الحقوني يا جماعة الناس فرحانه بجية رمضان وانا حيرانه بالمشكلة اللي عندي وحاولوه اتحلونها معاي ..مشكلتي هيه كيف اتفاهم مع العمة .. قبل الفطور ويوم يأذن المؤذن تستوي هذه المشكلة حبكت يعني ..يوم تسمع المؤذن يأذن تقول لا تفطرون هذا المؤذن ما يعرف ..كيف يأذن والشمس بعدها ؟؟!! اقولها كيف يا عمتي الشمس اغربت والا ما كان المؤذن اذن .. تقول كيف اغربت انت ما تعرفين شي انت لو تمشين شوي غرب بتلقينن الشمس بعدها شوفي قطر بعدها ما اذن الؤذن عندهم ..مطوعينا ما يعرفون وقاصين علينا يأذنون والشمس بعدها .. اقولها يا عمتي الارض بيضاويه يعني مش مسطحة ويوم تغرب عندنا ..في بلاد ثانيه بعدهم ..تقول كيف بعدهم لو تروحين قطر تشوفين الشمس بعدها ما اغربت وبعده المؤذن عندهم ما اذن … يعني كيف اتفاهم معاها مشكله التفاهم مع عجايز مش متعلمات ..شو يعني تباني الحق الشمس ؟؟ تباني اسوي مثل صاحب اللبانه .. حلف ما يرقد لين ما تخلص اللبانه في فمة..لا اللبانه خلصت ولا راعيها نام ..وحتى لو رحنا قطر بتقول لا لو تروحين غرب بتلقين الشمس موجوده بعد اظن العمة تباني الحق الشمس ..لا حول الله .مشكلة ما شي الا اخرب الراديو مالها علشان ما تسمع اذاعة قطر .. والله مشكلة كيف اتفاهم معاها ..على فكره هيه لين الحين تفطر على اذاعة قطر .
اظن لو يخترب الراديو ..بتسافر قطر علشان تفطر هناك.!! الله يعيني بس انا .
والسموحة يا أم زينة. هذا عمرها يا عزيزتي، عمرها كبير وهي غير متعلمة، ومهما قلت هذا رأيها ولن يتغير.
قولي لها معك حق، لكن أنا سأفطر على مؤذننا وافطري أنت على مؤذن قطر.
إن قالت لك أنك تخالفين الشرع، قولي لها: الله يسامحني…
يعني خذيها على قد عقلها تربحي وترتاااااااحي.
لا توجعي رأسك بالمناقشة العقيمة التي لن تقدم ولن تؤخر.
يا عمري لا تنقهري ولا شيء قوليلها
كل انسان لازم يفطر حسب التوقيت المحلي لبلده
يعني احنا نفطر حسب توقيت الامارات واللي بقطر لازم
يفطرو حسب توقيت قطر
لاتقوليلي ما تفهم شو يعني التوقيت المحلي…. ترى شرحتلها اياه مسبقااااااا
سلاااااام والله يعينك ….
اتصلي بشيخ تثق فيه من بلادكم
وخليه يكلمها ويقول لها
صدقيني راح تقتنع بس بشرط لا تحرجينها ولا تقولين شفتي اني صح
لان العجايز مايحبون احد يغالطهم ابدا ابدا
وكلنا لما نكبر ان شاء الله ونعجز بنصير كذا عسانا نلقى الي يصبر علينا بس
تحياتي لك
لكن حبيبتي مثل ما قالوا الأخوات طولي بالك عليها
والله يأجرك انشاء الله .
أوانتي سوي حالك اقتنعتي بكلامها وافطري بعيد عنها ؟؟؟؟؟
لاتشوفك واذا أذن قعدي اكلي معها بعد ماتكونين صليتي المغرب . ولا تزعلينها ولا تزعلك
أو غيري المحطة عن قطر .
تأزروني بالمره وتحياتي لكم جميعا … اختكم نونو
وبعدين طولت البال من الرحمن0
اعتقد ان العمه من المذهب الجعفري واهل المذهب الجعفري دائما محتاطين من الامور الشرعيه0
ابسط مثال المسجد الى عند بيتنا المؤذن بنغالى يقول الله أكبر ولاثمانيه مرات يصحى حتى الميت مع ان الشارع به غير مسلمين 0
يعنى انروح ونتهاوش معاه فهذة الامور تحتاج الى بعض التأنى بالطرح لان اصلا لا يوجد بها اشكال فرجائى سعة الصدر على عمتك وعلينا0
فالعمات دائما هن يحبن ان يكونن صاحبات الكلمة حتى ولو بدون علم0
والله يعينك