تكملة لدروس رسم الماليكان 2024.

وهنا طابقنا الوجه على البيضه المقلوبه

تعلموا ترسمون البيضه علشان يسهل عليكم

الحين بعلمكم ترسمون الحواس ..

اول شي نقسم الوجه نصفين بالضبط A و B (( انا ترى خطوطي مب متوازيه لاني ارسم عشوائي مب بالمسطره ))

النصف اللي تحت B نقسمه 3 اقسام
القسم الاول : منطقة العيون
القسم الثاني : منطقة الانف
القسم الثالث : منطقة الفم

ببدأ مع رسم الكفين بصراحه رسمتها على السريع لاني ما احب ارسم اليدين والارجل ..

هنا رسم اليدي وهي افضل طريقه بالنسبه لي اللي هي طريقة الزيك زاك اللي هي الخط المتعرج الحاد

عندنا تحت رسم القدم

نلاحظ النقطه الحمراء اللي هي منطقة الكعب << الكعب يعني حق الشوز … لابد تكون الرجل مرفوعه علشان الكعب
والنقطه الزرقاء هي منطقة موازنة اسفل القدم مع الارض

لازم يكون الخطين متوازيين ( الخطوط المنقطه بالرصاص )

رسم الرجل من الامام رسمتها بسرعه ومب شارحتها لاني بصراحه ما احب ارسم الرجول واليدين احس يضيع الوقت وهي مب مهمه
بس اللي حاب اني افصل فيها ما عندي مانع << يارب محد يطلب

تنعيم الاطراف ..

الحين قبل لا انعم الاطراف كانت كلها كأنها بالمسطره تقريباً

الشكل التالي ( شوفوا الخطوط الحمراء )

الحين كذا التنعيم واضح و نلاحظ المناطق اللي كانت اكثر حده مثل الاكتاف المرافق انحناءة الابط< الا على طاري انحناءه هي كذا والا كذا >> ان انحنائه !!

طيب الحين بنرجع لموازنة الايدي بعد ما رسمنا شوي من الكفين

نلاحظ الحين القوسين اللي رسمتها

كل ما كانت الاذرع ابعد << يعني ترتفع اكثر معناته بيكون القوس ارفع

والحين انا اقولكم سوو نسخ منها بس علشان نتدرب عليها وما يروح وقتنا وحنا نعيد البدي كل مره ..
ما علينا ..

بنبدأ اليوم رسم الزي العام يعني فستان بسيط

اتوقع بسيط .. لاحظوا انحناء اسفل الفستان لازم يكون بهالشكل من الغلط اننا نخليه مستقيم

الحرده حق الرقبه بشرحها في الصور التاليه

بما ان هالدرس سهل بدخل معاه طريقة الانحناءات والكسرات

اول شي ابيكم تتعلمون ترسمون بورق طريقة انحناءات مثل كذا

هذي الانحناءات بتسهل عليكم مررررره طريقة رسم الطيات والكسرات في الفستان ..

اول ارسموا اللي A واذا اتقنتوها تعلموا على B

ولاحظوا اماكن الظل في اسفل الطيات والكسرات هذي لاااااازم نرسمها لانها تغير الشكل 180 درجه

خلصنا درس اليوم اللي كان سهل جداً … وان شاء الله الحصص الجايه نتعمق اكثر ونرسم الطيات على فستان

وبيكون بمثابة التوقيع لها .. سميت الدرس هذا ميزتي علشان ابي كل وحده تطلع لها شي مميز برسمها للفاشن

تذكرون يوم قلت لكم قبل مب معلمتكم كيف ترسمون الملامح ولا الشعر !

هنا سوف تكون الاجابه

بالنسبه لي حبيت الشعر او الفيس نفسه يكون من ابداعك انتي يعني .. اذا اتبعتي اسلوب معين برسم الفاشن بالوجه او الشعر او اي شي بالعارضه .. بتكونين خلقتي لك اسلوب معين

اغلب مصممين الازياء بدون ما يوقع على تصميمه تعرفين ان هذا تصميم فلان والا فلان ليه !!

