عندي لكم طريق صينية المبروشة بالمربى (على فكرة ما لقيت حدى كاتب طريقتها أو ذكرها و هي فلسطينية 100% و مجربة و مضمونة و على ضمانتي)
خذوا عندكم المقادير:
3 م ص فانيلا
6 م ص BB
4 بيضة
2 كوب سكر
1 كوب سمنة
2 كوب سيرج
1 كوب جوز هند (إذا كان المربى غير مربى العنب)
الطحين كمية تكفي للعجين
ملاحظة المكيال هو كوب الشاي
الحشوة : أي نوع من أنواع المربى و يفضل مربى العنب
الطريقة:
يخلط البيض و الفايلا و السكر مع بعض كويس
يضاف السمن و السيرج و الطحين و BB و تعجن مع بض لحد ما تصير عجينة متماسكة (رح توخد كمية كويسة من الطحين )
إذا كان المربى أي نوع غير مربى العنب نخلط معه جوز الهند و إذا كان مربى عنب لانضع جوز هند إطلاقًا
نقسم العجينة نصفين متساويين
تمد نصف العجينة بصينية (مثل صواني الكعك) غير مدهونة
ثم نضع المربى و نفرده عليها كلها
بعدين نجيب المبرشة و على البرش الناعم مش الخشن و نبشر نصف العجينة الاخر حتى يتغطى المربى تماما (لاحظي لو كان هناك أماكن مكشوفة رح تنحرق بالفرن )
ثم نخبزها في الفرن و سلامتك و صحتين و عافية.
جربي نصف الكمية لان لكمية كبيرة و توسع صنيتين
و أنتظر ارؤكم في هذه الحلوى و جربوها رح تدعولي
واختي هذه كيكه بسيموها تارت وفي وصفات كثيره في المنتدى بنففس الطريقه بس عاد الطعم الفلسطيني غير
جزاك الله خيرا على هل الوصفه بس انا بعملها ما بحط فيها لاسيرج ولاسمن ولا 6ملاعق باكنج باودرلانو انا بعرف كتر البكنج باودر بمرر و الله اعلم بس بارك الله فيك
جزاك الله خيرا
ياعينى عليكىما فى اطيب من المبروشة خاصة للفطور مع كاس شاى
وانا عندى مبروشه نوع ثانى جربيها وراح تدعيلى
استخدمى بدل المربى عجوه تمر مخلوطة بسمسم وقرفة
خدى جزءمن العجوه وبسطيها بايدك على شكل دائرة ورصيها فوق العجينه وهكذا حتى تغطى كل العجينه وابشرى باقى العجينة علىالوجه
وممكن تضيفى على العجينة ملعقة من بهارات الكعك
وكلى وما تنسينى من الدعاء
كل وصفة احلى من التانية يا دعاء
الله يعطيكي العافية
اتصدقي اني انذهلت شنو سيرج
بس هنلي اشوي خففت من الصدمة 
يسلمو إيديكِ يا دعاء
وأنا كمان بعملها ..والأولاد عندي بحبوها كتير
بس زي ما حكت هنلي بالسمن …وبدل السكر العادي سكر ناعم
وبدون جوز هند
وكل شيء فلسطيني ….ممممم طيب …. ( مين بشهد للعروس..)
و شكراً مرة أخرى حبيباتي
و ساجرب طريقتك توام روحي بس في العيد هيهيهيهيههيه (عشان بيكون عندي عجوة بواقي من الكعك )