اليومين دول ما بخرجش من المطبخ تعالوا اقولكم كل يوم عندنا ايه
الشوربه
حمرت شويه لسان عصفور فى سمن لغايه لما لونها بقى بنى وحطيت مكعب ماجى وكوبايه ماء
بحب دايما اعمل الشوربه يومى
جلاش باللحم المفروم
عصجت اللحم المفروم ببصله وجوزه طيب وفلفل اسود وقرن فلفل اخضر وحمرتها لغليه لما اللحم استوت
دهنت صنيه بالسمن وحطيت راق جلاش ودهنته بالفرشاه بالسمن لغايه لما حطيت تقريبا نص الجلاش فرشت اللحم المفروم وحطيت النص الباقى من الجلاش وبينهم سمن برضه قطعتها سمبوكسات 
ودخلتعا فرن حامى جدا لما اتقرمشت جبت كوبايه شوربه عليها نصف كوبايه لبن وطشيتها عليهم وسبتها نصف ساعه وحمرت وشها
باميه
حمرت بصله ونصف راس ثوم وبعدين ضربت 4 طماطم فى الخلاط وحطيتها على الباميه مع قرن فلفل حامى وحطيت على طول الباميه اول ما تاخذ غلوه حطيتها فى طاجن فخار ودخلتها الفرن مع الجلاش وحطيت على وشها حته زبده
سلطه خضراء
العادى بتاع السلطه بس انا حطيت عليها زيتون اسود مخلى بزياده
قطايف بالجنه البيضاء
جبت جبنه فيتا وهرستها وحطيت عليها نعناع ناشف وشويه زيت ضغيرين جدا عشان الجبنه تذوب مع النعناع
حشيت القطايف وحمرتها فى الزيت
الحلو بقى كان كنافه
بكره ميعادنا مع سفره ثانيه
كل سنة وانتى طيبة يا هبة
تسلم ايديكى وعنيكى
اية الحلاوة دى
هو دة اكلنا المصرى والا فلااااااا
ان شاء اللة دة فطارنا بكرة
تسلم ايديكى كمان مرة واللة حاسة انى شامة ريحتة
فى انتظار اكلاتك يا هبة
الله يعطيكي العافية يا هبة و بانتظار المزيد
اليوم كان معزومين عندنا اخوات جوزى واليكم ما طبخته مع انى مش شايفه قدامى
فطايرباللحمه او بالسجق
العجينه
2 كوب دقيق – بيضه – ملح – ربع كوبايه سمن او زيت – عصير ليمونه كبيره – كوبايه لبن
الحشو
زيت – بصله صغيره مفرومه – فصين ثوم – لحمه مفرومه قد ربع كيلو – كوبايه مرقه -ممكن بدل اللحمه ربع كيلو سجق مقطع – معلقتين صلصه – زيتون اسود مقطع
بتحطى كل مكونات العجينه على بعض وتلنيهم كويس اوى لغايه لما تنعم فى ايدك لو احتاجت لبن حطى لها سمن بلاش لا مايه ولا لبن سبيها ترتاح بتاع ساعه عقبال ما تعملى الحشو ويبرد
بنيجى للحشو بقى تحطى بصل وثوم على النار فى شويه الزيت وتقلبى لما ريحتهم تفحفح كده تبليهم وبعدين حطى يا السجق ياللحمه وبعدين ضيفى باقى المكونات وسبيها على النار لما تشرب مايتها خالص وتبرد وممكن تحطى اى نوع جبنه مبشوره عندك انا ما كانش عندى فعملتها من غير
رققى العجينه اوى واقطعيها واحشيها دخليها بقى الفرن وادهنى وشها بصفار بيضه او بملعقه سمن بالفرشاه
عملت بط محمر
عادى يعنى بتسلقى البطه ولما تستوى تطلعيها وتسبيها لما تبرد خالص وبعدين قطعيها وحمريها فى السمن
عملت محشى كوسه
انا اقول محشى الكوسه الفلاحى البلدى بتاعنا
شوفى الرز مالوش معيار بس لو هتجيبى كوسه كل كيلو ونصف ياخذ كوبايتين كبار خلى بالكم الكوسه مابتاخذش حشو كثير زى باقى الخضار
انا بعملها بطريقه تجنن بس ما تستغربوهاش
بقور الكوسه والكوسايه نفسها بحمرها فى سمن بلدى واحطها على جنب بعمل الخلطه انا كنت عامله ثلاثه كيلو محشى مشكل الكوسه كانت تقريبا كيلو فكانت الخلطه عباره عن 3 بصلات كبار وراسين ثوم مدقوقين وكيلو طماطم بس حمرا قوى ومستويه وملعقه صلصه والرز وكثرى بقى من الشبت قوى للمحشى فى ناس تحب الكسبره بس انا جوزى يحب الناشفه مش الخضراء واهلى يحبوا الخضراء فعلى حسبكم انتم
انا مش بسبك المحشى فى بيتى بس التسبيك اظنه سهل طريقتى انى بحط البصل على النار شويه صغيريين اوى يعنى دقيقتين وكله بالسمن وننزله من على النار واضيف كل الخلطه واعملها كلها فى بعضهاكده وانتم يا تحطوا زيت يا سمن لكن فى الحالتين بتجيبى معلقه سمن على النار وتقدحيها كويس اوى وتكبيها على الخلطه دى الى هتعمل ريحه المحشى جربوا الخطوه دى وادعوا لى.
