للكاتبه ارض الحزن
ابواب الامل الجزء الاول
في فله من فلل الشارجه ، كانت نوره قاعده في صالتها الفخمه ، وللعلم ترا نوره زوجة رجل اعمال مشهور ، متزوجه من حوالي عشرين سنه ، وعندها ولد وبنت …
واثناء ما كانت جالسه واتجلب في صفحات المجلات ، رن تلفون الصاله ، وما كلفت نفسها انها اتقوم من مكانها واتشل التلفون اللي ما يبعد عنها الا متر واحد بس ، وعلى الطول نادت الشغاله وقالت الها وهيه اتفاتن :
نوره : ميري وصمخ ، بسرعه ييبي التلفون .
الشغاله : انزين ماما .
وبسرعة البرق شلت الشغاله التلفون وعطته نوره ، ومع هذا صرخت فيها نوره وهيه اتقول :
نوره : شو ساعه ليما اتيبين التلفون ، يا الله زولي سيري المطبخ .
وبعد ما حملت التلفون ، حطته على اذنها بكل دلع وقالت :
نوره : الو ، من معاي .
ردت عليها اختها ا شما وهيه اتقول :
شما : هلا نوره اشحالج ، عساج بخير وعافيه .
نوره : الله ايعافيج حبيبتي ، انتي اشحالج .
شما : والله زينه ، وشو خبار ريلج ناصر .
نوره : اوف والله شو اقولج يا شموه ، متعبني ها الريل .
شما : ناصر متعبنج ، ما احيده يسويه جذيه ، معاج انتي بالذات .
نوره : صح كلامج ، بس ها الايام متغير وايد ، ليش ما ادري .
شما : كيف متغير يعني .
نوره : انتي الحين تعالي البيت عندي وانا بقولج انزين .
شما : اوكيه ، دقايق وبكون عندج .
وبعد دقايق معدوده كانت شما قاعده مع نوره في صالة فلتها وقالتلها :
شما : هاه خبريني ، شو السالفه ..
نوره : ناصر ، ما ادري شو صار له ، استوى عصبي وايد ، ويوم اكلمه ما يرد علي ، وقام يكشخ ويسير الاسواق بروحه مثل الشباب الصغار ، بعد ما كان ما يقدر يخطي شبر برع البيت بدوني ..
شما : معقوله .. ناصر عصبي !! عمري ما سمعته ايصرخ او شفته ايعصب ، انتي دوم اتعصبين عليه واتصارخين بويهه وهو ساكت .
نوره : وهذا اللي مينني ، ناصر اللي كان مثل الخاتم في صبعي ، واللي ما يشق خيط بابره بدون ما يشاورني ، انجلب ها الجلبه كلها ، انا بستخف …. اتصدقين امس يوم قلتله وين ياي صرخ علي وقال انتي مالج خص ، لا … وشوي ويضربني .
شما : انتي اكيد خرفتي ، او تتكلمين عن واحد ثاني ، ناصر اللي ما يستجرء يرفع عينه بعينج ، يعصب عليج .
نوره : من حقج ما تصدقين ، انا نفسي ما مصدقه ، من يوم ما خذته من عشرين سنه ، ما فكر مجرد تفكير ايقولي كلمه اتضايقني .
شما : بس انتي بصراحه وايد كنتي شاده عليه ، لغيتي شخصيته بالمره ، شانه مب ريلج ….
نوره : الرياييل ما ييون الا بالعين الحمره ، انا يوم خذته كان حافي ، ما عنده فلس واحد في جيبه ، والحين بفضل ذكائي وتوجيهاتي استوى رجل اعمال كبير …
شما : صحيح بس ناصر ذكي ومتفوق وكان يشتغل ليل نهار وكافح ليما كون الثروه وو.
نوره : وكل هذا بسبي انا ، لولاي ما سوا هذا كله ..
شما : والحين شو بتسوين .
نوره : والله ما ادري …
شما : نوره … انا اقول يمكن وحده ما خذه قلب ريلج ، وانتي قلتي انه قام يكشخ وايد كانه واحد من الشباب الصغار ويسير الاسواق دايما بروحه ..
نوره : انتي شو اتقولين ، انا كنت اذبحها بيدي ..
شما : ها الكثر اتحبين ريلج ..