لانه يتبع اسلوب معين ,, بالعربي .. حركه معينه برسمه

شوفوا معاي تحت كل رسمه من الرسمات الجايه لمصمم ما فيه رسمتين لمصمم واحد

نلاحظ ميزَتهم بطريقة الرسم .. بعضهم ـ بلون بشرة العارضه

او بعضهم ما يرسم كل الراس

او مثلا يكون تلوينه طالع شوي عن الرسمه

او كلهم ملبسهم نظاره شمسيه

او مثلا العارضه رقبتها طويله زي اللي بالصوره الثانيه

واحد مثلا ما رسم عيون بس حاط خطيين متوازيين قاطعين الوجه

حركات حلوه وتميز الشخص عن الثاني .. تخلينا من اول نظره للتصميم نعرف مين المصمم

رسمي مثلا .. اخترت اميز رسمي بستايل الشعر الغريب

انتي ميزي رسمك باللي حابه

اذكر بمسابقة الفاشن اللي راحت وحده من العضوات ميزت رسمها بالرموش كانت مررررره حلوه ميزتها .. يمكن الحين لو اسألكم منهي عرفتوها حتى لو ما قلت اسمها .. كذا الهدف من الميزّه

كله الوان × الوان حتى واجباته بتعجبكم ان شاء الله

نقاط الحضور لهالدرس 5 نقاط

نقاط حل الواجب 15 نقطه << طبعا للي سوت ميزه لتصميمها اللي ما تسوي ميزه ما راح اعطيها نقاط الواجب :sm4:

يعني اللي ترسم الموديل حقتها وترسم الميزه

تكتب حبيت اميز عارضتي بكذا ….

اختيار الالوان من اهم الدروس في الفاشن وغير الفاشن

علشان تعرفين تختارين الوان الزي وتنسقينه .. لازم تعرفين قبل قاعدة الالوان

اللي ما يعرفه كثير ان الالوان لها قاعده معينه في تنسيق الالوان سواءً :

فاشن
ديكور
قصص اطفال
رسم
تصوير …. الخ

هالقاعده سهله جداً واذا عرفتيها بتقتنعين فعلاً باختيارك وتنسيقك ..

شوفوا معاي تحت

هذي تسمى دائرة الالوان او " عجلة الالوان" color whell .. هالدائره قاعده اساسيه شكلها كذا ما يتغير اقصد ترتيب الالوان فيها ..

لازم تكون عندك وحافظتها اذا كنتي تحبين التنسيق بوجه عام ..

وشي القاعده المتبعه لاختيار لون الزي !!

عندنا تحت ..

* اول قاعده في حال اختيار لونين فقط :

كل لونين متقابلين متناسقين ويناسبون بعض "شوفي الخط الأسود"

* ثاني قاعده اختيار لونين او 3 الوان
:عندنا طريقتين :

اللي هي طريقة المثلث المتوازي الاضلاع ..

يعني لاحظي المسافه بين كل زاويه في المثلث والثانيه متساويه .. بينهم اربع الوان
مب بالضروره كل مره يكون بينهم اربع ممكن تكون دائرة الالوان اكثر تدرج مثل الصوره الاولى المهم المسافه تكون متساويه
طبعا مب لازم نختار الثلاث ممكن :
1 ◌ اللون اللي فوق وزاوية اليمين فقط
2 ◌ اللون اللي فوق وزاوية اليسار فقط
3 ◌ الزاويه اليسار واليمين
4 ◌ الثلاث زوايا سوا

اللي هي الطريقه الهرميه :

يعني يكون شكل المثلث هرمي .. المسافه بين العمودين الطوال متطابقه بالضببببببط .. ما يهم حجم الهرم المهم يكون مسافة العمودين الاطول "طول بعض" بالضبط وقاعدتهم ما يهم وش يكون حجمها ..

وطبعاً نفس الكلام الاول مب لازم اختيار الثلاث الوان مع بعض

* القاعده الاخيره اختيار اللون الواحد :
يعني مثلاً تاخذين اغمق درجه من اللون مع افتح درجه من اللون نفسه
او تدرج كل اللون من الاول للاخير ..

هذي3 قواعد لاختيار الالوان بس ..

