ان شاء الله تكونوا بخير والحقيقه عندي مشكله مع البان كيك وهي اني لما بدي اقلبها بتشر وبتنقط وبيتلخبط شكلها
مع العلم ان الوصفه اللي عندي كتير طيبه وقوامها اسفنجي ومرن وخفيف وما عليه غبار بس الشكل يعني عم يطلع مش ولا بد فيا ترى هل هناك شيئ سهيت عنه او خدعه ما للتغلب على هذا الإشكال؟؟ انا ادهن المقلايه بطبقه خفيفه زبده وبستنى حتى تستوي من تحت وتظهر الفقاعات لكن اذا استنيت كتير لتتماسك تمام بيصير لونها بني غامق مو حلو او بعباره اخرى بتنحرق؟؟ولأني متلكن جميعا اعشق الكمال واحاول الإقتراب منه ما امكن انتظر بامتنان ارائكم وشكرا لكم مقدما
ثم لما تشوفيها احمرت مثل ما بدك من الأسفل استخدمي ملعقة مسطحة كبيرة وبخفة يد اقلبيها.
المسألة فقط محتاجة لتعود لكسب المهارة، وما تخلي كمية كبيرة من القطع في نفس المقلاة حتى تتحكمي بكل واحدة بوحدها عند قلبها.
أهم شيء انتبهي للحرارة، فالحرارة العالية بتخليها تحمر بسرعة بلا نضوج، لازم حرارة متوسطة إلى عالية، يعني أنا عندي النار بالأرقام، 1 إلى 10، 5 متوسطة، بحطها على 7 وبترك المقلاة الخاصة بالبانكيك تحمى تمام، بعدين برش رشة زيت قناني لأنه خفيف وفوراً بما أنه حامي بصب الخليط. بينضج هيك على نار معتدلة وبهدوء.
وما تنسي البيض، فهو أهم شيء للتماسك.
انا فعلا كنت اعمل متل ما عم تقولي يعني الحراره والملعقه المسطحه والوصفه فيها بيضه واللي لفت نظري هو اختلاف واحد عن طريقتك وهو الزيت ,انت بتدهني بزيت وانا بزبده مسيحه وقلت اكيد هدا هو ,بتعرفي انا كنت ادهن بزبده قلت منو بتطلع اطيب ومنو بوفر سعرات بعدم اضافة زبده مع السيروب بعدين,المهم عملتها مبارح ودهنت المقلايه زيت , وطلع فعلا شكلها حلوووووووظريف , السر فعلا بالزيت, يبدو انو بيحمى وبيعزل بشكل افضل من الزبده ..الأولاد علقوا انو غريب طالعين حلوين هالمره الله وكيلك جيل ما بيرحم. شكرا مره تانيه ايمان وان شاء الله بردلك ياها بالأفراح يا رب.
ملاحظه بتعرفي قريت في الموقع اللي اخدت منه وصفتي اللي هو توب سيكريت ريسيبيز واحده قالت انها بتضيف نصف ملعقه صغيره نكهة اللوزللعجينه وبتطلع الذ وفعلا جربت واعطت طعمه من الذ ما يكون خاصة مع السيروب..جربوها وما بتندموا وشكرا ايمان مره تانيه
لا جد بتطلع دوائر وحلوة بعد وانا بجيب الخلطة جاهزة وبحطها على الساج الي منسوي فيه الهامبرجر وعل نار متوسطة بس قلتي انو بشرشر انا خطر لي انو ما عمينضج من السطح اولا لازم يتكون فقاعات وتنفقع وبعدين تقلبينها لا تستعجلين بالقلبة ولا تعملي دوائر كبيرة يعني ممكن معلة ونص تكلع منيحة
عموما انحلت المشكلة بالزيت عندك لكن باقي تقوليلنا عن وصفتيك لاني ما بعملها انا باليت ممكن لو ما في مانع تقوليلنا الوصفة?????
بالنسبه للوصفه تبعي متل ما قلت اخدتها من موقع top secret recipes وفعلا ظريفه جدا جدا اسفنجيه وخفيفه وكما قلت واحده علقت انها بتحط نصف ملعقة نكهة اللوز مع المقادير وبتطلع بالفعل لذيييذه جدا
اليك المقادير
1 و1/4 كاسة طحين
بيضه
1/4 كاسة سكر
1 و1/4 كاسة بترميلك اللي هو الحليب المخضوض او اللبن اللي بينشرب متل لبن المراعي او غيره ولما ما يكون عندي بحط نصف الكميه زبادي ونصفها حليب بيمشي الحال
ملعقه صغيره ملياااانه بيكنج باودر
ملعقه صغيره ملياااانه بيكنج صودا
1/4 كاسة زيت
بخة ملح
نخلط المقادير الجافه ثم نضيف السائله بالتتابع حتى يتجانس الخليط تماما بيطلع العجين سائل بس مو مايع كتير مع ذلك
ان شاء الله بتعجبك وبالهناء والشفاء
وفي اقرب فرصة لازم اجرب الوصفة
وكنت بدور على دونات كمان يكون اسفنجي لو وجدتيه لا تبخلين عليا وخاصة الانكلش عندي مو زيادة
مشكورة كمان مرة
بالنسبه للدوناتس انا جربت طريقة ام مودي ما شاء الله حولها معلمه , وكانت طيبه كتير وهي الرابط جربيها ان شاء الله بتعجبك ..
كريسبي كريمي دونتس..مع صلصة التغطية…رووعة زي الجاهز..كمان عمسؤوليتي
وما حاولت دور على غيرها لأنها طيبه وظريفه, يللا يا بدور صار عند شغل كتير بأه اعملي همه..
وهذه مقلاة توضع على النار :
حلوة يا ديم هالمقلاة، أنا عندي المفردة، شريتها تقليد فطلعت مش نافعة!!
لكن هذه عجبتني كثير، مع أني بستخدم الجريدل المربع التيفال وهو ممتاز في عمل بانكيك بنفس الحرارة وبنفس الشكل.. شهيتوني على هالليل 