نوره : حب ، هههه ضحكتيني والله ، احنا كبرنا على سوالف اليهال هذي ، انا اللي يهمني ثروتنا وثروة عيالي ، تبين وحده اتي على اخر الزمن وتلهف هذا كله …
شما : اللي محيرني ، انه لو كان فعلا متغير بسبب وحده ثانيه ، فليش ما سواها من زمان ، اشمعنى الحين عقب ما كمل خمسين سنه …
نوره : الرياييل كلما يكبرون يخرفون ..
شما : لالا ناصر ريال ناجح ، والعين عليه من كل الحريم ..
نوره : بس نسيت اقولج شي ، تراني ملاحظه شي ثاني عليه .
شما : مثل شوه .
نوره : مع انه دايما متوتر وعصبي ، لكني اشوف كئيب وايد ، يقعد بالساعات مع نفسه ويصيح ، وما يركز ، وفي الليل الاحظ انه جسمه يعرق بغزاره …
شما : اممم هذي شانها اعراض مرضيه .
نوره : يعني شوه ناصر مريض ؟
شما : احسن شي الحين انسير عن طبيب العائله ونوصف له حالة ناصر ونشوفه شو ايقول ؟
نوره : صدقج والله، يا الله عيل ، خلينا انسير الحينه …
وبعد فتره بسيطه ، كانت شما ونوره ، قاعدين عند طبيب العائله ، وشرحوله حالة ناصر بالكامل ، والتغيرات الكبيره اللي حصلته فقالهم :
الدكتور : اممم من كلامك اقدر اقول انه فعلا مب طبيعي .
نوره : كيف يعني يا دكتور مب طبيعي .
الدكتور : مستحيل يتغير الانسان فجأه ويكتئب وتتغير تصرفاته بها الطريقه اللي قلتيها .
نوره : انزين والحل يا دكتور .
الدكتور : بصراحه انا ما اقدر اعطيج علاج فعال لحالته الحين ، لازم تعرضين حالته على دكتور متخصص بها الحالات .
نوره : وليش انته مب دكتور .
الدكتور : انا طبيب ممارس عام ، وزوجج محتاج لطبيب نفسي .
نوره : ووين احصل ها الطبيب اللي اتقول عنه .
الدكتور : انا بكتبلج عنوان صديقي الدكتور عماد ، اخصائي في الطب النفسي .
نوره : مشكور يا دكتور .
وبعد ما كتبلهم عنوان الدكتور النفسي ، اتجهوا مباشرة لمكان عيادته ، وبعد ما دخلوا عليه ، وشرحوله كل تفاصيل الحالة … قال الهم ..
د. عماد : اممم كم عمر زوجج .
نوره : الحين تقريبا كمل خمسين سنه .
د. عماد: ومن متى اتيله ها الحاله .
نوره : من ايام بس .
د. عماد: ومن كم سنه متزوجين .
نوره : حوالي عشرين سنه .
د. عماد : وطوال ها العشرين سنه ما يتله ها الحاله ولا استواله ها التغيير ..
نوره : ابدا ابدا .. بس من ايام …
د. عماد : اممم ، طيب شو طبيعة العلاقات العاطفيه اللي بينج وبينه طول فتره زواجكم .
نوره : ما فهمت ، كيف يعني .
د. عماد : يعني قربكم من بعض ، الكلمات الحلوه المتبادله بينكم ، كلمات الغزل ، اللهفه والحب والحنان وو
نوره : دكتور شو ها الكلام ، هذي اشياء خاصه فينا .
د. عماد : لا تنسين يا اخت نوره اني طبيب نفسي ، ولازم اعرف جميع ملابسات وتفاصيل حياة المريض ، عشان اقدر اعطي تشخيص دقيق لحالته …
سكتت نوره ، وهيه ادور جواب … شو اتقول للدكتور ، اتقوله مثلا ان عمرها ماقالت لزوجها كلمة حلوه ، ولا عطته لحظة حنان وحده ، وانها كانت متحكمه فيه من الالف الى الياء ، ما يتحرك الا بشورها ، وكانت دايما تصارخ وتتأمر عليه …. ومع هذا قالت …
نوره : امممم علاقه طبيعيه بين أي زوجين ….
