أحبتي وأخواتي مرتادات ملتقانا الغالي
مرحباً بكم جميعاً
وأسعد الله أوقاتكم بكل خير
عدنا لكم مجدداً مع ضيفة جديدة وإستضافة جديدة
في
لقاء مع الأحبة
في ملتقى المغتربـــــات *****
هيا بنا لنمضي معهن اوقات جميلة وطيبة
لتبقى أحلى الذكريات بملتقانا الغالي
نسأل الله العلي القدير أن يجعل لعملنا القبول
ويرزقنا وإياكم الإخلاص في القول والعمل
وان يجمعنا بكم دائماً على حبه وطاعته وكل عمل يرضيه عنا
mayaaa
أهلاً وسهلاً ومرحباً بكِ أخت كريمة وضيفة عزيزة غالية على قلوبنا
طرحنا على ضيفتنا أسئلتنا
من اي بلد انتِ ؟
انا من الاردن
هل انتِ متزوجة ؟ هل لديكِ أولاد ؟
الحمدلله متزوجه عندي ينتين وولد ونص
في أي بلد انت مغتربة ؟
امريكا
كم هي مدّة اغترابك ؟
عشر سنوات
اغترابك كان لزواج او دراسة أو عمل ؟
زواج
ماهي مشاعرك للعيش في بلاد الغربة وماهي الصعوبات التي واجهتك ؟
من الاوا ما كنت راغبه بالسفر ابدن بس عجبني زوجي وكنت متامله ما ناخذ وقت طويل ولازلت …
الصعوبات انا اجتماعيه وبحب الصديقات وبنفس الوقت صعب علي اكون صداقات كوننا قله بهالبلد
خلى الموضوع اصعب والاشتياق للاهل مهما عرفت ناس ما بيغنوني عن شوفة اهلي
صعوبة التعلم كل شي جديد علي كنت مستعجله بدي افهم الناس واحكي معهم واعرف ايش اليي مناسب
وايش اللي مو مناسب وبنفس الوقت حاسه انه وانا مالي ماكنت مرتاحه واموري تمام ..
وارجع ارضى واحمد الله
موقف ظريف حصل معاك في الغربة ؟
موقف ظريف مره كنت محتاجه احكي مع صديقتي وانا وزوجي ما معنا سلفونات غريب صح ..
كنا لسه عالتفون الارضي المهم مر فييه على محل صديقه وطلب مني استعمل التلفون من المحل وتركني هو وصديقه مع العامل
وطلعوا بره المحل وانا بمكتب صغير والعامل يحامل يبتسملي ويعنيلي ويرقص انا انرعبت وكنت احاول اشوف وين زوجي
وكيف تركني مع عالمجنون بالمحل وقعدت افكر يعني عشان امريكي عادي مثلا
بس زوجي مش باين انه بارد او ما بيحس وصراحه ما كملت المكالمه وطلعت ومشينا بالسياره وبعدين عاتبته
قلتله كيف بتتركني بالمحل مع العامل هيك وماكنت متجرءه اقوله ايش عمل من رقص وابتسامات …
بعدين انصدمت بان قالي ماكان فيه عامل انا تركتك مع البنت …
ماكان فيه بنت !! كان فيه شب اسود ووصفته وايش لابس قالي يا هبله هاي بنت هههههههه ….ام الغباء
أكثر شيء يزعجك بالغربة ؟
الكلاب كل ما اسكن مكان بحاول ما يكون فيه كلاب ما بخاف منهم بس بيعدموا المكان تعديم
طبعا القانون بيقول صاحب الكلب ينظف البوب اجلكم الله بس برضه بشوف عالارض كثير ومننحرم التمشايه وطلعة حولين البيت
