إلي محتارة اش تطبخ ولا طفشت من الأكل المعتاد عندي طبخة جديدة وطعمة مررررررة وقد سويتها كم مرة وكل محد يدوقها ياخد الوصفى فحبيت أحطلكم هي وانشاء الله تعجبكم
يلا بسم الله نبدأالمقادير
هادي الأكلة مكرونة وبالأصح زي الكنا لولي إذا تعرفوها
المقادير :.
مكرونة لازانيا متوطة الحجم أو المكرونة الملفوفة المفرغة من جوة بس تكون كبيرة شوية (لأنو حنحشي المكرونة ) والعدد قد ما تيغي
تاني شي جزر وبطاطس مقطعة مكعبات صغيرة مرة وبرضو الكمية قد الي تبغي بس يكفي لعدد المكرونة
ولحم مفروم
جبنة مزرلا
كريمة خفق أو اسمها فرش كريم
وبس خلصت المقادير
دحين الطريقة :.
تسلقي البطاطس والجزر نص سلقة لا تخليها قاسية ولا مرة مستوية
وتحطي المفروم عالنار إلين ما يستوي
وتسلقي المكرونة في صينية مع شوية زيت عشان لاتلصق
بعد ما يستو كلهم
تجيبي المفروم والجزر والبطاطس وتخلطيهم وتحطي شوية جبنة مزرلا معاهم (عشان لمن تاكلي تمط )
وتبدأي تحشي المكرونة بالخلطة دي وإذا كانت مكرونتك زي الازانيا تحطي الحشوة في الطرف وتلفي المكرونة هي حتتكبكب عليك شوية من الخلطة لكن أرجعي عبيها وهي أطعم لمن تكون مليانة
بعد ما تحشي كل المكرونات ترصيها في الصينية
يووووووووووو صح نسيت أقلكم على الصلصة
يلا مقادير الصلصة مع الطريقة
2أو 3 طمطمايت معصورة تحطيها على النار مع شوية ملح وفلفل وقد ما تبغي من الصلصة وماجي مكعب وتحطي شوية موية ولمن تستوي تصبيها في الصينية على المكرونة
وتدخليها الفرن شوية ولمن تخرجيها
تكوني أخت كوب ونص من الفرش كريم وحميتيها او حطيها عالنار شوية
بعد كدا تصبي الفرش كريم على المكرونة وتدخليها الفرن شويتيين وبعد ما تقرب تستوي أو تنشف الكريمة شوية رشي عليها الجبنة المازرلا وخليها تتحمر شوية
وبالهنا والشفا
انشاء الله تجربوها وتعجبكم ترا والله ماراح تندمو (اشبكم أنا إلي مديتكم الوصفة ) فيعني أكيد حتعجبكم وقولولي اش رأيكم فيها لو جربتوها
وأي سؤال أو استفسار أن امستعدة 
راح اسويها اليوم