اخوتي في الله
احمد … الشاب الصغير الرائع بكل معنى الكلمة … اللي من اول ماتعرفت عليه ولغاية دلوقتي نفسي اشوف الضحكة اللي فعلا تطلع من قلبه … مش الضحكة او الابتسامه اللي بحس بيها بألمه …. على فكرة هو والله راضي بحكم ربنا … وانا اتكلمت معاه ووضحتله في سياق الكلام ان ممكن هو ده يكون قدره … رد عليا بأنه مش هيكون متضايق ولا حاجة وانه الحمد لله مبسوط ….ولأنه احمد اساسا كلامه قليل شوية هو كان رده (مش مشكله ) … لكن … تقولوا ايه لو انتم شايفينه … تقولوا ايه … لما تحسوا بانه بيبلع ألمه قدامك عشان متحسش بألمه … تقولوا ايه .. لما تشوفوا الناس اللي على اد حالها شايفين الدكاترة والعلاج بس مش قادرين عليه … وانه حالته دي فيها امل بس هو مش طايله ….
تقولوا ايه ….
لما تعرفوا أن الرأي اللي اجمع عليه كل الدكاترة … أن حالته فيها امل للعلاج قبل مايبلغ … لكن لو بلغ … الامل في علاجه هيبقى ضعيف جدا جدا جدا …
ولما تعرفوا انه كمان عنده 15 سنه … وانك تحس انك عايز تسابق الزمن وتمشي في سكة علاجة قبل مالأمل ده يتضائل قوي ………… .
ولما أقوله … عايزاك تشد حيلك ياباشمهندس في المذاكرة … ماقولتليش نفسك تطلع ايه ؟ …. قالي نفسي اطلع دكتور … قلتله باستغراب اشمعنى يعني ؟… قالي عشان اساعد الناس اللي زي ؟ …
على فكرة انا بكتب في الحالة دي دلوقتي لخامس مرة … ومش هيئس انكم تقفوا جنبي وجنب اخوكم احمد الصغير … بالمساعدة بأي حاجة .. حتى ولو بالدعاء بس…
هو دلوقتي احنا واقفين على الاشعه والتحاليل وعلى اساسها الدكتور هيحكم اذا كان فعلا محتاج لحقن ال growth hormones ولا لأه ….
هو في دكتور ربنا يكرمه بجد …هو في معهد ناصر حاول كتير معانا عشان نعمل لاحمد الاشعه تبع التامين في المعهد …. لكن للاسف التامين مرضوش يدوا احمد الجواب … فالدكتور بعته لمستشفى الباطنه اللي تبع القصر العيني … لدكتور هناك برضه .. بس انتوا بقى عارفين المستشفيات الحكومية والدوخه بتاعتها …. ولغاية دلوقتي هو راح مرتين هو ووالدته وكل مرة يروحوا … اوراق وطلوع ونزول ودوخة فعلا… وماعملش الاشعة لغاية دلوقتي …. وللاسف انا مش عارفة الدكتور ده عشان اتابع معاه الحالة في التليفون حتى …
فعشان كده … انا بناشدكم بجد ياجماعه اللي يقدر يروح معاه المشوار ياريت … لأن الوضع فعلا رجع زي الاول وكأننا ماعملناش حاجة .. ياريت بجد متطوعه او متطوع منكم يروح معاه ويفهم من الدكتور ايه الوضع وايه المطلوب وهل الاشعه دي هنقدر نعملها ولا لأه … طب ولو مش مجاني هتبقى بكام … ياجماعه للاسف انا مش قادرة افهم الحاجات دي لأني مش قادرة اروح معاهم … ووالدة احمد مش متعلمه وفهمها بسيط .. وكل مرة تقولي انا مش فاهمه حاجة … واحمد برضه مش عارفه افهم منه …
فارجوكم ياجماعه اللي عايزيساعد … او يشارك معانا بالمجهود انه يروح معاه في الكشف او الاشعه او حتى التحاليل .. بس يبعتلي اميل او يتصل بيا …وربنا ييسر ان شاء الله .. وماتنسوش ( خير الناس انفعهم للناس)..
وعلى فكرة جزى الله خيرا كل من ساهم معي في الحل وكل من اهتم … وياريت ياجماعه بجد تفضلوا معايا للآخر … وافتكروا ( أن يد الله مع الجماعه) …
نقطة اخيرة كنت عايزة اوضحها للجميع …. عشان محدش يقول اني ببالغ في وصف حالته … يمكن اغلب الناس تشوف ان وقف النمو دي حاجة مش مؤلمه قوي .. او ان الموضوع ده مش خطير للدرجه … ايه يعني لما يكون قصير ورفيع شويه .. وحتى ولو فضل على كده … مش هيموت يعني …….. ماشي انا معاكم مش خطير ومش هيموت من المرض او الجوع … اه .. لكن هيفضل طول عمره بتألم .. ألم معنوي ..وخاصة لما يكبر .. ويشوف نفسه صغير .. واللي حواليه كلهم رجاله .. هيفضل يتألم لما يكون عارف انه كان فيه امل لعلاجه وانه يبقى زي بقية البشر … بس ضيق ذات اليد هي اللي منعته ..
وجزاكم الله خيرا
أختكم في الله
رانيا
– يمنع وضع أرقام الهواتف في المشاركات إلا بموافقة إدارة الموقع …
وعليكم السلام ورحمه الله وبركاته
هلا ومرحبا فيكِ غاليتي أميرة سعيد …
حاله االشاب أحمد مؤلمة جداً ولكن ما يبعث في النفس
الأمل أن حالته غير ميؤس منها وهناك أمل في شفاءة
ورب العالمين قادر على أن يشفية ويسخر له من يساعدة
ويقف بجانبة …
الجمعيات الخيرية منتشرة في كل أنحاء الوطن العربي
فمن الممكن أن أهل أحمد يتوجهوا إلي الجهات المعنية
و يطلبوا منهم العون والمساعدة …
نسأل الله العظيم رب العرش العظيم أن يشفية ويعافية
ويسخر له من يساعدة …
واتمنى له الشفاء العاجل