اذا المكان فيه كلاب شيء مقرف وهاد غير لما افكر ان البيت نفسه كان فيه كلب قبلي ودايمن بشترط تغيير السجاد
او بدفع ثمن سجاد عشان يركبولي جديد ما متخيله امشي عسجاده كان قبلي عليها كلب
طبعا شغلة الدين بتدايق وبتقهر بس الواحد اخر النهار بيسكر الباب على حاله وبينام بمان الله منمارس ديننا بحريه ومنلبس حجابنا
فتقريبا مش مدايقني الوضع لدرجة اني اهرب من البلد ……
او اتمنى اني اطلع منها بس عشان همه مش مسلمين متدايقه اه بس متعايشه
ماذا تفعلين الآن ؟ يعني تدرسي ، تعملي ، ربة منزل ؟
ربة منزل وانا شغاله عاللغه من اول ما اجيت بحب اقرا طبعا جديد بلشت اقرا كتب
بس بالاول كنت اتابع دورات عالنت ودروس واحاول اطور من حالي واستغل وقتي
ماهي مميزات وعيوب الغربة ؟
كل اللي راح هي مميزات وعيوب الغربه بعدها عيب كبير جدن لان رجعتنا وزياراتنا لاهلنا مكلفه ومتعبه ومرهقه
لو مكان قريب مثلا المانيا او بلد عربي الواحد بيكون قريب اكمن ساعه وبيوصل
اما بحالة امريكا طيارتين وانتظار بالمطارات وبهدله ما مجموعه لا يقل عن 20 ساعه سفر ومرمطه
وغير التكلفه
مميزات الغربه البعد عن المشاكل اليوميه ماحد متطلع على داخل بيتي ومابيني وبين زوجي وكيف مربيه اولادي ماحد دخله بعيد عن الناس وبعيد عن التدخلات
الاطلاع على ثقافه جديده صقل شخصيتي ووسع نظرتي وزاد خبرتي بالناس وشفت اشياء وتعلمت امور لو لسه ببلدي ما بعرفها
الغربه بتخلي الواحد يتقرب اكثر من الدين ويركز اكثر على الاطفال وتكون تربيه اسلاميه بسبب التحديات
لو ببلدي خلص بربي اولادي متل باقي الناس بخلي الحمل عالمدرسه والاولاد رح يتعلموا من غيرهم
بينما هون انا بعمل هالاشياء وبحرص عليها بنفسي
ميزه كمان للغربه انك تجلسي لوحدك وتفكري بامور الحياه والدنيا بالدين الوحده احيانا صح قاسيه
بس الها كمان فائده بتخلي الواحد يقعد مع حاله كثير ويفكر اكثر وبعمق
بينما الحياه الاجتماعيه ببلدنا بتاخذ الناس والوقت بيضيع صراحه بدون ماحد يحس فيه
كيف ترين نظرة الغرب للعرب والمسلمين خاصة ؟
النظره العامه معروفه الاحداث اللي صارت خلت الناس تخاف من الاسلام والمسلمين
بس مو كثير مهتمه لان النوعين موجود ناس متعصبين ومهما كنتي كويسه خلص بيكرهونا
ونوع بيعطوا فرص للناس وبيعاملكي حسب ما بتعامليهم
بس مش كثير بقلق بالموضوع ماعندي صاقات مع الاجانب معارف قليلين وصراحه بيننا احترام
هل راودتك لحظة ندم على قرار السفر وكيف استطعت التغلب على مشاعر الغربة ؟
السفر كنت متردده فيه من البدايه سافرت على عيني لكن انا دايمن برضى بقسمة الله
تغلبت عالموضوع بالرضا بماقسمه الله لاني بعرف ان الله يختارلي الافضل وهاد افضل شي الي ..