عندنا تحت عجلة الوان بالوان وتدرجات اكثر ومرقمه علشان تسهل اختيار الالوان ..

طبعا لو قلنا ابي اختار 3 الوان بطريقة المثلث المتطابق الاضلاع بس ابي درجه من درجات اللون الفاتح ..

هل تناسب اول درجه من اغمق درجه من اللون الثاني !!؟

نعم تناسب ..

ما يهم درجة اللون المهم ان يكون اختيار اللون احد الطرق الثلاث ..

طيب باقي اهم شي !!

اللي هو اللون الاسود والابيض والرمادي !

هالالوان الثلاث فقط تناسب كلللللللللل الالوان وكل الدرجات
و تناسب بعض يعني :
الابيض يناسب الاسود والرمادي والعكس لهم كلهم …
نلاحظ موقعهم تحت بالنص ..

شوفوا معاي الفستان اللي تحت

نشوف الوانه في عجلة الالوان ..

اصفر + تركواز "شوفوه في الدائره المرقمه" ..

لو نسوي شكل هرمي نشوف ان الالوان بالضبط متناسقه ولو ندرج معاهم اللون الثالث اللي هو الاحمر

لو نحسب المسافه بين طول العامود من الاصفر للتركواز
و الاصفر والاحمر تصير متساويه بالضبط

ونلاحظ ان العارضه حاطه روج احمر+مناكير احمر بكذا كلها متناسقه …

طيب دحينااااا صوره تانيه

الوان الفستان كثيره ..
نشوف الالوان اللي جوا اول
اصفر+ ازرق تركواز فاتح + اصفر + اورنج مشمش +الارضيه بنفسجي
ازرق + فوشي شي بسيط "الورود"

الالوان االلي برا
اخضر + احمر "العقد"

اصفر رقم 1 اذا جربنا طريقة الخط الواحد "ثاني عجلة الوان" بيكون قباله نيلي رقم 19 "اللونين موجوده "

طريقة المثلث المتطابق الاضلع
طيب اصفر رقم 1
تركواز فاتح رقم 25
فوشي رقم 13

كلها موجوده بالفستان

مثلث متطابق
احمر رقم 7
اخضر رقم 31
نيلي رقم 19 << النيلي تقريبا مب موجود بس اخذنا الرقمين اللي فوق

كلها موجوده

مثلث هرمي
اورنج مشمش رقم 5
اصفر رقم 1
ازرق رقم 21
كلها موجوده

بعد مثلث هرمي
اورنج مشمش رقم 5
اخضر رقم 31

طيب كيف نسوي زاوية الهرم الحين !!

نعد كم خانه بين 5 و 31 !!

9

اقسمي الـ 9 على 2
يعني مره عدي رقم من قبل 5 ومره رقم من بعد 31

اللي بالنص بينهم بالضبط بيكون 36

وش قبال الـ 35 علشان نحط زاوية الهرم !!
بيكون 18 اللي هو بنفسجي ارضية الفستان

حلوه المعادله !! .. طلعت لنا لون زي اكثررررررررررررر من رائع لون شتوي يفتح النفس وفريحي

طيب وش رايكم نختار شي غير الازياء !!

الوان تنسيق الخط هذا << ترى والله ما سويته على الدائره بس تعجبني هالالوان مع بعض

اولا اللون الاساسي

الرمادي .. يناسب كل الالوان فـ يجي مع البينك الخربزي
ويجي مع الازرق الكحلي ..

طيب خل نسوي مثلث اول شي
البينك الخربزي افتح درجه من 7
الكحلي اغمق درجه من 19

طيب وش قبالهم !!
الاخضر صوووح رقم 31 !!

اول درس كتبت الآيه بالاخضر

تصدقون قعدت ساعه انسق لون بداية الآيه عجزت القى لون حلو يناسب

اخر شي اعجبني الاخضر << اثري ذويقه بسم الله علي <<برااا تكفين

المجال في التلوين مفتوح اذا ما عرفتي لهالطريقه جربي الطريقه الثانيه الين تلقين طريقه ترتاحين معها ..