سكت الدكتور وكأنه فهم قصدها … وقال
الدكتور : امم شوفي زوجج يعاني حاليا من مرض نفسي .
نوره : مرض نفسي !! شو السبب …
الدكتور : سن اليأس …
نوره : انته شو اتقول يا دكتور سن اليأس يصيب الحريم مب الرياييل .
الدكتور : انا ما قلت كل الرياييل ، بعض الريايل يعانون من سن اليأس يوم يتجاوزون سن الخمسين، وهذي حالات قليله ، ويعانون من الأعراض الملازمة لسن اليأس ، تماما مثل الحريم بالضبط ، الكآبة والتوتر العصبي وضعف التركيز الذهني وفقدان الرغبة في العمل وهبوط النشاط الجنسي، إضافة إلى نوبات التعرق الغزير والشعور بالاحترار، والسبب انخفاض مستوى هرمون الذكورة في جسم الرجل مع التقدم في السن، وضعف العلاقات العاطفيه أو انعدامها ، وتزداد حدة أعراض سن اليأس عند الرجال المرموقين الذين يتميزون عادة بارتفاع نسبة الهرمون في أجسامهم فترة الشباب، ويؤدي انخفاضه إلى نزعات التصابي وولع الرجل المفاجئ في ارتداء ملابس الشباب وتقليد تسريحة شعر المراهقين وملاحقة الفتيات والتغزل فيهم وممكن يسوي أي تصرف غير متوقع مهما كان غريب ..
نوره : دكتور انا مب فاهمه نهائيا كلامك هذا ، عطنا العلاج وخلنا انروح ، وبلاش فلسفه طبيه ارجوك …وبعدين ريال اشكبره بيركض ورا البنات ويغازلهم ليش…
الدكتور : انا شرحت حالته بالضبط .
نوره : والحل شوه … اوصفلنا دواء .. وانا مستعده اشتريله مهما كان الثمن ..
الدكتور : للاسف ما عدنا دواء او علاج مادي نقدر نعطيه اياه ..
نوره : عيل كيف انعالجه ..
الدكتور : ما في غير علاج واحد بس ..
نوره : كيف يعني ، فهمني اكثر ..
الدكتور : انا بفهمج ، بس اسمعيني بعقل ، ولا تنفعلين ، لان اللي بطلبه منج صعب وايد ، ولكن اكيد بتتفهمين الموقف ، لمصلحة زوجج .
نوره : قول وانا بحكم ..
الدكتور : العلاج النفسي الوحيد لحالته هذي هو انه ……….
ولما نطق الدكتور بطريقة علاجه ، ثارت اعصاب نوره مثل البركان ، وكانت على وشك انها تقبض رقبة الدكتور وتزغده ………..
البقيه في الجزء التالي …………………….
انا في الانتظار
ابواب الامل – الجزء الثاني
انفعلت نوره بشده يوم سمعت كلام الدكتور ، لان الحل اللي طرحه الدكتور كان اينرفز بالفعل ، وينرفز أي حرمه في العالم ، حيث انه قالها : ماشي حل لحالة ريلج الا انه ايعرس ….
ولحظة ما سمعت نوره ها الكلمه ، ومن شدة انفعالها ، قامت من مكانها ومسكت بدلة الدكتوربايدها ، وصرخت عليه وهيه اتقول :
نوره : انته شو تقووول ، انته تشتغل دكتور ولا خطابه ، وبعدين انته شايف اللي جدامك حطبه ، مب شاني زوجته .
رد عليها الدكتور وهو متوتر : يا مدام استهدي بالله وهدي بدلتي ، والله انها بدله ايديده اليوم بس لابسنها .
نوره : عيل هذا كلام اتقوله .
الدكتور : يا مدام ،انا قلتلج حقيقه مرض زوجج والحل الامثل لعلاجه .
نوره : خلاص مانبي علاجك ، خله حقك .
الدكتور : خلاص عيل اتحملي النتائج اللي بتصير .
سحبت نوره ايدها عن بدلة الدكتور وهيه اتقول : وشو بيستوي يعني .
عدل الدكتور بدلته وهوه يقول : ريلج الحين في حالة اضطراب نفسي كبير ، وممكن يسوي أي شي مهما كان .
نوره : انا سألتك شو بيسوي .