عبّري عن حالتك الآن وانت تردّي على الأسئلة بجملة أو سمايل ؟
صراحه مافيه شي معين ببالي بس ممكن احطلكم سمايل
سؤال أخير ، ما رأيك في ملتقى المغتربات ؟ ملتقى المغتربات المكان الوحيد اللي بقرأ فيه بالعربي هاد القسم بيتي ومكان ما بشوف صديقاتي ما بستغني عنه
لسه ضايل ان شاء الله لازم نطوره اكثر مواضيع اكثر بس انا عارفه الكل مشغول وان شاء الله القادم افضل
هذه كانت إجابات الغالية mayaaa
الله يبارك فيها ويجازيها بالجنان
أحبتي
نتمنى لكم قضاء اجمل الأوقــات وأمتعها مع ضيفتنا العزيزة
لها منا كل الشكر والتقدير على تلبيتها دعوتنا
دعواتنا لها بدوام التوفيق والسداد
تقبلوا تحيــات
مشرفات ملتقى المغتربات
روحك مرحة وحيوبة وما بعتقد في حدا تعرف عليكي وندم
الله يرزقك بر اولادك ولا يضيعلك تعب
اسعدني التعرف عليكي اختي من خلال هذا اللقاء
بارك الله فيكي و في اسرتك الصغيرة
سبحان الله كنت تقريبا عارفة ايش بيكون ردك على الاسئلة لأنك واضحة كثير ومبدأك ثابت
زي ماقالت قوته انتي ملح المنتدى ..
يارب يحقق لك كل أمانيك ويديم عليك السعادة والراحة يارب
كتبت بواسطة بدربدور 
روحك مرحة وحيوبة وما بعتقد في حدا تعرف عليكي وندم
الله يرزقك بر اولادك ولا يضيعلك تعب
امين بدوره لا يضيعلنا تعب ابدن ولا يضيع لمسلم
الله يخليكي ويحفظك انتي بالذات دايمن مخجليتني امي ما بتمدحني هالقد وانا والله بحبك كثير الي هون اخوات يمكن ما بحكي مع اهلي كتر ما بحكي معكم وبتذكركم بيومي …
كتبت بواسطة Oum Lina et Lilia اسعدني التعرف عليكي اختي من خلال هذا اللقاء
بارك الله فيكي و في اسرتك الصغيرة
بارك الله فيكي كمان ام لينا لفت نظري كلمة الصغيره وانا ببالي اقولك فينا البركه الفرد السادس عالطريق اربع اطفال اسره متوسطه بس انا عارفه انه الكلمه وصف مجازي اسعدني جدن طلتك ومرورك
كتبت بواسطة pink_shadow سبحان الله كنت تقريبا عارفة ايش بيكون ردك على الاسئلة لأنك واضحة كثير ومبدأك ثابت
زي ماقالت قوته انتي ملح المنتدى ..
يارب يحقق لك كل أمانيك ويديم عليك السعادة والراحة يارب
الله يديم علينا جميعا الصحه وراحة البال يا صقيقتي بالحمل والرضاعه ههههههه >>>>>>>>لعاد حزرتي اجوبتي محنا النا بيجي سنتين مع بعض دقوا زيدوا على نفس الموضوع اشوى ما عملتي متل بنتي وقلتي بورينج خخخخخ
والله صدقيني مو مجاملة بس بتستاهلي والله كل خير
وما شاء الله اللهم زد وبارك في اسرتك
امي ما شاء الله جايبة ١٢ اللهم صلي على النبي ٦ بنات و٦ ولاد وانا اخرهم تالي العنقود ^_^
وحماي بيضل يحكيلي انتي بس جيبي قد ما جابت امك عاد انا عندي ٣ ولاد الله يهديهم ولما حمت بابني الاخير هسة عمره ٣ سنين بيحكي لاخوانه امكم بتضحك عليكم كل ثلاث اربع سنين بتجبلكم اخو
هاد النقاش من ضمن التعارف ماحد يتطلع علي
مبارك عليكِ الحمل
الله يتمملك علي خير أنتِ وباقي الاخوات
~~
والله يعينك ويوفقك والف مبارك الحمل والله يقومك بالسلامة