات ماخده مني 7 آلاف وصفه , وما بتلحق تطلب الوصفه إلا بصير ملقفاها اياها)
المرة التانية , شربت عند وحده عصير بنكهة الشمام 3 طبقات بلون برتقالي متدرج سألتها أجابتني ببرووووووووووووود (شمام) يعني بطيخ أصفر , سألتها يعني بتعصري الشمام ؟ قالت : إمم (هاي يعني آآه بس من واحد مش جاي على باله يفتح تمه)
والمنطق والعقل بحكي مستحيل يكون الشمام المعصور هيك بثلاث ألوان , بس قلّيت عقلي وعصرت شمام , بس طبيعي ما إله علاقه باللي شفته عندها .
المهم … طولت كتير …. شو أعمل عشان بلاش ييجي يوم أنقهر …وأفقع …
هل الكل بسألكم عن وصفاتكم ؟ وبتعطوهم كل شي…
هل بتحتفظوا ببعض الأسرار لأنفسكم (لإنه أكيد كل امرأة بتحب يضل شي يميزها عن الباقيات وينقال فلانه بتعمله غير شكل) ؟ فهل هذه أنانية …ولاّ بتشوفوها حق , ومش غلط يحتفظ الإنسان بشيء لنفسه!
شميت ريحة اكل جيت…هههههههههههه
عزيزتي..انا وحدة من الناس زيك..اي شي ممكن اعطيه و اي وصفة بعملها جديدة و بتطلع طيبة بتلاقيني بعطيها و بوزعها حتى بدون ما حدا يطلب مني…يعني مثلا بقول والله اليوم عملت اكلة غير شكل و بلا بلا بلااا…و طبعا السامعة بيشط ريقها و بتطلب الوصفة..انا هيك بحب افيد كل اللي بعرفهم و بحب يجددو متل ما انا بجدد و ما ببخل على حدا ابدااا..اما من ناحية عطوني ولا ما عطوني ما بتفرق معي صراحة…بحب دايما ينطلب مني اكتر و انسئل اكتر ما اسال ما بعرف شو العبرة بس هي جاي هيك
و ما بحب اخبي و لا شي و لا في اسرار و لا شي..لانو سبحان الله…نفس عن نفس بتفرق..يعني ممكن انا اطبق نفس المقادير بالحرف اللي بتعطيني ياها و ما بيطلع نفس الطعم..حتى كبايية الشاي اللي مافي اسهل منها مثلا بتفرق من شخص للتاني..
المهم..و لا تزعلي و لا تنقهري و لا تفقعي و لا في شي بيستاهل اصلا..اللي بدو يعطيكي شكر له و اللي ما بدو برضو شكر..
المهم انك انت لما تعطي بتكوني مبسوطة و مرتاحة و متفاخرة و و و…الخ الخ الخ..
و يا ستي على قول المثل اعملي خير و ارمي بالبحر..
و كله اجر و ثواب يا ام عمر و لا تاخدي الامور بحساسية..
و رغيت كتير بس استغليت فرصة نوم الامورة و رديت عليكي قبل ما تصحى تعملي عرس
سلاام
انا زي ما بتعرفوا اكتر وحدة بسال بهل المنتدى ليش يا حزريك لانو كل ما اسال وحدة تقلي بعدين ومش عارفة ومش مدكرة تمام طيب بالتلفون وهيك لبين ما بيطلعوا روحي وما بيعطوا
ومرة لما سويت كوكيز من المنتدى زوقتها لوحدة وبطبيعة الحال لاني اعملها اول مرة كانت قاسية حبة بسيطة او سويتها شو زيادة اول ما زاقته ايش قالتلي
ده كوكي ده طيب اتكسفي وما تزوقيني اياه عشان هي يعني اكلها كلو تمام وما يعجبها العجب ووحدة تانية برضو سالتها عن البسبوسة طلعتني ما افهم البطيخ شو لونه
طبعا الان كل وحدة تقرا تضحك بس هو ساعتها مولم وكانها تفضحك وخاصة بصوت عالي
ولما جت الفرصة انا سويت زيها مو عشان انتقم بس عشان حس بلي عملته
و من يومها تغيرت معي ولو قليل احيانا نضطر نستعمل اسلوبهن ايش ننساوي مع اني انا منالنوع اللي ما يطلع صوتي ولساني ماهو طويل واي وحدة تسالني على طول بعطيها لكن اكتشفت اني لازم يكون لي طول باللسان عشان وقت الللازم استعمله بس بكل حزر وادب بس لازم ارد علي اللي يجرحني ولو بكلمة
وصرت اللي تسالني اعطيها بس مو نفس اليوم اعطيها بعد كم يوم لان هاد الطبيعي عندهم
انا اقول لازم نحتفظ شي ما للانفسنا عشان مو بخل عشان نفاجء الناس بيه
لان لو عرفوا كل شي سيتعودون وسيقولون كمان هل الطبق بس طبعا حسب الناس وزوقها لكن انا بقول لازم نحتفظ شي ما لينا
مو قصدي عل المنتدى قصدي بين الناس اللي تتعاملين معهم
حكيت كتير سلام
ما تتخيلي شو فرحت لما شفت اسمك بالموضوع …
هو أنا ما فقعت ولا انقهرت ,
لإني بعمل شي بفرحني وبحبه لما بساعد وبعطي مثل ما كتبت فوق
بس خايفه في يوم من الأيام يصير شي >>>> فبحاول أتدارك الوضع على بدري 
شوفي رد بدور بتعرفي المقصود
صاااااااادقين بعض حريم كان معهم سر القنبله النووويه وخايفه تطلعوا
علشان كذا فى نوعيه من الحريم لو تكون مسويه النون ومايعملون ماسالها لانى عاااااارفه راح تقول لك الاعذار التاليه
الوصفه فى الدفتر واخذته جارتى تصوره
او
مانى متاكده من الوصفه اقرائها وارد لك خبر
وغيرها وغيرها
انا والله العظيم اعطى وصفاتى كاااااااااامله وبالعكس افرح لما احد يسالنى احس كانى مسويه انجااااااااز
مره سويت كنافه للمدرسه (((صحيت الفجر علشان تكون طازة وحاره ))) الكل فكر انها جاهزة وحده اخذت الطريقه والباقى ماسالنى ولكن اكتشفت بعدين انهم اخذوا الطريقه منها
هي المشكلة النساء في منهم عجيبيييييييييين بالتعامل ,
الله يصبرنا ….
