كيف الصبايا من زمان ما شاركت،
و حبيت أول ما أشاراك أشارك بطيق عزيز على قلبي كتير، بحبها كثير السماقية،
و بصراحة احنا مش غزازة بالمرة، بس بعمري ما ذقت سماقية أطيب من سماقية أمي،
حتى من الغزازوة المأصلين ما بيزبطوها زي امي،
نبدأ على بركة الله:
المقادير:
ربطة سلق أو في ناس بتحط سبانخ حوالي 2.5 إلى 3كيلو
لحمة مقطعه صغير نوعاً ما "مش زي الشوربة أكبر طبعًا قد لقمة الخبز.
عدد 3 بصلا حجم كبير أو أربعة
حمص حب منقوع و مسلوق نص سلقة حسب الرغبة و في ناس بتحط كمية الحمص قد اللحمة أنا شخصيًا ما بحب الحمص.
3 قرون فلف شطة ناشفة أو فلف أخضر بس أنا بفضل الشطة عشان السماقية الاصلية بالشطة و طبعًا مش حقولكم قديش الغزازوة بموتوا بالفلفل.
2 م ك عين جرادة ناشفة
5- 7 فصوص ثومة مقطعة و ما تكتروا لانه بيصير طعمها كثيييييير تومة
150 جم طحينة حمرا و لازم تكون حمرا
عدد ا كوب سماق بلدي
عدد 2 ملعقة كبيرة طحين
ملح
نبدأ بالطريقة:
أولا بنجيب السلق و بنضمممه ضمم صغيرة و بنقطع العروق و بنخرطه ناعم و للي ما بيعرف السلق هادي هي صورته
و هادا السلق لما يتقطع و يخلص
نصيحة مهمة: علشان نغسل السلق منيح بننقع بجاط فيه ميه لمدة عشر دقايق رح نلاحظ أنه الرمل ترسب في القاع و بعدين بنغسله كمان مرة و بنصفيه
نيجي للنار بنقطع البصل مربعات و بنقطع اللحمة كذلك و بنسيبهم على النار يتذبلوا بعد ما نضيف الحمص كمان.
بعد ما يذبلوا و تذوب البصلة بنضيف السلق المخرط و المغسول و المصفى
بعدين بنضيف شوية زيت قلي على الطنجرة بعد ما اللحمة تتشرب ميتها منيح و تنشف و بنقلي خليط اللحم و البصل و الحمص لما يحمر شويه زي الصورة
[
بنبلش بالسلق فوق اللحمة و الحمص و البصل و رح نلاحظ أنه السلق كثير نافش بس ما تنغروا رح يكش على الاخر
بنضل نقلبة و بنسكر الطنجرة،
نيجي للسماق بتحطي مقدار السماق البلدي بطنجرة صغيرة و على النار مع 2 كوب ميه و بتسلقي منيح كتير لما ينزل عصارته و حموضته
بنيجي للدقة المكونة من الفلفل الاحمر المنقوع بالماء "لتسهيل تقطيعة"
و كمان الثوم المقشر و المقطع ناعم
و بنضيف عليهم الجرادة الحب
و بنبلش ندقها منيح منيح و بنضيفها على خليط السلق لما يستوي منيح و بنقلبهم و بنسكر الطنجرة
بعدين بنيجي للسماق بنحطه بالخلاط الكهرباء "في الزمانات كانوا بايدهم يمرطوه" و بنخط كتير منيح
و بعدين بنصفيه بالمصفاة الناعمة و بنكب السماق الخشن،
بعدين بنضيف الطحينة الحمرا على خلاصة عصير السماق مع الحين و بالمولينيكس كمان مرة خلط منيح
هادي هي الطحينة الحمرا اللي باستخدمها للي ما بيعرفها نفس البيضة بس لونها محمر شوي
لما يصير زي المستحلب جميل اللون،
إذا كان السماق منيح رح تلاقي الخليط حامض أما اذا أي كلام ممكن تعصري لمونة لما تلاقي حموضته منيحة
بعدين بتضيفي الخليط على السلق و اللحمة و الدقة اللي على النار
و بعدين بنعقدها على النار لما تغلي منيح
و بعدين بنسكبها بصحون
صحة و هنا
طبق سماقية ولا اشهى حبيبتي
وعرض وتقديم رائع جدا
وطريقتك نفس طريقتي بالزبط الي هي اساسا طريقة ماما الله يحفظهم يا رب انا بس باستبدل الفلفل الاحمر بالاخضر
تسلم الايادي حبيبتي وجزاك الله كل خير
وربنا يفرجها على اهل غزة ويصلح احوالهم ويبدلها الى احسن الاحوال باذن الله
ليانه
أي استفسار أنا جاهزة من الجميع
وريته صحه وهنا
بس لو سمحتي ايش هية الجرادة وبنلاقيها في قسم البهارات؟
والله يجزيكي الف خير أختي
انا مش من غزه بس زوجي منها .. وفيه كتير اكلات غزاويه بحبها
ومنها السماقيه .. وشجعتيني اني اعملها يا قمر .. لانها كتير سهله
وهلا موسم السلق صح ؟؟ هههه خلص استني تطبيق عن قريب حبيبتي
تسلم هالايادي حبيبتي ويعطيكي الف عافيه ويفتحها ويفرجها الهي عن غزه واهلها
مشكوووووووورة