انا من ناحيتي بعلمكم الاكريليك
المهم في القواعد والا نوع الالوان ما يفرق

بس الاكريليك احبه لان ممكن اسوي التفاصيل الصغيره كأنها صدق "بشرح لكم اخر شي"

الخشبي اعجبني لانه سهل التلوين ويعطي شكل حلو بالرسم << يعني مدري يصير شكل الرسمه كنها حبيبات << ام الشرح يا شيخه

اذا شفتوا اخر الصور تفهمون ان شاء الله

بسم الله نبدأ ,,

■ الأدوات
"ترى الرسمه اللي بالصوره غير اللي بنلونها اقصد الزي<< نسيت اصور حقتنا

زي ما تشوفون الادوات عندكم
لااااازم المويه علشان تغسلون الفرش كل مره .. اذا صارت المويه كدرا شوي غيروها علطول لان يخرب اللون
السفنجه امسحوا فيها الفرشه زين بعد ما تغطونها بالمويه علشان يروح اللون الأول .. الا ان كانكم نشيطين كل مره تقومون للمغسله << وروحوا لمغسلة الحوش علشان ما تهاوشكم امهماتكم
فرش الالوان تذكرون يوم قلت لكم بعيد اصورها لكم صوره اوضح << ما نسيت يا حبي لي صح << برااا

هالفرش سوا بعشرة اريل بس من جرير
استخدمت اربع منهم

اول شي اخلطوا ابيض مع البني الفاتح الين توصلون لدرجة لون البشره اللي حابينها
او ممكن للبشره السمرا بني غامق مع ابيض ونفس الكلام الاول ..
المهم الابيض مفروض نخلطه كل مره مع اي لون الا الاسود
نختار فرشه مناسبه لحجم المنطقه اللي بنلونها
انا اخترت الصفراء لاني بلون مناطق صغيره "السيقان"
××
■ نبدأ نلون من تحت

××
■ وهنا الفرشه واضحه اكثر بعد ما لونت الساقين

××
■ خلصنا تلوين الجسم كله

شوفوا اطراف السكيتش ما خليت اللون يوقف فجأه عند اليدين والرجول
الطريقه تمسكين الفرشه وتسحبين بسرعه وانتي ترفعينها
(( جربوها كم مره في ورقه خارجيه ))

و لاحظوا فوق اني لونت على الفستان صح !!
لاني ابي المنطقه هذي شيفون والشيفون يبين من تحته الجلد
××
■ الحين نلون الفستان بالاسود بس بما ان اللون الاسود اذا جا عليه النور يفتح فـ بنخلي لونه رمادي

نخلط اسود+ ابيض شوي الين يطلع رمادي
بعدين نلون الفستان كله بالرمادي+ ماء << لا تلونون اللي قلت عنها بتكون شيفون اللي مأشره عليها بالفرشه بنخليها الاخيره

نكمل ,,
نعصر اسود ونقسم اللون 3 اقسام

اللون الاول نعصره بالدائره الاولى ونحط شوي مويه
الثاني بالدائره الثانيه ونحط مويه اكثر من اللي قبل
الثالثه بالدائره الثالثه ونحط مويه اكثر من الثنين اللي قبل

يعني كل واحد مخفف اكثر من الثاني " شوفوا الدوائر تحت بالحامل الابيض "

نلون اول شي من اليسار لليمين باللون الأخف
بعدين نعيد عليها باللون الاقل خفه مويه وما نلون الى الاخير لا نقلل شوي من المساحه عن قبل "ويكون عشوائي مب لحد زي المسطره"
واخر شوي نلون باللون الاثقل << اللي حطينا عليه اقل مويه
ونلون بعد مسافه اقل من الثانيه

الحين طلع عندنا اللون متدرج من اليسار اسود اغمق وكل ما رحنا اليمين خف الين يصير رمادي طبعا بيكون عندنا لون الزي اسود والاضاءه من اليمين مخففه اللون .. ومخليته على رمادي

لا تلونون على اللي قلت عنها بتكون شيفون
××
■ الحين نلون الشيفون .. ونخفف اللون الاسود بالمويه الين يكون معنا اللون شفاف

××