الدكتور : مب بعيده اتشوفينه بعد يوم او اثنيه او شهر داخل عليج بحرمه ثانيه
نوره : يسويها ويشوف اذا ما امسح شيفته من الدنيا .
الدكتور : وعشان جذيه لازم انشوف حل ايقلل الاثار السلبيه لها المرض .
نوره : والحل اللي عندك انه ايعرس ، ما سوينا شي يا الذكي .
الدكتور : سمعيني زين يا مدام ، انا قلت ايعرس ، بس ما يكون عرس دائم .
نوره : وضح اكثر، كيف يكون العرس مب دائم .
الدكتور : انا بضربلج مثال عشان اقربلج الصوره اكثر ….. لوعندج سياره وغرزت في الرمل شو بتسوين .
نوره : اكيد بدور حد ايدزلي السياره ليما تطلع .
الدكتور : وبعد ما تطلع بتحتاجين حد ايدزها .
نوره : لا طبعا ، بتمشى طبيعي مثال ما كانت .
الدكتور : عليج نور ، السياره كانت بوضع مب طبيعي عشان جذيه كانت محتاجه دفع ، ليما رجعت لحالتها الطبيعيه ، وبالتالي فأن الدفع كان مؤقت مب دائم .
نوره : وشو علاقة السياره والدفع بريلي .
الدكتور : ريلج الحين مثل السياره المغرزه ، يعني وضعه الحين مب طبيعي ، ومحتاج لقوة دفع اطلعه من وضعه الغير طبيعي وتوصله لوضعه الطبيعي .
نوره : يعني قصدك ايعرس لمده محدوده بس .
الدكتور : هذا بالضبط اللي بغيت اقوله ، ريلج محتاج لتغيبر مفاجىء وكبير في حياته ، ليما يرجع لحالة التوازن الطبيعي في شخصيته ، ريلج الحين يعيش فترة ياس ومراهقه متأخره ، والتغيير مطلوب جدا في ها المرحله ، ليما يجتازها بنجاح ويستقر نفسيا .
نوره : يعني اعرسه لمدة كم يوم.
الدكتور : اسبوع واحد فقط كافي .
نوره : وانا وين بدور وحده تقبل تتزوج ريلي اسبوع واحد بس .
الدكتور : والله في هذا انتي وحكمتج ، بس في شي ثاني لازم اتعرفينه .
نوره : شو بعد .
الدكتور : الريال في ها الحاله ، بيكون مثل المراهق الصغير ، وقلبه مثل الارض الخصبه .
نوره : شو تقصد .
الدكتور : ممكن يتأثر وايد بالحرمه اليديده ، ويحبها بشده وعمق ويتعلق فيها وو .
نوره : شو ها البشاره الحلوه اللي بشرتني فيها ، انته ما وراك الا المصايب .
الدكتور : انا وضحتلج الصوره كامله ، وانتي تتصرفين على كيفج .
نوره : انزين مشكور دكتور انا باتصرف ، يا الله بااااااي .
الدكتور : مع السلامه .
وبعدها قامت نوره واطلعت من غرفة الدكتور ، واول ما سكرت الباب وراها ، قال الدكتور بينه وبين نفسه : حشا … مب حرمه هذي ، هاذي عزرائيل واقف جدامي ، انا ما دري كيف ريلها اتحملها عشرين سنه ،، مش غريبه انه يتخبل منها ، مب ايصيبه مرض نفسي بس …
طلعت نوره من غرفة الدكتور وهيه متوتره ، ومن شدة توترها ما شافت الحرمه اللي كانت تمشي في الممر اللي يوصلها لباب الخروج من العياده ، وعند تقاطع الممرات دعمت الحرمه بقوه وطاحت شنطتها في الارض ، ولحظتها صدت صوب هاي الحرمه وهيه تصرخ :
نوره : انتي شوه عمياء ما تشوفين جدامج .
الحرمه : انا اللي ما اشوف واللي انته العوره يا الدعمه ..
نوره : ويييه انتي ليش اتكلميني جذيه ، انتي عارفه اتكلمين منوه ..
الحرمه : عدال … من اتكونين يعني ..
نوره : صدق اللي ما يعرف الطاووس ايسويه مجبوس … حبيبتي ، انا بنت سالم والكل عني عالم .
