بسم الله بدينا وعلى نبينا صلينا .. ياعيايز المستقبل العيش عرفنا شلون نغسله ونقعه ماله داعي اعيد وازيد زادكم ربي من حسناته ..طبعا الزبيدي مشقوق من الظهر عشان نحشي بطنه ونغسله زين اكثر من مره وبعدين نحطله كركم ونخليه فتره و نقصص البصل صغار ونفرم الكزبر وندق فصين ثوم .. الحين نحط البصل في جدر صغير او مقله ونحركه ومن يتلزق نرش عليه شوية ماي لما يقلب لونه يعني يصوفر هني نحط الكزبر ونحمسه معاه ونحط اللومي الاسود الناعم و الفلفل الاسود وفوقهم قفشة دهن ونحمس لمدة عشر دقايق .. ولما يخلص نخلي الحشو على كتر.. والحين نغسل السمج مره ثانيهونرش عليه شوية لومي اسود ناعم وفلفل اسود ناعم وهيل ناعم وقبلها فركوا بطنه بالثوم ونحشي بطنه بالحشو ونربطه بالخيط .. والرباط له طريقتين في ناس تلف الخيط عليه لف وفي ناس تخيط بطنه وعلى هواكم شوفوا الاسهل .. وعقب مانربطه نرش على الزبيدي كركم والحين نحط مقله ونقلي الزبيدي شوي بس يعني نشممه الدهن ونشيله على كتر وقبلها نكون مزهبين الجدر وحاطين فيه شوية دهن يعني قفشتين وفوقهم لومي سحاري وكمونوملح قفشتين وكاري وكزبر ناعم وفلفل اسود وطبعا كمية البهار تكون قليله وبعدين نحط الزبيدي ونحط فوقه ماي ونخلي الماي هبابه يغطي الزبيدي ومن يقلب الماي ناخذ العيش ونزل مايه ونحطه شوي شوي على الزبيدي وهو يقلب نحاول بالملاس شوي شوي نحرك الزبيدي عشان يصعد فوق العيش .. مو تخورونه وتخبصون السالفه ترى والله بتحصلون طراقات وفناقر من ريايلكم .. اي نكمل ومن تشوفين الماي خف ومايبين حطي حديده تحت الجدر وقصري على النار .. اي هني يبدي الحش في ناس يحطون زعفران فوق السمج اللهم ياكافي مادري من وين يايبين هل طريقه ..لا اهل جبله ولا اهل شرق يحطون زعفران فوق السمج ولا حتى اهل المرقاب بس هذي شحاطة حريم .. وقبل منين لنا زعفران؟؟ مانشوفه الا بالحسره ونسمع فيه بس واذا قالوا رحنا بيت فلانه وعندهم زعفران نشرنا الخبر بكل سكه وبكل عاير ..اي ماعلينا من تشيحط حريم الكويت نكمل ترى طبختنا خلصت والحين وقت النجاب .. اذا نجبتي العيش تشيلين الخيط من الزبيدي وتاخذين من الحشو وتزينين فيه القنجه ولاتنسين دهن العداني ترى مهم مع المطبق ادري فيناس تقول موزين وفي ناس تقول كثروا منه ولا تحطون دهن مرت ابو .. انا عندي لكم طريقه للعداني ماتضر .. شوفوا يابنات قريح تاخذين طويسه وتحطين فيها عداني وتشيلين غطاتها وتحطينهم بالجدر وهو يتسكر بجذي الالك اخذ ريحة العداني من غير لا تحطين عليه شي.. شفتوا شلون امكم العوده دندره ذكيه؟؟ طلعوا علي مالت عليكم حتى مالت وعليكم بالعافيه
وهذا المطبق وسوينا وطبعا هذي طريقة جميع انواع السمج .. الزبيدي والشيم ماكول الحشيم والبالول والشعم وغيره بس الكويتين يحبون الزبيدي مادري ليش ( زبيدي حق وليدي) هذي بعضكم راح يفهمها بس
😛
طبعا حافظين شنو تحطون من خضره وغيره مع الاكل مثل الدقوس والاجار والمعبوج
وعقب ماتاكلين وتخلصين وريلج يترس كرشته ويشبع هني روحيله وقولي اي يابوعيالي شرايج بالطبخه شفت شلون مريتك طباخه .. راح يقولج الله يقويج الحقيقه طبخه عجيبه وريحتها خنينه .. عاد هني استغلي الوضع وطلبي اللي تبينه لان راح يكون خدران وصاير اثول ومندمغ
مع تحيات امكم العوده دندره
ممنوع وضع الايميل
وكل عام وأنت بخير
بس أنا كان نفسى جدا فى الوصفة لكن للأسف اللغة صعبة عليه
لكن أكيد بتطلع من أيديك روعة
تسلمى .