بسم الله الرحمن الرحيم , و به نستعين
سلااااااااام يا صبايا و يا حلوين
و هاي : صورة قريبة للمجدرة بورق العنب
أما الطعم شو بدي إحكي ؟؟؟؟
بيجنن , صحيح أنا من عشاق و محبي المجدرة
و لكن هالمجدرة يوم منطبخها , ما بقوم عن الغدا إلا و أنا متخومة , و ما بقى إلا يطلبولي سيارة الإسعاف
بالحقيقة : ما صورت طريقة الطبخ , لإنها سهلة , الكل بيعرفها
عدس أحمر بقشره أو ممكن عدس أبيض بقشره كمان بيمشي حاله
حطيه بالطنجرة مع المي , ليستوي , و كمية المي حسب رغبتك : إذا بدك المجدرة ناشفة , أو فيها شوية مرقة
بس يستوي العدس , حطي كمية من البرغل الخشن ( تقريبآ مساوية للعدس أو أقل بشوي , حسب رغبتك ) , و لازم نحط البرغل بعدين : إذا حطينا البرغل و العدس مع بعض من الأول , العدس ما راح يستوي .
لحد هون : كله عادي بطبخ المجدرة
راح نجيب ورق عنب أو متل مو متعارف عليه تسميته عنا ( ورق عريش ) , لازم يكون الورق طري و صغير ( يعني من روس الطرابين ) , و منشيل العنقزة , و منمزق الورق لأقسام صغيرة
حطينا الورق مع البرغل , و راح نستنى , ليستوي البرغل مع الورق ,
هلأ : لازم نحط : الدهن المستعمل للأكلة و في عدة خيارت :
1. زيت زيتون : سخنيه عالنار , ليحمى , و لكن ديري بالك ما لازم يحمى زيادة , يا دوب : أول ما يحمى , و نزليه لفوق الطنجرة , و بشويش لإنه ( بيطشطش ) .
2. ممكن الأورمة أو القاورما , إذا كنتي بتستعمليها بمطبخك .
3. ممكن نفرم بصلة ناعمة و و نقليها مع شوية زيت عالنار , معها شقف لحمة هبرة
4. ممكن كمان نفرم بصلة جوانح و نقليها بزيت الزيتون , و بس تستوي راح نشيلها , مشان نقدمها فوق المجدرة , و بعدين نزلي هالزيت لفوق المجدرة .
بس نزلنا الزيت : خلي المجدرة تغلي مع الزيت ش خمس دقايق , و اطفي تحتها .
قدميها مع البصل المقلي ,
و ممكن مخلل ,
, ممكن سلطة خضرة ,
و ممكن : شراب تمر هندي مالح ضيفيلوا بصلة مفرومة ناعم و نعنع يابس
أنا شخصيآ بموت بهالأكلة , و كتير بحبها , و بصراحة : مو منتشرة كتير , بس بمنطقتي يلي أنا منها , يعني حتى سكان المناطق المجاورة بييستغربوا لما بيشوفوها , و لكنها كتيير بتعجبهن لما بياكلوا منها
لا تبخلوا عليي بالردود
تقبلوا مني أحلى تحية محملة بعبق من نسائم بردى العليلة
شكل الطبق شهي واول مرة اعرفة
ماشاءالله عليك
ربي يفرجها على اهلنا في سوريا
ويرحم شهداءهم
اول مرة اشوف هيك طبق
اسلوبك جمييل
بارك الله بك
ما شاء الله طبق بشهى
بس مو انتي اللي عملتيه ؟؟ خلص معناها طعمو اكيد خيال
والمجدرة هي حبيبة قلبونا وانا بالبيت بسميها اكلة الطوارئ والازمات ههههههه
اليوم اللي بكون مستعجلة او مو متوفر عندي كامل غراض الطبخ بساويها بنص ساعة بتخلص
يسلم هالديات يارب
طبق ولا أروع
هالطبق جديد علي ما بعرفه ولا سمعت فيه
هيك صار بدي انتظر لو في عمر للموسم الجاي علشان ورق العنب الطري
تسلم دياتك وديات تيتا والماما
وصحتين وعافية
طبق جديد واول مرة اسمع مع ورق العنب
بس مشهي
بارك الله فيك وفي اهل بيتك
والله يفرجها على سوريا عاجلاً ليس آجلاً
بصراحة اول مرة بسمع فيها بس المجدرة بحبها كتير
و ان شاء الله اول ما يطلع عندي ورق العنب رح اطبخها و ادعي لك
و الله باين عليكي ست بيت مرتبة و كل شي ماشاء الله على أصوله الله يبارك له سعيد الحظ
و ريته الف الف صحة و عافية على قلوبكن و تسلم ايديكي الحلوين يا قمر