السلام عليكم اخواتى
ياريت تقبلوا منى اولى مشاركاتى بالركن و هى عبارة عن عدد من التورتات صنعتها لزوجى
و جربت مقادير الكيك الاسفنجى هنا مظبطتش معايا يعنى معظم الوصفات فيها ست بيضات انا حطيت 8 و طلعت مظبوطه تمام معايا الحمد لله
كمان ال لاحظته ان عمل الكيك الاسفنجى لازم يكون بتركيز شديد لان اوقات بتكون المقادير هى هى انما ممكن حاجة تخلطها زيادة او نغير قياس الصوانى او تتابع الخطوات او حتى حرارة الفرن او حرارة المقادير المستخدمة يعنى باردة او بدرجة حرارة الغرفة كلها عوامل بتفرق معانا جدا فى صنع الكيك الاسفنجى
المهم اتفضلوا معايا و شوفوا حكاية كل تورته منهم ايه
اظبط واحدة كانت مقاديرها
8 بيضات
ا كوب دقيق منخول مرتين
واحد كوب سكر ناعم منخول
ملعقة كبيرة نشا
نصف ملعقة صغيرة بيكنج وممكن الاستغناء عنه
ملعقة كبيرة زبدة طرية
ذرة ملح
عصير نصف ليمونه
ماء زهر و فانيليا
الطريقة
اولا يجب اعداد و ترتيب كل الخامات بحيث لا نقطع العمل لنخل الدقيق او طحن السكر الخ
يعنى كل اوانينا عندنا الفرن بتاعنا بنسخنه قبل البدء فى العجن على درجة حرارة 180 وانا عموما بردو بقول كل واحدة حسب الفرن بتاعها يعنى انا جربت كتير قبل كدا لغاية ما وصلت للدرجة دى ان هى المناسبة عندى
وكان عندى فرن قبل كدا كانت من غير ارقام و كنت بخمن انا الحرارة حسب التجربة
المهم
هنبتدى اول حاجة نفصل الصفار عن البياض و دى عملية سهلة جدا
بنكسر البيضه برفق و ننزلها فى ايدنا و نسمح بس للبياض بالمرور و الصفا نحتفظ بيه فى كف الايد و ننقله للاناء بعد كدا طبعا دى ابسط طريقة و مضمونه لان فى ناس بتيجى تفصل الياض و الصفار عن طريق قسم البيضه نصين فى القشر بيقوم القشر مجرح الصفار و يبوظ الدنيا ف فى كف الايد بتبقى اسهل
بنضيف فى اناء الصفار كيس فانيليا او اتنين حسب رغبتك انا كمان ضيفت ماء الزهر اول مرة ضيفت نقطه واحدة بس و فى التورته التانيه ضيفت بالخطأ حوالى اربع نقط بس طعمها كان روووعة و مأثرش عليها وحش يعنى بالعكس كانت مميزة الحمد لله
بنبتدى نضرب لمدة دقيقة و بعدين نضيف نص كمية السكر الناعم و نص كمية الدقيق المنخول و معلقتين ماء بارد و اذا هنعملها تورتة شيكولاته بنضيف معلقتين كاكاو معلقة مع الصفار و التانيه و احنا بنخلط مع المارنج فى النهاية
بعد ما بنخلص ضرب الصفار بنغسل ايادى المضرب بتاعنا كويس جدا و ننشفهم كويس جدا و نبتدى نضرب البياض لمدة دقيقة لغاية ما يبقى عامل زى رغوة الصابون كدا و بعدين نضيف عليه نص مقدار السكر الناعم و نضرب لمدة حوالى من خمس الى سبع دقائق لغاية ما بيبقى عندنا البياض زى الكريم شانتى كدا و حجمه تضاعف و بقى قوامه متماسك
الخطوة الجايه دى اهم خطووووووووة
نبدأ نضيف خليط الصفار بحرص شديد بالرااااااحة و نقلب بملعقة ياريت مطاط لو عندك او ملعقة عادية بس ببطء شديد و نضيف باقى مقدار الدقيق عن طريق رشه بالمنخل و نقلب بطريقة دايرة و بعدين نقطعها بالنص بالملعقة نلف لفه و نقطع بالمعلقه لغاية ما نخلص كمية الدقيق ال عندنا و نكون حريصين ان القوام ميتغيرش عن ال عملناه بالمضرب و يدوب بس احنا بنقلب الدقيق عشان يدوب او يختفى مش اكتر مش بنضرب بالمضرب ولا بنخلط بشدة بالمعلقة
الخطوة الجاية دى بردو مهمة جداااااا
نبتدى نجيب الصنية بتاعتنا و نون دهنينها زبدة و مبطنينها بالدقيق و تمام معانا و نصب الخليط فيها بالتساوى عشان ميطلعش جمب اعلى من جمب "حصلت معايا كتير" او جزء ياخد تسوية اكتر من جزء بسبب سمك الخليط فى جانب اكتر من التانى
بعد كدا بنساوى السطح بالملعقة و الخطوة دى انا شوفتها فى وصفة فى موقع اجنبى و كنت مستغربة ان السطح بيتاوى بملعقة لكن فعلا كانت مفدة و السطح كله طلع فى سوا واحد و علو واحد
اخر خطوة نخبط الصنية برفق على المائدة عشان نطلع اى فقاقيع هوا كبير على السطح مرتين بس بشويش و نحطها فى الفرن على درجة حرارة 180 زى ما قولنا و نسمى كدا قبل البدء اصلا بالعمل و فى كل خطوة عشان ربنا يكرمنا و تطلع الحاجة حلوة بإذن الله
بنسيبها فى الفرن حوالى نص ساعة و بردو حسب فرنك و نختبر سواها بعود شوى خشبى او سكينه رفيقة و لو ان العود افضل لانه رفيع جدا ومش بيسيب اثر فى الكيك بتاعنا