بالنسبه بقى لمحشى الكوسه لازم يتبل كويس اوى لان الكوسه عادمه بنحطلها لوحدها مكعبين ماجى والبهار الى نفسك فيه انا بكثر الفلفل الاسود وساعات بحط جوزه طيب لو جوزى مش نازل بليل (شريره انا)
هنيجى بقى فى حله ونرص المحشى بس اهم حاجه نرصهم بحيت الوسط يبقى فاضى فى النص بقى حطى لحم مفرومه معصجه ببصله نيه اعمليها صوابع ورصصيها تقوم تطبخ مع الكوسه وتدى طعم حلو اوى
وقلب الكوسه عملته سلطه
وباقى الاكل هقولكم عليه بكره احسن مش قادره اقيم دهرى
نوشا وام مودى يارب ما اتحرم منكم ابدا
واقول لكم بقى على النهارده وبقيه امبارح
صنيه بطاطس
جبت كيلو بطاطس قطعته ثخين وجبت بصلتين كبار قطعتهم اهله ونص راس ثوم قطعته شرائح ودعكت البصل بالملح وسبته شويه لما طلع ميته حطيت عليه شويه كمون وشرائح طماطم وفلفل اخضر وشوربه ماجى وملعقتين سمن بلدى وملعقتين صلصه
وحطيت البطاطس ومايه بتغلى
ودخلت الصينيه الفرن متغطيه
عملت سلطه حمص
قطعت بصله صغيره حتت وحطيت عليها الملح وخلطتها بلبن رايب وبعدين قطعت عليهم بقدونس وحطيت الحمص مسلوق وسيبتها بتاع 5 ساعات فى الثلاجه
عملت كمان النهارده فراخ بالكسبره الخضراء
جبت حزمه كسبره خضراء وقطعتها حتت صغيره اوى وحطيت عليها لبن رايب وشرايح ثوم ونقعت الفراخ فيها وبعدين حطيتها فى البايركس وحطيت حته سمن صغيره اوى ودخلتها الفرن
ياترى اكلى حلو؟
متابعينك اول بأول وفي انتظار جديدك يومياً 
يعطيكِ العافية
اكل مصري 100%
بس ليا تعليق بسيط
لية تقطعى البط و تحمرية فى السمن ,,,,اعتقد انك لما تسيبية من غير تقطيع يكون شكلة اجمل و خاصة فى العازئم
و كمان لو عايزاة محمر ممكن تدهنى على وجهة عصير طماطم و تدخلية الفرن
كدة بيكون اخف على المعدة و كمان طعمة بيفضل لذيذ طعم البط البلدى فية
اسفة على الاطالة وفقك اللة
و فى انتظار مائدك اليومية السلام عليكم
متشكره يا بنات على تعليقاتكم الحلوه اوى وريتها لاختى النهارده عشان تفرح بيا كده وانا بعمل اكل على النت
حاضر يا شروق انا هحط لك محشى الكرنب من غير ما اكون عملته من عنيا اامرى امر
بالنسبه لتقطيع البط يا منى انا بعمل كده لما يبقى عندى عزومات عشان ما اقفش اقطع البطه بايدى كمان بصراحه بيبقى اوفر عشان اشيل الحتت الى مش بتتحط فى العزومه واسلقها فى يوم ثانى واعمل بيها حاجات ومحتاجات هكتبها لكم بصراحه انا قاعده فى البيت وجوزى بيطلع عينه يعنى مصاريفنا المفروض ما تبقاش زياده عشان كده مش بحب اتعبه فى قوله هات وهات وهات
بالنسبه لانى احط عليها عصير طماطم عمرى ما جربتها هعملها ان شاء الله واقولك بس الفكره ان جوزى بيحب اى حاجه متحمره ده انا حتى بفكر احمر نفسى يمكن يحبنى
هقول طرقى فى المحشى بتاع الكرنب الشتا داخل يا ولاد وهنبقى عايزينه بس الى مش عايز حركه البرغل دى ما يحطش هى بتفرق انه ما بيوجعش قولون الواحد يارب تعجبكم واذا كان اقولكم بقى على اكل امى
محشى كرنب عشان شروق 
أولا طبعا بنسلق الكرنب ونقطعه حتت حلوه قد كف الايد بدون الصوابع مربعه على قد ما تقدري عايزاكى تعدى تحشى بمزاج يعنى تجيبى الصنيه الكبيره دى وتحطى الحشوه والكرنب وتعدى ادام التلفزيون عشان ما تتلهوجيش ويبقى سد خانه اشتغلى بمزاج يطلع اكل يجنن
