ازيكم يا حلوين , عاملين ايييه؟؟؟
اليوم سوف أبدأ معكم حوار طويل شوية " معلهش استحملونى"
أول امس , نزلت السوق , عادى زى كل مرة , و السوق بتاعنا كله خضار و فاكهة طازة و الفلاحين يمين و شمال بينادوا على البضائع و كل واحد بيبيع العادى طماطم , كوسة , خضرة , فاكهة الصيف , كله عادى عادى!!!!
لفت انتباهى فى ركن من الأركان واحدة فلاحة بتبيع القرع العسلى أو عند البعض يسمى اليقطين و الناس رايحة جاية و هى مش بتبيع ؟؟؟؟ قلت طيب يا شوشو اشترى قرع و فكرى بعدين فى ال Menu و فعلا اشتريت و الست انبسطت و أنا اتدبست القرع تقيل فهل من مغيث ؟؟؟
المهم وصلت البيت بالسلامة و دماغى بيشتغل هعمل بيه اييييه ؟؟؟ اشتغلت الفهامة و قررت ما هو اتى:
هعمل صنفين فى الاطباق الرئيسية
و كيك و مافنز و تارت او باى اليقطين و ايه تانى؟؟؟؟ سلطة ممكن!!
هعمل خبز القرع العسلى, و كمان ice cream و كمان عصير و مخلل!!!! لأ و ايه تسالى كمان؟؟
و فعلا بقالى يومين و نص غرقانة فى القرع و دلوقتى خلصت و بدأت أكتب مذكراتى مع القرع !!
أرجو منكم ان تتابعوا الملف لأنى بذلت فيه مجهود كبير ,, كمان عايزة اللى دخل و استفاد من الموضوع يكتب لى تعليق او نقد بناء و أرحب دايما بالاسئلة و طبعا الموضوعات هتبقى متوزعة على حسب نوع الطبق ….
طبعا كلنا عارفين الفوائد الصحية العديدة و التى لا تحصى للقرع و رغم كده أرى انه لم يستفاد منه حتى الأن الاستفادة القصوى فى المطبخ العربى لييييه ؟؟؟ معرفش رغم انه من الأولى ان نبتكر له عدة طرق للطهى و نقتله بحثا و طبخا فاليقطين ذكر فى القران كّذلك اوصى به الرسول عليه الصلاة و السلام .
نحاول مع بعض نستكشفه من جديد و ندخله مطابخنا فهو حقا رائع!!!!!!
قبل كل شئ لا بد من تحضيره قبل الاستخدام و بالتحضير خطوات بسيطة سوف اشرحها لكم بالصور و التفصيل الممل و بعد كده أبدا أنزل الوصفات:
يجب حسن اختيار ثمرة اليقطين , انا افضل المستديرة الشكل مش عارفة لييه؟
url=http://www.0zz0.com]
[/url]
المهم حميتهم يعنى غسلتهم كويس اوى وبعدين اخترت واحدة حلوة و سميت
وقطعتها نصفين:
و ده كان شكلها من جوه !!! سبحان الله !! مش اول مرة اشوفه بس الحاجة الجميلة فى خلق الله انك كل يوم تندهش من بديع صنعه. بالملعقة افرغت الالياف و البذر وو ضعتهم بوعاء فيه ماء و بدأت التقطيع :" أقصد بدأنا التقطيع اتنين , تلاتة مش قادرين عليها!!! يا ستار يا رب !!! بس ايه انا وراكى و الزمن طوييييل!!!!
سخنت الفرن على درجة حرارة 250 و وضعته فى الصاج على ورق القصدير او الفويل و بعد ما بدأ يسخن الفرن دخلته.
قعد شوية كتييير
خلاص اتشوى , قشرته و ووضعته فى مصفاة حتى تنزل منه كل السوائل اللى فيه و المرحلة دى مهمة اوى اوى .
طيب عملت ايه بعد كده بالألياف بتاعته و اللب و القلب بتاعه اللى اتشوى ؟؟؟؟ عملت عمااااااايل انتظرونى غدا, ابحثوا عنى فى كل الاقسام فيه عصير فى مخلل فى كيك فيه خبز فى طبق رئيسى فى ايس كريم كل الخيرات ميعادنا بكره ان شاء الله
ازيكم يا بنات ,,,,,
علشان تقدروا تتابعونى لازم تشوفوا انا حضرت القرع العسلى ازاى فى ركن الحلويات!!
ندخل فى الموضوع و انا بحضر القرع و اطلع الأياف و اللب , قمت بتذوق الأياف فوجدت طعمها جميييل جدا و مليئة بالعصير يعنى مقدرش اقول انها ألياف لأ دى شرايين القرع العسلى و أوردته و مليااااانة عصير, كمان لونها يجنن !!!!!
حطيتها فى الخلاط و ضربته و لا أسهل من كده مع ليمونة كاملة و سكر حسب الرغبة و فى الاخر أضفت نقطتين ماء زهر البوصفير , يعنى طبيييييعى مش تقليد و لا اسانس و لا حاجة من دى و صفيته و حصلت على احلى عصير ,, لأ و ايه نزلت لجارتى و عملت بينها و بين جوزها مسابقة تذوق علشان نشوف مين هيعرف ده عصير ايه الأول بس هى طلعت أروبة "مصرية أوى " و عرفته ,, معاكم بقه الصور بتاعة الخطوات و قولولى رأيكم و تابعوا معايا مهرجان القرع العسلى فى كل ابواب المطبخ هتلاقوا مفاجات كتيرة!!!!!!
فى الخلاط.
بصفيه و بعصر عليه ليمونة.
و ده شكله النهائى !!!! لذييييذ و يا ريت تجربوه.
اه كنت هنسى تعالوا شوفوا عملت ايه فى اللب ؟؟؟؟
حطيت عليه ملح بعد ما غسلته و دخلته الفرن مع القرع و هو بيتشوى , اتحمص و طعمه كان لذيييذ اوى و عملت بيه حاجة تانية هتشوفوها فى المخبوزات ان شاء الله , يالا نشوف الصور , على فكرة طعمه احلى من اللب الابيض بتاع مرسى مطروح المشهور!!!!
و الصورة التانية تنزل من فضلك:
يالااااااا اتفضلوا قزقزوا و بالهنا و الشفا. بس مش عايزة اشوف قشرة فى الأرض, أنا القرع قطم وسطى و مش ناقصة كمان انضف .
تابعوا ملف القرع العسلى أو اليقطين غدا و بعد غد ان شاء الله.
بيتعمل منو طبق مقبلات وهو المتبل مع التوم والطحينه وكمان انا بعمل منو مربي روعة وسكونز القرع لا يعلي عليه ىبس اكيد من يدك احلي
منتظرييييييييينك يا قمر
واللب يا جماله
تسلم ايدك يا احلى شوشو
انا باضيف رشة بودرة توم قبل التحميص بتدي نكهة شكل تاني..
اما العصير صراحة اول مرة اعرف ان ممكن يتعمل من القرع العسلي مشروب
ومنك نستفيد يا شوشو
سلمت يمناك
ورمضان كريم
تسلم إيديك وعينيك .. وربنا يعطيك ألف عافية.. وربنا بخليلك القمرين اللي في الصورة وتفرحي فيهم ..