دى طريقتى فى تتبيلة الفراخ المشويه بعد تجارب عديده وتفحيص وتمحيص فى جميع الوصفات
اخيييييييييييييرااااااااااااااااااا
دى الطريقه اللى عجبتنى انا وجوزى وكل اللى داقها الحمد لله
نبتدى بسم الله
دى مقادير تتبيله فرخه واحده متوسطه الحجم
بصله كبيره مقطعه
واحده طماطم كبيره مقطعه
قرن فلفل اخضر كبير مقطع
3 فصوص ثوم
ربع كبايه خل
2 ليمونه متوسطه او واحده كبيره بنزهير " هانقطعه ونستعمله بقشره"
فلفل احمر حااااااااار 
"حسب الرغبه"
معلقتين كبار زيت
معلقه كبيرة كاتشب
ملح – فلفل – كمون – كسبره ناشفه – قرفه – بهارات مشكله
الطريقه :
نجيب الفرخه الحلوه الكلبوظه وطبعا بعد ماتتغسل كوبس اوى بالدقيق والخل والملح نقطعها 4 قطع او 6 على حسب الرغبه
نغرز السكينه فيها كده عشان نعمل شقوق صغيره تخليها تشرب التتبيله
نحط بقى كللللللللللللللللللللللل مقادير التتبيله دى فى الكبه بتاعة البصل ونفرمهم مع بعض كويس اوىىىىى لحد ماتبقى سايله.
نصفى التتبيله دى كويس بالمصفاه ونعصرها بايدينا لحد ماتنزل كللللل السائل اللى فيها
وبعدين نصب الخلطه على الفراخ ونقلبها فيها كويس عشان الفراخ تتشربها
تتبلى الفراخ قبل الشوي بيوم وبعدين لما تييجى تشويها على الفحم صفيها الاول من التتبيله ودوقى احلى فراخ مشويه عالفحم وبالهنا والشفا
تجيبى صينيه وتقطعى فيها شرايح بطاطس وشرايح بصل وطماطم وفلفل اخضر وترصى الفراخ عليهم بحيث ان الخضار يحمى الفراخ من الصينيه
ودخليها الفرن " مش على الشبكه على ارضية الفرن عادى " وتكونى مسخنه الفرن قبلها وتحطيها على نار هاديه لمدة ساعه ونص او لحد ماتحسى انها استوت بيكون وشها اتحمر لوحده ممن غير ماتشغلى الشوايه
ولو احتاجت تحطى شويه ميه فى الصينيه لو حسيتى ان الخضار هاتلزق اوى حطى بس شويه بسيط
ولما تطلع تعملى لها فحمه سخنه عالنار وتصبى عليها شويه زيت وتغطيها بسرعه هاتاخد نكهة المشوى
بهاراتى المسكله اللى باعملها فى البيت عباره عن : عيدان قرفه – حبهان حب – ورق لورا – زر ورد – قرنفل حب – كبابه صينى حب – جوزة الطيب
تطحينيهم كلهم مع بعض وتعينيهم فى برطمان وتستخدميهم فى الشوربه او تتبيل اللحوم او حتى الرز البسمتى وانتى بتعملى كبسه اوبريانى
ويارب تكون عجبتكم
دمتي بود
شكلها خلطه رهيبه
تسلمولى كلكم
ويارب تعجبكم ان شاء الله لما تجربوها
وماتنسوش تدعولى
انتى لما بتفرمى التتبيله فى الكبه بتبقى شبه سايله وفيها حتت بصل وطماطم وفلفل انتى بتحاولى تنعيميها على اد ماتقدرى
وبعديت تحطيها فى مصفاه وتعصريها اوى تنزلى كل الميه اللى فيها
وبعدين تاخدى الميه دى وتتتبلى بيها الفراخ
يعنى الميه الناتجه عن التصفيه
واى سؤال انا فى الخدمه
وشكرا على مرورك الجميل