بنجهز الحشوه الكر نبه المتوسطة بنحط لها كيلو رز وثلاث حزمات شبت كبيره حزمتين كسبره وحزمتين بقدونس وتلات بصلات متوسطين وكيلو طماطم ونصف راس ثوم بنشترى ازازه كاتشب حراق او حلو زى ما تحبى وشوربه ماجى وانا بفضل فاين فودز اكثر دلوقتى انا احب اطبخ الكرنب مع شرائح لحمه متقطعه رفيع بنفرش بيها الحله وياسلالالالام بقى لو عملتيه مع ريش ونخلط الخلطه كلها من غير اى تسبيك بس بنقدح السمن زى الكوسه ونطشه على الخلطه المحشى لازم يتعمل بسمن الزيت ما بيطلعش طعم زى السمن وتجيبى ملو ايديك برغل ناعم وتضيفيه للخلطه نخلط ونحشى ونرصص فى الحله بس ما نكدسوش اوى نجيب الكاتشب الحراء او الحلو زى ما تحبى وتخففيه بالشوربه او بالماء انا بخففه بالماء لأني حاطه شوربه فى الكرنب وفى الوسط حطى حتت لحم زى ما انتى عايزه وسقسقيها بالكاتشب لغايه لما المياه تتخلل كل المحشى يتحط على النار لما يغلى وبعدين يتوطى عليه خالص
سمعت ان ممكن نهرس ثوم ونحطه بين طبقات المحشى. انا ما بحطش صلصة خالص في آي محشى لكن في الكرنب ما فيش غير الكاتشب.
الرقاق باللحمه المفرومه
نصف كيلو رقاق وياريت يكون فيه شوربه بط أو شوربه حمام سمن بلدي حوالي كوب ونصف كياو لحم و3 بصلات ملح وفلفل قرون شطه حاميه
فى المرقه نذوب ملعقتين كبار زبده ونص كوبايه لبن عشان تطرى الرقاق وعمره ما ينشف منك ابدا وعلى النار نشوح البصله بالملح والفلفل وحتت الفلفل الاخضر الشطه ونحط بقى كبيبه صينى وملعقه خل واحده وملعقه سكر من بتاعه الشاى ونقعد نقلب لما ريحته تفحفح وتبقى روعه ممكن تحطى له فلفل اخضر رومى وحطى بذر الفلفل لانه بيدى طعه الفلفل جدا
فى صنيه بقى حطى حته سمنه صغيره ورصصى الرقاق واسقى بالشوربه وبعدين حطى اللحمه وبعدين كملى الرقاق المسقى بالشوربه وبعدين دخليه الفرن حطى على الوش سمنه سايحه
فى ناس بتعمله على البوتجاز من فوق بس انا ما بعرفش اظبطه هويدا بتعمله كده وبيطلع احسن من بتاعى
السر فى الرقاق السمنه بتاعتك لو سمنتك حلوه هيطلع حلو بس لا تكثرى ولا تقللى خليكى وسط الوسط حلو ومفيد
صنيه البطاطس المعتبره
2 كيلو بطاطس – كيلو طماطم حمراء – ملعقتين كبار صلصة – ملعقة كبيره ملح – شوربه لحمه – كوبايه قشطه وش اللبن – فلفه خضراء كبيره – راس ثوم – بصلتين متوسطين
نقطع البصل شرائح ونتبله بالملح والفلفل وجوزه الطيب والكبيبه الصينى ونسيبه قد ساعه لما ميته تطلع خالص نقطع البطاطس شرائح تخينه ونفصص الثوم وندقه ونقطع الفلفل شرائح ونضرب نصف الطماطم فى الخلاط مع الصلص والنصف الثانى نقطعه شرائح نخلط كل المقادير على بعض ونزود شويه زيت ذره صغيرين نديها غلوه على البوتجاز من فوق وندخلها الفرن ممكن نحط حتت لحمه حمراء على الوش ونسيبها ساعه فى فرن حامى تستوى.
دول اكلاتى كنت حاطهم فى ركن الاكلات المصريه
انا النهارده عملت بواقى الاكل الى عندى وحمرت جنبهم بطاطس محمره وسلطه زبادى لان الاكل كان كثير ما عملتش حاجه طول النهار نايمه لغايه اذان الظهر
هشوفكم بكره ان شاء الله
يعنى ايه الكبيبة الصينى