هاكتب لكم النهاردة طريقة عمل نوع من الحلويات المصرية المشهورة وهو قرع العسل يا رب يعجبكم
المقادير:
كيلو قرع عسل مقشر و مقطع مكعبات.
مقدار من الصلصة البيضاء.
4 معالق زبيب.
4 معالق مكسرات مجروشة.
معلقة بقسماط.
3 أكواب سكر.
شوية فانيليا.
طريقة الصلصة البيضاء:
نحط معلقتين زبدة على النار لحد ما تسيح و نضيف عليها معلقتين دقيق و نقلبه شوية و نشيله من على النار و نضيف عليه كوبين حليب مغلي محلى بكوب سكر و مضاف اليه معلقتين قشطة و شوية فانيليا و نقلب بسرعة و نرجعه على النار لحد ما يبقى سميك شوية و لو كلكع معاكي ممكن تضربيه في الخلاط.
طريقة عمل القرع:
نحط طبقة من مكعبات القرع في حلة ونغطيها كويس بالسكر و بعدين نحط طبقة تانية و نغطيها بالسكر لحد ما نخلص مقدار القرع و السكر وبعدين نغطي الحلة و نسيبها حوالي 7 ساعات هنلاقي السكر داب و اتكون سائل نسلق القرع في السائل المتكون و نحط عليه شوية فانيليا و نعمل الصلصة البيضاء أثناء سلق القرع و بعد ما يستوي القرع نصفيه و نحط عليه الزبيب و المكسرات و نص مقدار الصلصة البيضاء و شوية فانيليا و نقلبهم كويس و نجيب صينية ندهنها بالسمنة و نرشها بالبقسماط بس لازم تكون صينية صغيرة شوية عشان يبقى القرع سميك شوية و ما يتحرقش و بعدين نحط فيها خليط القرع و نفرده في الصينية بمعلقة و نصب على الوش باقي مقدار الصلصة البيضاء و ندخل الصينية فرن متوسط الحرارة لحد ما يحمر وشها و بعين ممكن ناكلها دافية أو نحطها في الثلاجة و بالهنا و الشفا.
والله انا نفسي بالقرع……..مممممممممممم تسلم ايديك….
تعرفي ان في حديث للرسول صلى الله عليه وسلم…..لا اتذكره بالضبط بس بما معناه….
ان القرع يكثر في الدماغ…..ويقوي العقل…….
مشكوووووره عزيزتي على الطريقه ……بس 7 ساعات كثيييييييييييييير……
بصراحه شهيتيني واريد اعملها ممممممممممم …..
. ولا شو رأيك اجيك مصر وتعمليها ليه….
والله ان قاعده اتفلسف صح 
بس تعالي و شرفينا وانا أعملك كل اللي تحبيه وطبعا أكيد لازم هاعمل لك قرع العسل ما تكسليش و جربي قرع العسل و هايعجبك جدا جدا
ياhia قرع العسل فعلا مفيد جدا بس ما تكتريش منه لأنه فيه سكر كثير وممكن تتخني وبعدين تزعلي مني وتقولي لي انتي السبب
انا حطتها كتير ومجمدتش من تحت قلت ابردها واحطها في الثلاجة
واشوف حتطلع قطع ولا حتفضحني
جزاك الله خبرا