السلام عليكم ورحمة الله وبركاته
اخواتى الاعزاء هذه اول مشاركة لى فى هذه القسم اللذيذ
واتمنى تنال اعجابكم
واشكر حبيبتى نور الهدى اللى ساعدتنى فى كل شئ يخص الصور
_______________________
النهارده ان شاء الله هاعمل بريانى الدجاج وطبعا البريانى له طرق كتير جدا جدا ولكل منا طريقته مش هطول عليكم
المقادير والطريقة
البـــريانــى
والبهارات
زى ما انتم شايفين ( ورق لورا – فلفل اسود – كركم – قرفة( ولو عيدان يكون افضل ) ينسون حب – قرنفل او مسمار- حبهان – لومى- بهارات مشكله )
اول خطوه نخلط الزبادى بالكركم والفلفل الاسود وننقع فيه الفراخ اربع سعات تقريبا
بعدها نخرط البصل ونشوحه فى شويه سمن بعدها نضع الثوم والجنزبيل المفروم مع بعضة على البصل
بعدها بقليل نضع البهارت كلها دفعة واحده ونقلب
بعدها نضع الطماطم المقطعة مكعبات و3 ملاعق صلصة ومكعبين مرقة الدجاج ونقلب الخليط كله للحظات بعدها نضع الفراخ بخليط الزبادى مع كوب ماء ليساعد على النضج وانا ماضافتش ملح خالص عشان مرقه الدجاج كانت مالحة
بعد كده نضييف حبه البطاطس مقطعة قطع كبيرة ودى اضافه من عندى عشان بنتى الصغنونه لكن ممكن تستغنى عنها زى ما تحبى
بعد كده نترك الخليط عشان يستوى ونيجى بقى نعمل الصلصة بتاعة البريانى
وزى ما هو واضح فى الصوره المكونات
بصل- ثوم – طماطم – فلفل رومى – نعناع اخضر – لمون- ملح – شطة – كمون ومعلش نسيت اصور شوية خل
نحط كل ده فى الكبه ونخلطهم بتبقى حارة طبعا ولذيذه قوى مع البريانى او الكبسة او المندى وبتكون احلى واحلى لما الطماطم تكون حمرا اليومين دول الطماطم نص نص
خلصنا الصلصة نرجع للبريانى الفراخ تكون استوت انا عن نفسى بنشلها من الحله وبحطها فى صنيه فى الفرن عشان تتحمر
وبعدين ناخذ 2 كوب رز بسمتى نسلقهم فى مايه وقطعة زبده مع شويه ملح وحبهان وقرنفل
ولما يقرب الرز على السوى نصفيه على طول ونتخلص من المايه الزايده
وناخد نص مقدار الرز ونقلبه فى صوص البريانى اللى فى الحله زى كده
بعدها نصب النص التانى من الرز ونعمل فيه خروم بالمعلقة وندوب معلقة زعفران فى شويه مايه ونصب فى الخروم دى بالمعلقة زى كده
بعدها نغطى الحله ونسيب الرز يكمل تسويته وبعد مايستوى نرص عليه الفراغ ونضيف زبيب او مكسرات حسب الرغبه والشكل النهائى بيكون كده ويارب يعجبكم
بدايه قويه وموفقه باذن الله
بس بجد طبق تحفه
وإضافتك للبطاطس عجبتنى عشان بنتى الصغيره
ربنا يبارك فيكى يا عسل
إن شاء الله نشوف أطباق تانيه كتير
إن شاء الله نباركلك على التميز قريب
بجد بجد يستاهل التميز
والاكله شكلها مغرى ان الواحد يجربها
ويارب اكون اول د عشان اخد الطبق ده لوحدى
تسلم ايديك
والله شكله يجنن
الله يعطيك العافية
ان شاء الله اجرب طريقتك
بالهنا والشفا عليكم
وصفة جميلة ورائعة
تسلم الايادى الجميلة
ماشاء الله عليكى شطوره وست بيت
ونا مبسوطه ان اول مشاركاتك تكون طبق صعب زى البريانى
لان كتير مش بيعرفوا يظبطوه وأولهم نور الهدى ههههههههههه
انتظرى تطبيقى حبيبه قلبى واحنا حننتظر باقى اكلاتك
وعاوزين فى كل قسم يكون ليكى بصمه
وتنورينا دايما
تسلم الايادي "حبيبه"
نورتي الركن ومنتظرين ابداعاتك دايما …،،،