الجرح يكبر معي .. والناس مشغوله
واللي ابيهم مشو .. واحد ورى الثاني..!
الليله ياطولها .. والدرب ياطوله
واللي ورايه .. احس انه تعداني..!
الوقت لامن تغير .. هذي فعوله
إما لعب لعبته .. والا تحداني..!
ابواب مقفله .. ودروب مجهوله
واذا تبي كل حاجه .. لازم تعاني
كلام ابقوله .. لكن مقدر اقوله
اشياء في خاطري توقف على لساني
غلطه .. ومن صاحبي .. واقول مقبوله
مره علشانه .. ومره علشاني
والمشكله لو تطول شوي .. محلوله
عشان مايشمت القاصي .. ولا الداني
تكفون وانتم اليا جيتوه .. قولوله
اني اعزه .. كثر معزة إخواني
معقوله ينساني لا ماهي بمعقوله
حتى الشعر وقتها ماراح ينساني
فلة حجاج .. وقصيد .. وصوله وجوله
يعني متى ماتذكر شي .. يلقاني
ماشلت هم الشكوك الدايره حوله
ولا الخوي لاتردى .. قلت: يفداني
مرات احس اني حاكم .. تنقصه دوله
ومرات مدري من اللي ينقص الثاني