كيف حالكم اليوم أن شاء الله بخير أنا رجعتلكم ومعايا وصفه حلوه ومعروفه عندنا الليبين من زمان وهي من انواع الحلويات الزمنيه الي تعلمناها من جداتنا الله يرحمهم يارب وحلونا اليوم هو الكعك الناعم وهو يختلف عن المعمول
وزي مافي عندنا الليبين كعك شاهي وكعك مالح عندنا كعك ناعم ويارب تعجبكم
الوصفه وطبقوها وأخواتي الليبيات ياريت تذكروها وطبقوها بي حدافيرها لأنه والله
مافي أحلى من الوصفات الزمنيه فايحه وصنه وبنه زي مايقولو هي حق فيها تعب لكن تلقي الحاجه تفحفح في الحوش كله وبنتها خيال
توه نخشو في التفاصيل أول حاجه مقادير العجينه:-
كيلو دقيق_كوب سمن سايح وسخون_نصف كوب زيت_(طبعا حبيباتي السمن وزيادة الزيت هو الي يخلي الكعك ناعم وخفيف)
ونصف كوب ماء عطر_ ولكل كيلو دقيق ملعقه صغيره خميره (مدوبه في ماء دافئ مع شوية سكر)
ورشة ملح_وفانيليا _ وملعقه كبيره بيكنغ بودر_ملعقة قرفه_جلجلان حسب الرغبه يعني من نصف كوب الي كوب.
الحشوه:-
حلقوم (الملبن).
الطريقه:-
الخطوه الاولى: نأخد الدقيق ومعاه رشة ملح ومع بيكنغ بودر والفانيليا والقرفه ونخلطهم مع بعض (يعني نخلط النواشف)
الخطوه الثانيه:نعمل حفره في وسط الدقيق ونضع فيها الجلجلان.
الخطوه الثالته: ندوب السمن على النار ونخليه ساخن وبسرعه نصبه فوق الجلجلان حتى تلاحظي الجلجلان فار وزي الي يغلي وبعدين نحط معاه الزيت
ونبدأ نحركو لكن مش بي أيدك لأنه سخن حركي بي ملعقة خشب
الخطوه الرابعه: نبدأ نخلط بي أيدينا نفرك فرك حت يصبح الخليط مثل الغريبه وبعدها
نضيف الخميره ونعجن بطريقة الفرك حتى يمتزج الخليط وبعدها نضيف نصف كوب ماء العطر ونعجن مره تانيه
هذا شكل الخميره بعد مادوبتها
والعجينه تكون لينه وطريه وملاحظه( الغرض من أستخدام الخميره للنكه فقط وليس للتخمير يعني مجرد ما نكمل عجن نبدأ في التشكيل مباشره وكل ما نأخد قطعة عجينه نسبكها في أيدينا وندلكها لأن العجينه تصبح متماسكه قليلا بعد وقت فنقوم بي تلينها بيدنا)
المرحله الاخيره :- التشكيل نأخد قطعه من العجينه ونكورها ونضع بي داخلها الحلقوم ونغلقها جيدا ونقوم بنقشها بي (المنقاش)
وبعدها نصفها في صنية ونضعها في الفرن مباشره حتى لاتختمر ويكون الفرن مسخن قبلها بي وقت والنار الفرن من تحت فقط وعندما يحمر من تحت نطفئ ونشعل الفرن من الاعلى لتحمير
وهذا شكلهم بعد ماطلعتهم من الفرن
والان نشوفو الشكل النهائي بعد مارشينه عليه السكر الناعم يلا شوفو وأحكمو
يلا مني تجي وتشرب معايا فنجال قهيوه عربيه وذوق أحلى كعك ناعم
أن شاء الله يكون عجبكم طبعا يا بنات الي طيبة الكعك ماما وانا كبست عليها وصورتها وهي دير فيه قلت لازم أخلي أخواتي يعرفو طريقة هذا الكعك الناعم
وياريت تجربوه وتعطوني رايكم والله يا بنات طعمته خيال ومميزه وأتحدى أنه راح ينبهرو بيه كل ضيوفكم ويسألوكم عن سر النكهه
ويابنات حبيت أقدم شكر خاص لي أختي لايت دريم على مساعدتها لي في تكبير الصور وتحميلهم مشكوررررررررررررررررررره حبيبتي وربي يخليك ليا يارب
ايه الحاجات الحلوه دى
سلمت يداكى
بسم الله ماشالله يا هنوا والله شكله حلوا ويسهف انا نحبه باس الحق ماعمرى جربته نخاف يفشل منى
باس توا خزنته وحا نجربه انشاله
تسلم ايديكى وايدين ماما اللى عملتها
كتبت بواسطة roina 
ايه الحاجات الحلوه دى
سلمت يداكى
أنتي الي حلوه يا حلو ياعسل
كتبت بواسطة نسمه الليل بسم الله ماشالله يا هنوا والله شكله حلوا ويسهف انا نحبه باس الحق ماعمرى جربته نخاف يفشل منى
باس توا خزنته وحا نجربه انشاله
تسلم ايديكى وايدين ماما اللى عملتها
هلا حبيبتي والله طعمته حلوه ولازم تجربيه وأن شاء الله يطلع معاك حلو ولازم تورينا التطبيق
كتبت بواسطة حبيبة48 تسلمي يارب ومشكوره على مرورك
ربي يهنيك يارب
كتبت بواسطة wbaby ربي يهنيك يارب
ويهنيك يارب مشكوره حبيبتي
الله يعطيكي العافية