منذ عام كانت مذبحة بور سعيد الشهيرة ووقتها لم استطع الكلام لمدة 3 ايام وفي اليوم الثالث فاض قلمي وعبر عن ما بداخلي
وفي الذكرى الاولى لهذا الحدث الأليم انقل لكم ما كتب قلمي
العنوان (آه يا بلدي)
عيني عليك يا ابن بلدي…..ياللي دمك لونة وردي…..ياللي كنت قايم تفتح زي الورد البلدي
نفسي أصرخ..نفسي أبكي..نفسي أقول آه يا ولدي
بس دمعي رافض ينزل . وحُزني بين ضلوعي يزلزل
والله ياابني نفسي أنزل . وأجيب لك حقك وأدمر وأبهدل
بس خايفة …أيوة خايفة ما اقدرش اعدل
…….
مش هاقول لك دول يهود!!!لأ دول مصريين
نفس دمك.نفس لحمك وحتى لون العينين
تُهت واحترت والمــــــــــــر بقى مريين
والحزن خلَى عمري يكبر كل يوم سنتين
صدقني ياابني مش عارفة حقك عند مين واللا ميـــــــــــن؟؟
يمكن حقك عند أبوك واللا أخوك واللا الاثنيــــــــــن
واللا خالك واللا عمك واللا صاحبك واللا ميــــــــــــن
يا ابن بلدي انت عارف ان فيهم طيبيــــــــــــن
قلبهم أبيض حنين من فراقكم مكسوريــــــن
مش هاقول لك إنهم مش غلطانيـــــــــــــــــــــــــــن
دا فيهم شوية قليلين في قلوبهم هباب وطيــــــن
أنا عارفة انهم ظالميــــــــــن
ظلموا نفسهم قبل ما يظلموك وشالوا فوق اكتافهم عار ودَين
دا تلاقيهم يا ابني والله بيناموا وعيونهم مفتحين
لان اللي زيهم مستحيل يكونوا بخيانتهم آمنيــــــــــــن
دول باعوا نفسهم بكام جنيه لبعض العسكريين
اللي عملوا الشعب شارع وداسواعليه بالرجلين
ما يعرفوش انه شعب مقامه عالي وهم اللي نازلين
وعملوا البلد مجزر ووزعوا على الشعب هدايا"سكاكين"
وقال له هات حقك بإيدك إحنا هانحمي مين واللا مين
وكل دا ليه ؟عشان يرضوا اسيادهم اللي اسمهم مسجونين
سجن ايه اللي عايشين فيه ملوك"لقمة حلوة،صحة بمب،وعال وكويسين"
واحنا اللي اسمنا احرار لسة في اطار الفقر والجوع والمرض والبطالة مسجونين
عيني عليكم يا مصريين هاتلاقوها من الحرامية واللا من العسكريين
داحنا قولنا هانوصل معاكم لبر الامان لكنكم زودتوا البلة طين
آه يا ربي..آه يا قلبي..آه ياليلي…آه يا عين
آه يا ربي أروح لمين وانت ربي وانت حسبي وانت رب العالمين
مش باغني أصل قلبي جرحة شديد حبتيـــــــن
وليلي طويـــــــــــــل عليا كأنة ليل سنـــــــــــن
وعيني عاصية عليا مش قادرة تدمع حتى دمعتين
بس صدقني حقك هايرجع بعد يوم بعد شهر أو مهما طالت سنين
ولو ماجاش في الدنيا حقك هاتلاقيه ان شاء الله عند ربك يوم الدين
أصل حقك عند ربك ومين يقدر يرجعهُ لك غير رب العالمين
آه يا بلدي آه يا ولدي بور سعيد م اليوم دا عندي بور حزييييين
بور سعيد م اليوم دا عندي بور حزين
بور سعيد م اليوم دا عندي بور حزين
ن.عبد المنعم إبراهيم
أم فاطمة
كتبت بواسطة رودينا7 
وفيك بارك حبيبتي واسعدني ردك ياغالية
وأسأل لله العظيم في علاه أن يفرج هم سوريا وينصرها قريبا يا رب
وأن ينصر الاسلام والمسلمين في جميع أنحاء الأرض يا رب آمين