فطيرة بالمهلبية من مطبخى شخصيا ولأول مرة 2024.

السلام عليكم ورحمة الله وبركاته

أخباركم إيه يا بنات .. وحشتونى

إمبارح بالليل طقت فى دماغى أعمل حاجة حلوة وبعدين وانا لسة هبدأ طقت فى دماغى أصور الخطوات علشان تشوفوها وقولت لو طلعت كويسة هنزلها على المنتدى ولو مطلعتش هخفى على الخبر مجور ولا كأن حاجة حصلت

بس الحمد لله ربنا ستر وطلعت كويسة

إتفضلوا بقى شوفوها

نقول بسم الله

أولا .. نعمل المهلبية .. وطريقة عمل المهلبية بتاعتى كالآتى

نحط مقدار كوبايتين لبن كبار على النار وبعدين ندوب معلقتين نشا كبار فى نص كوباية ماية .. وبعد ما اللبن يغلى نشيله من على النار ونبدأ نضيف النشا واحدة واحدة مع التقليب المستمر وبعد ما نقلب كويس لحد ما تبقى ناعمة خالص نحطها عل النار تانى ونقلب برده لحد ما تتقل شوية وتبقى سميكة زى المهلبية المعتادة بتاعتنا دى كانت المهلبية بتاعتى

بعد كدة نسيبها تبرد شوية صغيرين مش كتير خالص .. وبعد كدة نجيب كيس نايلون ونغطى وشها كدة زى مانتوا شايفين فى الصورة علشان لما تبرد ما تعملش وش تخين فوق وتفضل كلها زى بعضها وبعدين نحطها فى التلاجة ونبقى نرجعلها بعدين

بعد كدة نبدأ فى تحضير عجين الفطيرة .. المقدار إللى أنا عملته 3 كوبايات دقيق وزودت عليهم ماية للعجن خدت منى كوبايتين مية وذرة ملح … بس إنتوا مترتبطوش بنفس مقدار الماية بتاعى المهم العجينة تبقى كويسة وخلاص

أنا بحب أنخل الدقيق قبل إستعماله دى حسب الرغبة

خلطت الدقيق مع الماية والملح وحطيتهم فى العجان بس كل شوية أشوف إن كانت العجينة محتاجة ماية أو دقيق تانى علشان تتظبت والمهم فى الآخر ظبتها بحيث إنها تكون مطاطية ومتلزقش فى الإيد

وبعد كدة طلعتها من العجان وبدأت أعجن فيها بإيدى جامد علشان تندمج مع بعضها لحد ما بقت بالشكل ده

وبعد كدة قسمتها لتلت كور بعدد الفطير إللى أنا هعمله .. وسيبتهم شوية علشان العجين يرتاح شوية .. حوالى ربع ساعة عملت فيهم شوية حاجات تانية فى المطبخ

وبعد كدة روحت جيبت المهلبية من التلاجة وجبت سمنة علشان أدهن بيها الفطير وجبت مكسرات أى مكسرات موجودة عندك فى البيت تنفع طبعا

وبدأت أفرد العجينة

إفردى على أد ما تقدرى كل ما تتفرد أكتر كل ما كان أحسن حتى لو إتقطعت من مكان مش مشكلة .. أنا فردتها زى مانتوا شايفين كدة

بعد ما أخلص الفرد خالص أدهن العجينة بالسمنة

وبعدين أتنيها من الجنبين زى مانتوا شايفين وكل جنب بعد ما بتنيه بدهنه بالسمنة

وبعدين أفرد تانى العجينة علشان تعرض شوية

وبعدين أضيف المهلبية وعليها المكسرات

بعد كدة أقفل عليها العجين زى مانتوا شايفين كدة

بعد لما خلصت التلت فطيرات بنفس الطريقة حطيتهم فى الفرن ووطيت الفرن خالص

كل لما أحس إن الفطيرة إحمرت شوية من تحت أقلبها على الوش التانى وأرجع بعد شوية أقلبها تانى وفضلت أقلب كدة تقريبا ساعة علشان تستوى براحتها لحد ما تبقى تقريبا بالشكل ده

وبعد كدة قطعتها ورشيت عليها سكر بودرة

دى صورة من قريب شوية

وبالهنا والشفا