أمس سويت عجينة من بنات أفكاري في البداية كنت بسوي عجينة العشر دقائق وبديت أحط المقادير الاولى شفت الخلاط بدأ يثقل في الخلط من البدايه قلت ليش ما أخلط المقادير مرة وحدة (أختلاف بسيط عن عجينة العشر دقائق )
عجينتي كانت=
كيلو طحين كويتي (حصلته في جمعية الشارقة التعاونية وأسواق الامارات وسوبر ماركت هاشم في عجمان) إذا حد من البنات تدور الطحين
4 ك ماء فاتر
2 م ك خميرة فورية
1 م كbp
فنجانين سكر
ملح (أنا نسيت أضيف الملح وكلهم قالولي وايد حلوه المعجنات بس تهمه هههه (تهمه أو تهم يعني بدون ملح)
زيت (للأمانه ما حطيت مقدار معين على ما اعتقد أكثر من 1/2 الكوب)
وموتتها من العجن لين ما قالت بس وخليتها تتخمر مدة ساعة وربع تقريبا
وماشاء الله طلعت الكمية كبيرة قلت شوي أسوي الحين فكرت وفكرت ….. بيتزا دوار الشمس ومناقيش (مناقيش منوعه)
وابتكرت طريقة اسرع للبيتزا المتوسطة الحجم والمناقيش
سويت المناقيش والبيتزا المتوسطة بآلة خبز الخمير أسرع بواااايد عن الفرن في أقل من دقيقة تخلصين خبزتين
على فكرة العجينة تنفع حق خبز الخمير الاماراتي ولو تحبين تخلطين طحين أبيض رقم 1 + رقم 2 وتضيفين شويه (حب نثيبه) يمكن تكون الشمر أو الكراويه الله أعلم (اللي تشبه الكمون وطعمها شوي حلو)وتدهنين الخبز بالبيض والسمسم إذا تحبين وبعد الخبو تدهنينه بدهن ذوابه أو الزبدة ياسلاااااااااااااااام مع مسحة جبن كرافت وكوب كرك يفتح المخ وتكونين يالسه على راس العرقوب وجدامج الضو (شكلي وصلت البر وأنا ما أدري ههه)
برجع احاول انزلهم مره ثانية
IMG]http://www.lakii.com/img/all/Dec07/RUMAnx12262316.jpg[/IMG]
[IMG]http://www.lakii.com/img/all/Dec07/yFhvoq12262316.jpg[/IMG
[IMG]http://www.lakii.com/img/all/Dec07/50BmJY12262315.jpg[/IMG