…أزيكم يا بنات وحشتوني جدا جدا ووحشني الركن …..من كام يوم كان عملت حفله لجوزي وقلت خليني جدعه وأصون العشره وأقوم أعمل تورتايه….وقد كان….وسمتها تورته ال10 أيام..حاجه زي عجينه 10 دقايق كده ….ليييييييييييييه بقي ال10 أيام….لأن المطبخ بالظبط تقريبا مكنش فيه مكان أحط فيه معلقه أنا كنت ناويه أعملها فيوم وتاني يوم أزوقها …إندمجت بقي وكركبت الدنيا وخرجت من المطبخ لقيت الساعه 3 الفجر ….وطبعا فضلت أروق وأنضف لحد ما نمت وأنا واقفه والتعب اللي تعبته محتاج 10 أيام علشا أريح ..رغم إن التورته يدوب قد الكتكوته…
…وأنا هنا في خطوات مصورتهاش لأن مكنتش قادره بصراحه من التعب كنت خلاص الوقت أتأخر ومش شايفه أصلا حتي صورت من غير ما أدهن الكنتالوب بالجيلاتين….
…إتكلمت كتير أوي ,.,,ندخل في المهم….
ملاحظاتي في عمل الكيك الإسفنجي..
-إستخدام ورق الزبده في التبطين مع دهن الصينيه بالزبده وتحضر قبل ما تبدأي العمل ..وعدم تبطينها بالد…ملاحظاتي في عمل الكيك الأسفنجي….
قيق
-تسخين الفرن علي 170 قبل بدأ العمل
-جميع المكونات بدرجه حراره الغرفه
-نخل الدقيق مع المحسن أو البودر مرتين أو تلاته
-الكيك الأسفنجي أصلا لا يدخل في مقاديره البودر لكن في ناس بتستخدمه وأنا أستخدمت محسن
-مقدار الخليط يملأ أكتر من تلتين أرتفاع الصينيه علشان يعطيكي أرتفاع معقول وده طبعا مع أستخدام أرتفاع أضافي من ورق الزبده
-أضافه قطرات من عصير الليمون وده بيساعه الكيك أنه يحتفظ بقوامه المرتفع
-حركه المضرب طول فترات الضرب في أتجاه واحد فقط
-عدم فتح الفرن مطلقا قبل مرور نص ساعه وعند فتح الفرن لا يتم سحب الكيك للخارخ في وجود أي تيار هواء
-بعد النضج تترك الكيكه لحد ما تبرد تماما وتسوي الأطراف والسطح
-أستخدمي الخله بغرسها أفقيا وعرضيا علي الكيك لتحصلي علي شرائح متساويه
-متستخدمش ميه الكمبوت لدهن الكيك لأن طعمه بيغير لو فضل الكيك في التلاجه
-الكيك أعمليه فيوم وخلي التزيين لليوم التالي علشان متزحميش نفسك أو ممكن تعمليه الصبح والتزيين بليل
-خلي الكيك يبات في التلاجه بعد ما تخلصي شغل ده بيخلي نكهته وقوامه أحلي كتير جدااا
..بسم الله نبدأ
المقادير:
–6 بيضات حجم كبير+فانيليا(كل بيضه ليها كيس فانيليا)
-كوب وربع سكر مطحون ناعم
-كوب وربع دقيق(أنقصي من المقدار ملعقه ونص كبيره دقيق وأستبدليهم بالنشا)
-نص ملعقه ص محسن كيك
-نص ملعقه ص عصير ليمون
-2ملعقه ماء بدرجه حراره الغرفه
-ذره ملح
الخطوات:
-شغلي الفرن علي حراره 170 أو 180.