الحرمه : عشتوا ما سمعنا عنش ، وانا بعد اذا ما تعرفيني ، انا بنت علي ولا وراي ولي .
وعلى طول حاولت نوره انها تمسك الحرمه وتنشعها ، لولا تدخل اختها شما اللي مسكتها وهيـه اتقول :
شما : نوره ، الله ايهداج ، خليها تولي ، احنا مب فاضين .
نوره : معاج حق احنا مب فاضين لها الاشكال .
وانصرفوا في الحال من العياده ، وركبوا السياره ، وكانت نوره متوتره وايد ، ومع انها كانت اتفكر الا ان لسانها ما ارتاح لحظه من اللغوه وهيه اتقول :
نوره : مصيبه مصيبه طاحت على راس اختج يا شموه .
شما : هدي اعصابج وخلينا انفكر بعقل .
نوره : انا تم فيني عقل افكر فيه ، يا خراب بيتج يانوروه .
شما : اذا تميتي جذيه ما بنوصل لحل .
نوره : أي حل ، انا وين احصل حرمه تقبل تتزوج ريلي اسبوع واحد .
شما : بندور واكيد بنحصل وو
نوره : وين قولي لي وين .
شما : بندور وحده هنديه او اجنبيه ترضى با سبوع واحد ، وبنعطيها كم فلس .
نوره : نوره بنت سالم يتزوج عليها ريلها هنديه ، وين اودي ويهي من الناس ، وبعدين انتي نسيتي ان الدكتور قال انه ريلي ممكن يحب الحرمه اليديده ويتعلق فيها ، ساعتها بتكون فضيحتي بجلاجل .
شما : كلامج صحيح .
نوره : وبعدين اشدرانا ان الحرمه اليديده ما بتقص علينا ، ممكن تلعب بعقل ريلي ، خصوصا انه ريال غني ، والفلوس اللي بتحصله منه اضعاف الفلوس اللي ممكن نعطيها اياه .
شما : كلامج معقول ومنطقي ، المسأله يبالها تفكير .
نوره : هيه يبالها تفكير وايد بعد ، لازم نتصرف بسرعه ما شي وقت ، ناصر باي وقت ممكن ايسويها ويعرس ، واللي بينته بعشرين سنه بينهد بلحظه وحده ، انا ما اتخيل وحده ثانيه اتشاركني ثروتي وثروه عيالي ، انا بتخبل ساعتها وو .
شما : خلينا نهدى شوي واكيد بنحصل حل ….. المهم الحين ، احنا وصلنا البيت ، خلينا نرتاح وبعدين يصير خير .
وبعد ما وصلت نوره اختها شما لبيتها ، اتحركت في اتجاه بيت ريلها ، وكلها دقايق وكانت يالسه في الصاله واتفكر ، حاولت تنسى الموضوع لكنها ما قدرت ، كل الحلول ما تعالج المشكله ، واثناء ما كانت اتفكر بعمق ، سمعت صوت الشغاله وهيه اتقول :
الشغاله : ماما ماما .
نوره : وثول ، شو تبين .
الشغاله : في حرمه ايريد انتي عند الباب .
نوره : أي حرمه هذي بعد ، ما قالت اسمها منوه .
الشغاله : اتقول ان اسمها زينه من العين .
نوره : زينه من العين !! منو هاي زينه من العين ….. ايوا ايوا الحين اتذكرتها هذي زينه بنت خالة المرحومه أمي ، والله سنين ما شفتها ، يمكن من يوم ما توفت امي قبل خمس سنوات ، زينه اللي قالت امي عنها انها ساكنه في العين مع اخوها ، وما عندها ريل ولا عيال وهيه اصغر من المرحومه امي اللي اتصير بنت خالتها سنتين بس …
وعلى طول قالت للبشكاره بعد ما اتذكرتها …. خليها ادش …
وبعد ما دشت الحرمه بدت بالسلام وقالت :
زينه : السلام عليكم والرحمه .
نوره : وعليكم السلام والرحمه خالوه زينه اشحالج .
زينه : الله ايسلمج بنيتي ، شخبارج انتي وشخبار العيال وابو العيال .
نوره : كلنا بخير وسهاله .
زينه : الحمدالله رب العالمين ..
