السلام عليكم ورحمة الله تعالى وبركاته
بسم الله الرحمن الرحيم
كيفكن حبيباتي
إن شاء الله صباح الخيرات والمسرات على قلوبكم وقلوب أحبتكم
بتصدقوا أن هالطبق كان بدي قدمه قبل أن ألد ابنتي بشرى الخير
والصور كانت موجودة وسبحان الله لليوم حتى تيسر لي وضعها
وطبعاً جددت الصور وصورت الشاكرية من جديد
مشان ما تقولوا الصور بايتة من زمان ههههههههههه
هالأكلة حبيباتي كتير طيبة وسهلة
بصراحة شخصياً أحب هذه الأكلة
ولو بتصدقوا أني شفت كتير أمي عم تطبخها ولا تذكرت أبداً بعد ما تزوجت كيف طبخها
ولما كنت بالسعودية كنا معزومين لعند جماعة في بللسمر منذ 5 سنوات
ودخلت مع صاحبة البيت للمطبخ لأساعدها وسبحان الله قامت بطبخ الشاكرية
وبنفس الوقت تذكرت كيف كانت أمي تطبخها
ومن وقتها بطبخ هالأكلة كل فترة والحمد لله بتطلع مثل طبخة أمي إلا ربع
لأنو طبعاً ما في أطيب من طبخ الأم لأولادها
وما بيطلع لنا مع الأمهات ربنا يخليلنا إياهم ويطول عمرهم بالخير والبركة
هالأكلة رائعة جداً لو تم تقديمها بالعزايم
وعنا بالشام بيعملوها لما يقوم أحدهم بذبح خروف ما كأضحية أو عقيقة
فما شاء الله من كثرة اللحم عند الذبح وعدم وجود مكان له بالبراد فيقومون بعمل هالأكلة
وعزيمة كل الأقارب
الشاكرية
المقادير:
هالمقادير تكفي عائلة مثل عائلتي نجمتين ونصف هههههههه
كيلو لحمة موزات مقطعة قطع متوسطة
4 حبات بصل متوسطة مقشرة ومقطعة لشرائح
زيت نباتي
ملح – بهارات (حسب الرغبة)
نصف كيلو لبن زبادي
ثلاث ملاعق نشاء مذوبة في كأس ماء
الطريقة:
نقوم بتقلية البصل مع الزيت النباتي والملح
قبل أن يستوي البصل بقليل نضع اللحمة ونقلبها مع البصل
حتى تفقد لونها الأحمر تماماً
ثم نضع الماء فوقها حوالي 4 كاسات ماء ونتركها حتى تستوي
يمكنك إضافة البهارات في هذه المرحلة
بعد أن تستوي نكون قد وضعنا بالخلاط
اللبن مع النشاء المذوب ونخلطهم حتى يتجانسوا ثم نصبهم
ببطء على اللحمة ونحرك باستمرار حتى لا يتكتل النشاء
نستمر بالتحريك حتى يثخن اللبن
اسكبي الطبخة في وعاء التقديم ووزعي اللحمة فيها بالتساوي
زيني الطبق بالمكسرات المحمصة مع الزيت النباتي
وقدميه مع الأرز المصري بالشعيرية
وما تنسوا الفجل والفليفلة الخضراء
وصحتين وعافية
مع تحياتي وحبي لكن أخواتي
أم محمد خير وبشرى الخير
ياسلاااااااااااااااااااااااااااااااااااااااام والله حبيتها وانا ما عمري ذقتها
عاد أنا أموت في أي أكلة فيها شوي حموضة.
عاد أنا أموت في أي أكلة فيها شوي حموضة.
صحتين وعافية يارب
انا بطبخ اللبن اول شي وبعدين بسقط فيه اللحم وشوية مرق
يعني اول مرة بشوف هالطريقة.. ولا مرة خطرتلي حتى.. بخاف اللبن يفرط..
الله يسلم دياتك ويعطيك العافية على هالشاكرية الروعة!
يسلموا ايديكي حبيبتي
صحتين وهنا
وعليكم السلام ورحمة الله وبركاته
ما شاء الله شكلها بيشهي
الله يعطيك الف عافية
واسعدك الله
بس احنا بنحطلها حمص حب بتطلع مممممم
صحة وهنا يارب