-أدهني الصينيه بالزبده وبطنيها بورق الزبدهز
-أنخلي الدقيقي 3 مرات مع محسن الكيك(أستخدمت محسن بودره)
-إفصلي البياض عن الصفار(لو مش متوفر أداه فصل البيض أستخدمي معلقه الرز أو البطاطس المفرغه )
-أضربي الصفار مع نص مقدار السكر مع الماء لحد ما يصل لمرحله الشريط أو المنقار وضيفي الفانيليا اخر شئ
-أضربي البياض مع نص مقدار السكر الأخر مع الملح لحد ما يتكون عندك المارينج (مش أقل من 5 دقايق متواصله)ثم ضيفي عصير الليمون
-ضيفي الدقيق لخليط الصفار مع التقليب بالمضرب السلك بخفه ثم ضيفي المارينج وقلبي كويس جدا وبمنتهي الهدوء علشان تحافظي علي الهواء داخل الخليط
-صبي الخليط في الصينيه ودخليها الفرن لمده من 40 ل50 دقيقه
-المقدار ده مناسب لعمل صينيه مقاس 24 ولو تحبيها مرتفعه أكتر أستخدمي مقاس 22
-بعد نضج الكيك وخرجه من الفرن خرجيه من الصينيه وخليه علي المنخل أو علي سلك الكيك لحد ما يبرد وقطعيه شرائح وبعدها تبدأ مرحله التزيين
…أنا مصورتش خطوات التزيين الحقيقه لكن هكتب أستخدمت أيه
-عصير تفاح
-ويبينج كريم
-2علبه زبادي بيتي بصوص الفراوله
-كمبوت أناناس وخوخ قطع صغيره للحشو
-صوص مربي(مربي فراوله+ميه+جيلي سائل محضر+نشا)المقادير عملتها تقديريه وعملت صوص لونه وطعمه رائع جدا
-صوص برتقال(تانج أو فروتي برتقال +سكر+جيلاتين بودره +معلقه نشا)دوبتهم كويس ورفعتهم ع النار وأستخدمته لما برد خالص وقوامه كان تقيل
-شرائح من الكنتلوب
-بندق حمصته كويس جدا وقشرته وبعدين فرمته فرم خشن
…الخطوات تقريبا شارحه نفسها…..
-خلطت الزبادي مع كميه من الكريمه والكمبوت القطع وحشيت بيها بين الطبقات بعد ما دهنت بعصير التفاح
-غلفت الكيك بالكريمه ولزقت الجوانب بندق
حددت سطح الكيك كويس وبدون فراغات قدر الأمكان بالكريمه
-صبيت صوص البرتقال ورصيت الكمبوت والكنتالوب وشويه صوص قراوله حوالين الخوخ وأخيرا للتلميع طبقه من الجيلاتين المذاب ودي صورت قبل أعملها لأن كنت نسياها
….الكيك تزيينه بسيط جدا وسريع جدا لو محضره المكونات ..أنا كنت ناويه أعمل فيه من فوق جنينه فواكه بس قلت لسه هستني لحد ما أشتري تاني يوم وإستخدمت المتاح ..وإن شاء الله نخلي حديقه الفاكهه لمره تانيه…وكل سنه وأنتم طيبين….
….نشوف الصور:
ودي بعد ما خرجت من الفرن التصوير مبين لونها فاتح…
ودي بعد ما خلصتها..
الطبقات أد إيه هشه وقوامها ومسامها متناسقين..
وكمان عملت من نفس المقادير سويسرول بالكريمه وصوص الفراوله والتغطيه بندق وشيكولاته…. وكب كيك حشيته بالكريمه وغطيته بصوص الشيكولا…بس مقدمتهمش الحقيقه والصوره دي من التلاجه >>>>بث مباشر
وكده يبقي الموضوع خلص…أتمني يارب يعجبكم وكل سنه وأنتم بألف خير …وأسألكم من صالح دعواتكم …أستودعكم الله …
يسعدني اكون اول رد
بسم الله ما شاء الله
تسلم ايدك عنجد منظره رووووووووعة والتزيين كمان كتير راقي
تسلم ايدك يارب
وعقبال 100 سنة لجوزك
كتبت بواسطة مجد الاقصى 
يسعدني اكون اول رد
بسم الله ما شاء الله
تسلم ايدك عنجد منظره رووووووووعة والتزيين كمان كتير راقي
تسلم ايدك يارب
وعقبال 100 سنة لجوزك
تسلميلي حبيبتي يارب كلك ذوق متحرمش منك ولا من ردك الجميل ويارب تنعاد علينا الأيام وكلنا بخير يارب ومتجمعين وكل سنه وأنتي طيبه
تسلم الاياادي
تسلم الأيادي
التورته والسويسرول والكبكيك…كل واحد أحلى من الثاني
إبدااااااع ماشاء الله
ومشكووووووره على نصائح الكيك الاسفنجي لاني دايما عندي مشكله فيه
………………..
في غاية الاهمية …جزاك الله كل خير
بسم الله ماشاء الله في قمة الروعة
مبدعة كالعادة حبيبتي
صحتين وعافية يارب
وانت كمان وحشتيني ياقمر
روووووووعه بجد بجد شكل الحاجات يجنن والله
كل سنه وجوزك بخير ودائما فى حب وسعاده ان شاء الله
بس قوليلى نور انا لما بحط ورق الزبده كده فى الفرن بيتحرق يعنى الاجزاء الى فوق ده
الى باينه بتتحرق مش عارفه ده بقى عيب فى نوع الورق نفسه ولا ايه
الى عندى مكتوب عليه انتاج شركه حلوان لورق الحلويات
تسلم ايديكي يا قمرنا
ما شاءالله فعلا شغل فنانه
الله يرزقك بالذريه الصالحه يارب