و نادت نوره على الشغاله وقالتلها : الفاله يا ميري …
وبعد ما قعدوا وفولت الحرمه وشربتها الشاي قالت الها الحرمه :
زينه : بنيتي ، انا حاسه انه في شي شاغل بالج .
نوره : وانتي اشدراج خالوه .
زينه : انا حرمه عوده وعندي تجارب وايد في ها الدنيا ، واقدر اعرف مشاعر الانسان اللي جدامي من عينه بس .
نوره : الحياه كلها تعب وهموم .
زينه : صح الحياه كلها تعب ، بس الهم اللي فيج مب هين ، باين عليه جايد ..
فكرت نوره بكلام زينه ، واتذكرت امها يوم كانت اتقول الها ان بنت خالتها زينه ، حرمه عقلها كبير ، وان مخها عن خمسين ريال مجتمعين ، وان الحريم كانوا دايما ياخذون برايها ومشورتها , وقالت نوره في نفسها : انا ليش ما آخذ رايها ، يمكن هيه اتشوف حل انا ما اشوفه بحكم خبرتها الطويله … وعلى طول قالت للحرمه :
نوره : بصراحه خالوه ، في شي متعبني وايد ، وانا ما ابغي اتعبج واعور راسج بهمومي .
زينه : افا عليج افا يا بنيتي ، انتي شرات بنتي ، والمرحومه امج مثل اختي .
نوره : انزين انا بقولج وامري لله .
وقالت نوره القصه بالكامل لبنت خالة امها زينه …. وبعد ما انتهت ,، قالت :
نوره : وهذي كل السالفه … ريلي اللي كنت ماسكتنه بيد من حديد عشرين سنه كامله ، فلت عني فجأه .
سكتت زينه فتره بعدين قالت : اممم صدق هذي مشكله .
نوره : والحين شو اسوي برايج .
زينه : صعب انج اتحصلين وحده ترضى تتزوج ريلج اسبوع واحد ، وحتى لو حصلتي صعب انج تثقين فيها وتضمنينها ، ممكن جدامج ترضى وتوافق مقابل الفلوس ، وبعدين تتغير ، خصوصا ان ريلج مليونير وغني وماشي فلوس ممكن اتعوضها عنه مهما كان ، خصوصا انها بتكون شريكتج حالج حالها بثروة ريلج وملايينه وممكن اتخليه ايحبها وتطلعين انتي من السالفه كلها بلوشي ، وممكن بعد خلال ها الاسبوع تحمل منه واتييب ياهل يقعد عظم في بلعومج ، ويورث معاج نص الثروه .
نوره : وانا قلت جذيه بعد ، وعشان جذيه محتاره .
زينه : معاش اللي ايحيرج وزينه معاج .
نوره : شو قصدج ، اذا عندج حل الحقيني فيه الله ايخليج .
زينه : اساس المشكله ، كيف انحصل وحده تتزوجه ، وبعد اسبوع يفترقون نهائيا غصبن عن الاثنين حتى لو حباها ريلج ، وبدون ما يكون الها أي حقوق ماديه عنده ……
نوره : هذا الشي اشبه بالمستحيل .
زينه : ما في شي مستحيل عند زينه ،، امممم خلاص لقيتها ، هذا هو الحل الوحيد اللي تضمنين فيه ميه في الميه انتهاء علاقتهم نهائيا بعد اسبوع واحد بس .. وبدون أي حقوق ماديه الها عندكم …. ولكــــــن …
نوره : لكن شوه بعد .
زينه : الحل محتاج لجرأه وقلب قوي ودهاء ، ومخاطره .
نوره : انا مستعده اتحالف مع ابليس ، بس ريلي وثروته ما يضيعون عني ، مستحيل اخلي تعب السنين والملايين اتضيع عني بلحظه …
زينه : عيل سمعيني زين بقولج تفاصيل الخطه بالكامل….
وبدت زينه بشرح خطتها العجيبه ، وكانت خطه فظيعه ، خطه ما اتصورتها نوره ابدا ابدا….. خطه ما تطلع الا من شيطان مريد …………….
السلام عليكم ورحمة الله وبركاته … 
افااااا عليج بس يااااااااااا أختي ..روح البنفسج 
وين باقي القصه ….حرام أندمجت.. 
أترياها منج بسرعه ..
أختك
الفانيـــه