وإنه وحده تنتقد أكلاتك بوجهك طبعا مو حلوة وبتحزّن …نحنا الستات بنتباهى باكلنا وعدالتنا ببيوتنا, وشي طبيعي الوحده تحز بنفسها لما حدا ينتقص من هالشي.
الله يسامحهم ويهديهم بس.
وأنا الفكرة الأساسية اللي كنت بدي نركز عليها اللي ذكرتيها في النهاية , هل خطأ الوحده منا تحتفظ بشيء يميزها !!
يعني ما نضحك على حالنا المرأة بطبعها بتحب تكون مميزة في بيتها وأكلها وتسمع شيء من الإطراء …
فلو كان كل شي بتتعب وهي تحصله وتتعلمه بتقدمه بسهولة للآخرين(ومثل ما قلتي القريبين منها واللي بدها تتميز م نبينهم) …. كيف بدها تتميز !!
ولاّ لأ !!!
ما بقول إنها تمنع شيء مما علمها الله (متل ما ذكرت هذا علم ما بصير تكتمه , وإلها أجر على كل شي ) بس ولو شيء قلييييييييييييل تحتفظ فيه لنفسها.
الموضوع مش خطير ولا هو صعب , بس إحنا بندردش مش أكتر يا جماعة …
اسم على مسمى الله يسعدك , ضحكتيني على القنبلة النووية
ويسلمو إديكِ على الكنافه , شهيتيني , بصراحة
شوفي تقلك..طالما انك انسالتي عو وصفتك او اكلك و حبو يعرفو..اعرفي انك متميزة..و لو كان بينك و بين نفسك خلاص…و كمان شي…التجديد و الابتكار بيخليكي دايما متميزة و بتصير ام عمر هي المعروفة بتميزها باكلها دايما و تجديدها و دايما الناس بيحبو يعرفو كيف بتعمل الاكلة الفلانية ..خلاااص اتميزتييييييييي و اللي كان كاان….والله انا عندي هالقناعة.. انا انسالت يعني في شي مميز..خلاص..و لا تسالي حدا عن شي..عشان ما تحسسيه انه مميز…هههههههههههههههههه ..يعني اشربي العصير اللي عجبك و ما تعلقي..هلا اللي عاملة العصير عمتستناكي تساليييييييييييييي…عشان تحس بتميز و تقعد تتفلسف..(قصدي النوع اللي بيحب يخبي و ما يعطي).بتفقققققققققققققع..ليش ما سالت اكيد ما عجبها.. او ان العصير كان عادي بالنسبة الك مش شي جديد..هههههههههههههههههههههه…يعني اتبعي سياسة تانية..ان شاءالله يكون وصل المقصود
فاصل اعلاامي ما الو دخل بالموضوع بس هلا صار و قلت احكيه
انا و قاعدة بقرا الرد..صورة ابني و بنتي بتوقيعي انا مصغرتهم..اجا ابني محمد شاف صورتو هو و اختو..صار يضضضضضضضضضضضضضضضضضحك..قال شو
Me and Sabrina are squeesed
هههههههههههههههههههههه ..فطسني ضحك
سلااام
والله يا فنو وأنا مثلك، بحب لما أطبق وأحد يسألني عن الطريقة أنه فوراً أعطيه، وبيقهروني لما بحبوا يسمعوا، لا قلم ولا ورقة.. طيب اكتبوا… أكتبلك إياها؟
لكن الحمد لله ما صادفت ناس مثل اللي ذكرتيهم، إنهم ينكروا أو يتطلعوا من فوق، بالعكس الناس بتتصل فيي بتقولي: سمعت إنك شاطرة كثير بكذا، نفسي آكلها من إيدك، أو يا ريت تعطيني الطريقة، وأنا حباً وكرامة
فنو، معلش.. ممكن تصوريلي كتابك وتبعثيلي إياه على البريد المستعجل؟ بدي أعرف طريقة السويسرول اللي شكلها جاهز..
صحيح، وبحب كذلك لما أكون آخذة وصفة من أحد، ولما يسألني عنها شخص، إني فوراً أقول هذه طريقة فلانة وهي كذا كذا.. بخاف لأني لو ما قلت أكون بنسب جهد غيري لي.. وهذا طبع بكرهه بكل أشكاله!
أما عن مشكلتك، فأنا أرى إنك خلوقة وطيبة وإنسانة ما في منك، وما تغيري هذا الطبع بسبب قلة فهم البشر، خليكي كما أنتِ، كريمة وصدقيني بتمر الأيام وبتلاقي إنه ما في شيء بضيع.. بس أشوفك على الماسنجر إن شاء الله بعطيك أدلة 
شفتِ بدا كيد النسا يشتغل !!
الله يسعده حموده …ما أزكاهم الأطفال وما أحلى كلامهم