خلاص كدا الكيكة بتاعتنا استوت نبتدى نخرجها و نسيبها تبرد بعيد عن التيارات الهوائية عشان متهبطش و يا سلام بقى لو سيبناها لتانى يوم فى التلاجة بعد ما تبرد و ابتدينا تانى يوم نشتغل فيها بردو انا جربت اسيبها و كانت والله الى من اللى بتتزوق فى نفس اليوم و كل اللى داقها افتكرها جاهزة مش شغل بيت
طبعا التزيين دا كل واحدة و رغبتها و افكارها هى و لمستها الابداعية و انا النهارده حويكم انا زينت ازاى بس لانى معييش موبايل بكاميرا و كنت بخطف الموبايل من زوجى يدوب بس اصور بيه التورته بعد ما انتهى منها
دى اول واحدة و دى كان فيها عيوب فى الجوانب لكن باقيتها كان ممتاز ف انا عشان مغلبش فى التزيين عملت ايه
فرغت التورتة يعنى خليت قطرها اصغر و شيلت الجوانب دى و عملت بيها حاجة هوريهالكم بعد شويه
و كمان التورتة دى عشان اكتب عليها سيحت شيكولاته خام مع معلقتين لبن مع معلقة زبدة و استنيت لما حراراتهم بردت شوية و كتبت العبارة اللى انا عاوزاها على ورق المونيوم و بعدين لما مسكت نفسها نقلتعا على وش التورته بالشكل دا
اهى م الجمب كمان زوقتها ببندق مطحون مع جوز هند محمص
و ادى كمان صورة واضح فيها الوردة الويفر ودى اشتريتها جاهزة طبعا و الولاد كانوا معجبين بيها جدا و كمان زوجى اتبسط اوى من شكلها على التورتة
و استنونى فى المشاركة الجاية عشان تشوفوا انا عملت ايه بالجوانب المعيوبه فى الكيك
محدش يرد استنو يا قمرات
انا فكرت انى الف الجوانب دى زى قاعدة و اعمل بيها تورتة ايس كريم
و الابتكار اللى انا عملته بقى مش فى استغلال الجوانب و بس لاء
انا اصلا معنديش قالب كيك من ال بيتفك ف عملت ايه بقى
جبت و رق المونيوم و لفيته زى طوق حوالين القاعدة اللى عملتها من الجوانب دى و صبيت فيه خليط الايس كريم و زينت التورتة بالشكل دا
بصوا بقيت جميلة ازاى و هى اصلا جوانب ممكن فى ناس بترميها
على الوش حددت شكل فراشة بالزبيب و مليته بالفورماسيل الملونة و الملبس الفضى و الفواكه كمان صبيت على الوجه جيلي كانت رهيبة والله
و ادى كمان صورة
تابعونى لسه كمان افكار تانية
التورتة دى بقى كانت احلى واحدة عجبت زوجى اللى كان فيها ماء الزهر كتير زى ما قولتلكم
و الكريمة بتاعتها كمان انا خلطت الكريم شانتى بشيكولاته خام سايحة و معاها زبدة و لبن و كان طعم الكريم خطييييييييييير
و شوفوا انا زينتها ازاى
هنا انا لسه حاطاها على صنية مقلوبة كنت بزينها ههههههههههههه
دى اوضح شويه
و لسه كمان واحدة زوجى طلبها النهارده مخصوص و عملتها عشان خاطره
دى بقى زغللت عنيه بيها و اخدت وقت فى التزييين بس النتيجة شوفوا انتو و احكموا
و دى صورة جانبيه مزوقاها بالشيكولاته المبشورة و النص التانى بفورماسيل
ادى الجمب التانى
و يارب تكون مشاركتى عجبتكم و ملاحظاتى تكون مفيدة لكم ان شاء الله
ريت آخد حقي قبل ما يهجمو عليها
عنجد تورتة في قمّة الروعة [/COLOR]
وتسلمى عالطربقه والنصائح الجمبله
وفعلا محتاجه
دقه وتركبز
ربنا بفرحك وبسعد ابامك دابما
ومنتظربن باقى مشاركاتك الرائعه
حلوة جدا الاخيرة دى شكلها جذاب
مشكورة على نصايحك ياقمر
كتبت بواسطة assia2017 
ريت آخد حقي قبل ما يهجمو عليها
عنجد تورتة في قمّة الروعة [/color]
تسلميلي يا قمر و اللى نفسك فيها هيا ليكى يا سكر
و شرفتى الموضوع و نورتيني
كتبت بواسطة noorelhoda وتسلمى عالطربقه والنصائح الجمبله
وفعلا محتاجه
دقه وتركبز
ربنا بفرحك وبسعد ابامك دابما
ومنتظربن باقى مشاركاتك الرائعه
اختى الحبيبة نور الهدى انا استفدت جدا جدا من افكارك فى تزين التورت بردو و من كل مواضيعك حقيقي انت من الاسباب ال فتحت نفسى من جديد على الابتكار فى المطبخ ربنا يكرمك و يعزك يارب
نورتيني يا ست الكل
كتبت بواسطة misha_misha انا خلصت خلاص يا ميشا تعالى الحقى نصيبك من التورت قبل ما تخلص يالا اوام
كتبت بواسطة samouha حلوة جدا الاخيرة دى شكلها جذاب
مشكورة على نصايحك ياقمر
دا عشان عيونك حلوة يا اختى ربنا يكرمك و يعزك
اشكرك
كتبت بواسطة أم مــــالــــك تسلمين اختى ام مالك
و اسعدنى مرورك