بسم الله بدينا وعلى النبي صلينا .. اي يابنياتي امهاتنا قبل علمونا الاكل الزين اللي ريحته خنينه وانا بعلمكم الطبخ الزين .. شوفوا اول شي لازم تحددون العدد واليوم بنطبخ حق 5 انفار مجبوس لحم .. يعني اللحيمه تقدرونها انتوا والعايش يكون 3 جيلات لاتصيرون بخله حطوا زايد ولا تسون سوات مرت الابو؟؟
اول شي تيبين اللحيمه وتغسلينها غسالن سنع تفركينها فرك بايدج اكثر من مره لما يصير لون الماي صافي ويطلع منها كل الزنخ .. مفهوووووووووووم .. بعدين تجهزون الجدر اللي بتفوحون فيه اللحيمه .. تحطين مويهه بالجدر وعليها جم عويد دارسين خشن وجم حبيبة فلفل اسود خشن وحبيبات مسمار خشن وهيل هم خشن.. خشن الله ويه العدو .. وتقصين بصلتين ارباع وجم فص ثوم .. ويه ادري الخدامه بتسوي كل شي .. وتحطينهم فوق الماي لما يفوح تحطين اللحيمه بالماي ومن يفوح الماي يبي بهار مخلوط عاد اكيد تعرفونه وتحطين منه شوية على اللحم وتنطرين لمدة ساعه وربع او اكثر على حسب نوع اللحيمه .. وبهل فتره تغسلين العيش طبعا غسيل العيش مايبيله شي .. تحركينه بالماي اكثر من مره لما يصفى لون الماي وبعدين تنقعينه بماي حار وفوقه ملح وتخلينه على كتر ..ماعليكم من امهاتكم ادري بقولون مايصير يتنقع العيش بماي حار قولولهم مالكم شغل.. الحين نرجع حق اللحم عقب ساعه من الفوح تحطين عليه الملح طبعا تحطين الملح شوي شوي وتذوقين طعمه مفهوووووووم ؟؟ مابي اقولج حطي هل كثر ملح ادري ماراح تفهمين لان المخ مصدي اللهم ما ياكافي .. الحين خلص اللحم هني تشيلين اللحيمه وتحطينها بصينيه وتشخلين ماي اللحم من البهار وبعدين تيبين الجدر وتحطين فيه شوية ماي وتكبين فوقه العيش وخلي الماي يصير فوق العيش بشويه مو تغرقينه ويصير مريس؟؟ وتخلينه يتسكر على راحته ..ومن يبدي الماي يخف وماتشوفينه حطي حديده تحت الجدر وخليه على نار هاديه .. الحين تروحين حق اللحم وترشينه بدارسين ناعم وهيل ناعم وتقلينه ومن يخلص القلي تحطينه فوق العيش وتسكرين الجدر
وطبعا تكونين مزهبه الحشو والزعفران .. الزعفران تنقعينه بماي ورد اذا كان عندج ولا ماي عادي ..وتخلينه على كتر .. الحين نتكلم عن الحشو
الحشو يابناتي عباره عن بصل مقصص صغار وكشمش ونخي .. تغسلين الكشمش وتنقعينه وتغسلين النخي وتفوحينه شوي او يكون منقع من فتره هذي طريقه وهذي طريقه المهم تيبين البصل وتحمسينه بجدر طبعا بدون دهن او شي ثاني تخلينه يزل مايه وتحركينه باستمرار ومن يتلزق رشي عليه شوية ماي وتحركينه لما يقلب لونه ويصير شوي محومر او ادعم ..عسى مك مغبر يدعم ابليس واهله .. بعدين تحطين فوقه الكشمش والنخي وتحركينهم وتحطين فوقهم لومي سحاري ناعم وشوية فلفل اسود وشوية ملح وفي ناس يحطون شوية بهار مخلوط هم حلو وتحركينه واذا شفتيه يتلزق حطيله شوية ماي وحركيه لما ينشف الماي وهني خلص الحشو .. شيلي الحشو وحطيه بنفس الجدر اللي فيه العيش واللحم على كتر عشان العيش ياخذ ريحة الحشو وتيبين الزعفران وترشينه فوق العيش واللحم والحشو وتسكرين الجدر عشر دقايق ونجبي وعليج بالعافيه .. طبعا الدقوس تعرفون تسونه وماله داعي اقولكم .. وان قال ريلج وايد حلو قوليله اي عليك بالعافيه بس لايكون تحسب اني بطبخلك كل يوم لا انا طبخت بس عشان اوريك اني اعرف .. ودايم حطيله معبوج وكثري منه عشان يحترق انزين؟؟ ولاتنسين تحطين فلفل احمر على الرقي وبالدقوس كثري الفلفل عشان لايدلع عليج ويطلب غدى كل يوم .. زز
والحين يالله مطابخكم و يعله منزول العافيه
وسلامتكم
خليتكم بعافيه
حذفت الايميلات من كل المواضيع من قبل المشرفة