انا قولت افتح موضوع لمدارس الاسكندريه يمكن الاقى حد يرد على
وحابتدى بنفسى انا اول مدرسه رحت سالت فيها كانت سموحه للغات بس لاقيت مبانيها قديمه وكمان ضيقه هم قالو انهم حيوضبوها فى الصيف لكن الله اعلم
وبالنسبه للسن هى بتاخد 3سنوات ونص لل kg1
انا فى انتظار تفاعلكم معايا
ياترى الاداره هناك سهل التعامل معاها ولا لا وياريت تقولى لى هم بياخدو كام سنه لل kg1
ما فيش اى تفاعل ليه تزعلونى كده كل دى مشاهدات وما فيش غير رد من اثنين فقط هى مدرسه ليدرز اللى فى القاهره اخبارها ايه وهل ليها فرع عندنا فى الاسكندريه
انا كل ما اسال حد فى الاسكندريه عن مدرسه ليدرز يقولى ما يعرفش عنها حاجه وانا عايزه اطمن على المستوى التعليمى فيها يعنى حد يكون مجربها ويفدنى
انا دورت على موقع لها على النت وما لاقيت ياريت اللى تعرف حاجه تقواى وجزاكم الله كل خير
بصى مدرسة ليدرز انا كتبت فيها c.v لابنى بس لسه مقررناش لان محدش يعرف عنها حاجة بس قاعدنا مع مديرتها وقالت ان المدرسة دى اول سنة ليها ومعظمها طلاب محوليين بس بتاخد من 3 ونصف وبتقول انها بتهتم بنطق الاطفال للغة وبياخدوا الفرنساوى من kg 2 وفيها حصص قرآن بالتجويد وفيها السنه دى kg1 مصاريفها 6000
بس هى فى المندرة فى نفس الشارع اللى فيى الفيوتشر وانا ساكنة فى سموحة المديرة قالتلى هينزل ابنى من 7 ونصف وهيرجع 4 بذمتك مش كتيير على طفل عنده 4 سنين … قوليلى رأيك
ولو عايزه الى معلومه عن اى مدرسة انا موجوده انا لفيت اسكندرية كلها انا بدور من اول شهر يناير ……. اسألى وانا هساعدك انتى تأمرى
مدارس النصر بتاخد من 4 سنوات بالضبط رحت سألت التقديم فى شهر 5 او 7 مش فاكرة
بس عارفة لو عندك واسطة الواحد يفوت فى الحديد انا واسطتى ربنا
بس للامانه كل الناس مش بتشكر فيها بتقول ان مستواها فى النازل قابلت ام نقلت ابنها من النصر الى محمد كريم عشان فتحوا فيها قسم للغات
رحت محمد كريم بتاخد من 4 برضوا وللامانة مستواها مش كويس بالنسبة لمدارس اللغات التانية
بس الناس تعمل اية مصاريفها حنينه بس انا شلتها من تفكيري
المدارس الكويسه اما غاليه قوىى او بعيده قوىىى
واللى سعره حنين نص نص فى كل حاجه وهو ده اللى مطير النوم من عينى