الأخوات العزيزات السلام عليكم و رحمة الله و بركاته، معلش اتأخرت أوي عليكم
و الأخت العزيزة الغالية sweety lady معلش يا حبيبتي اتأخرت في الرد عليكي لأني كنت مشغولة جدا لحد امبارح في عمل الكحك وما أدراكي ما الكحك في مصر دوشة و وجع دماغ و العيلة و الجيران بيتجمعوا عشان يساعدوا بعض في عمل الكحك 
و بعد ما نخلص من العجين و تقطيعه نقعد نتحايل على اخوانا و أزواجنا عشان يروحوا الفرن يخبزوه و بعدين يقفوا هناك يستنوا دورهم و بعدين يستنوا الكحك لما يستوي و لما يبرد و يستنوا العامل عشان يحطه على العربية و بعدين ييجوا يدوروا على حارس العمارة عشان يطلعه المهم مش هاوجع راسك بالكلام ده و هاقول لك على طريقة الفطير بسررررررررعة.
الطريقة:
بصي بقى الفطير هنا مالوش مقادير محددة لكن كيلو الدقيق بيعمل فطيرتين من الحجم الكبير أو 4 فطيرات من الحجم الصغير.
تجيبي دقيق زي ما تحبي و تحطيه في طبق العجين و ترشي عليه ذرة ملح و بعدين تضيفي الماء شوية شوية وتعجني كويس لحد ما تتكون عندك عجينة متماسكة قطعيها على عدد الفطير اللي هاتعمليه و غطيها و سيبيها حوالي ساعة .
حطي كمية من الزبدة على النار لحد ما تتفكك و ادهني طاولة كبيرة بالزبدة و افردي العجين بالنشابة و بعدين شدي العجين من الأطراف شوية شوية عشان تفرديه و حاولي انه ما يتقطعش لحد ما تتفرد العجينة و تبقى رقيقة جدا جدا و بعدين ادهني العجينة كويس بالزبدة و اثنيها من الأطراف بحيث تبقى أطرافها متقابلة و بعدين ادهنيها بالزبدة تاني و كرري نفس الخطوات السابقة لحد ما تبقى العجينة شبه دائرة قطرها حوالي من 10 الى 15 سم و بعدين ادهني الصينية بالزبدة و حطي فيها العجينة و افرديها في الصينية و حطي على وشها قطع صغيرة من الزبدة و دخليها فرن ساخن لحد ما تستوي و يتحمر وشها و قدميها مع عسل النحل و القشطة أو الجبنة أو زي ما تحبي و بالهنا و الشفا
ملحوظة هامة جدا:
السر في ان الفطير يطلع حلو انك تفرديه كويس أوي أوي على أد ما تقدري خاصة الأطراف و انك تدهنيه كويس بالزبدة و كل ما تحطي زبدة أكثر كل ما يطلع الفطير أحلى.
و عيد مبارك وسعيد عليكم وعلينا
آمين يا رب العالمين
أنا من زمان نفسي بكعك العيد على الطريقة المصرية، ياريت لو مافيها غلبة تعطينا الطريقة وأكون شاكرة لك جدا
لاكن الي انااااااااا ذقتها الجبن يكون داخل العجينه………كيف اعملها.