السلام عليكم ورحمة الله وبركاته
حكايتي يا أخوات مع فرني الكهربائي، واشتكيت منه مراراً، فرني جديد لكنه هاوي تنشيف للمناقيش، بنتي نفسها بالمناقيش.. لكن كيف؟ كل مرة بتطلع يا سلااااااااااام.. بتشهي.. لكن… بتصير خبز محمص بعد دقائق..!
شو عملت؟؟ لجأت لماميتي 
ماما اخترعت طريقة حلوة.. مثل ما الأخوات هنا بيعملوا خبز على النار من فوق.. ماما بتعمل مناقيش من فوق.. وقالت لي الطريقة شفهي، وأنا وتجربتي عاد.. المهم اليوم لأول مرة بجرب.. شوفوا كيف:
اعجني عجينتك المفضلة للمناقيش.. أنا كل مرة بعجن بطريقة شكل.. اليوم عجينتي من المنتدى، لكن كتبتها من زمان على ورقة ووجدتها اليوم وعملتها وطلعت رائعة.. نسيت لمين الطريقة لأني نسيت كتابة الإسم لما نقلتها..
العجينة كانت كوبين دقيق، ربع كوب زيت، ملعقة كبيرة خميرة، ملعقة صغيرة سكر ونصف ملعقة صغيرة ملح، وكوب دافئ ماء وخمس ملاعق حليب بودرة.. عملت عيارين من هذه الكمية.
عجنتهم كلهم حتى صارت عجينة مثل الفل، تركتها ساعة ونصف تتخمر..
الصور رح تشوفوها اصبروا بس على رزقكم 
^ قطعت العجينة كور
^ وفردتهم بالشوبك أرغفة مدورة مسطحة وحطيتهم فوق بعضهم بس بينهم مناديل ورقية مرشوشة بالدقيق، هذه تعلمتها من ديــــم الله يجزيها الخير
^ سخنت المقلاة السميكة المربعة على نار عالية حتى صارت سخنة على الآخير، هذه نفس المقلاة اللي بعمل فيها بانكيك
^ وضعت الرغيف على النار الساخنة
^ مجرد ما يصفر لون الرغيف قلبته وتركته يستوي من الجهة الثانية تماماً، وجبت خليط الزيت والزعتر وفردته بالملعقة وكنت أضغط وأنا بفرد حتى الفقاقيع تنزل
^ وشوي نضج تماماً وصار مناقيش عن جد، حتى بنتي المسكينة تنبسط، نفسها فيه وما قادرة أعمله.. عجبها كثير كثير كثير
ملاحظة: فرني ممتاز بالخبز وباقي المعجنات، المشكلة بس بالمناقيش!!!
المهم، قلت خليني أضرب عصفورين بحجر..
خليني أجرب الخبز بالمرة، مثل ما علمتنا ديم، ومثل ما أمي بتعمل أحياناً..
وفعلاً طلع كثير لذيذ الخبز، بينتفخ لكن مش مثل الصور اللي شفتها بالمنتدى، بيطلع شبه الخبز الهندي، لكن بينتفخ من بعض الجهات..
وبما أني عملت كم منقوشة، قلت أجرب الخبز، وجربت.. أكلوه بناتي وهو سخن بيغلي
^ ضعي الرغيف من فوق على نفس المقلاة
^ اضغطي الحواف على داير الرغيف حتى تسدي أي فتحات تسمح بتسرب البخار
^ بسد الفتحات رح ينتفخ الرغيف مثل الصورة
^ أنا بعدين تعبت، فوضعت ثلاثة أرغفة بالفرن على أعلى حرارة حتى أتأكد أنه فرني قابل لعمل الخبز!!!
واتضح أنه قابل لهذا
ملاحظة كمان: المناقيش منهم طلعوا مدورين ومنهم طلعوا معوجين.. يعني طنشوا
وعملت أحجام مختلفة حسب حجم كل ولد عندي 
وبهذا تنتهي رحلتها مع: المناقيش وفرني
ملاحظة: بعد الانتهاء من القراءة، اقرأي الرد 47 لأني أضفت نقطة هامة من ماميتي
شكلهم بفتحوا النفس عن جد رائعة
شهتيني وراح اجرب الطريقة في الويك اند ….مش معقول ما شاء الله شو شكلهم لذيذ …وكمان الخبز صراحة ولا احسن مخبز ..ما شاء الله
تسلم يديك يا رب
ويعطيك الف عافية وصحة وعافية على قلب إبنتك ..فعلا مثل ما بحكوا الحاجة ام الاختراع ..ولا كمان احلى اختراع
والصور تششششهي
بس سؤال .. لما ببلش أعملهم على النار بشيل وحدة وحدة من بين طبقات الورق ؟؟ وتسلمي ويعطيك مليون عافية .. الله عليكي يا أمونة شكلهم بيشهو الله يسلم دياتك ويخليلك الماما يا رب.
لحظة آخذ نفسي………….
آه ياني .. تعبت خلاص .. ريحة المناقيش قضت علي
مبروك امونة وربي يطعمك من زيادة كبد الحوت.. قولي آمين
يعني بنوتك في منتهى السعادة….
بتعرفي انا غرت وصار لازم اعمل مناقيش بس راح اخليها لبكرة علشان انا اليوم .. اكزوستد.
تسلمي يا جمان
العفو بيلسان
الله يسلمك يا أم أيمن
لما بدك تشيلي العجين، بتحملي كل ورقة ورح تنشال بسهولة لأن تحت العجين طحين وفوق العجين طحين.. لما تحملي الورقة، ضعي كفك تحتها حتى تحملي العجينة واقلبيها على المقلاة.. يعني مثل خبز الصاج تماماً
الله يسلمك يا هالة.. آمين
تحبي أقولك شيء يا وعود؟ والله بعدني ما ذقتهم.. كنت متغدية وما قدرت أذوق غير لقمة خبز وشو كانت طيبة..!
وأنا بنتي جنى كثير بتعرف بطعم الأكل، فكانت هي التستر تبعي وقالت يميييييييي شو طيبين.. هلأ بذوق واحدة على الفطور إن شاء الله
وتسلمي على الدعوة الحلوة.
يالله ورينا الشغل، بعرف رح يطلع شغلك ما شاء الله مثل كأنه قاعدين بمخبز غير شكل
س عندي سؤال امتى حطيتي الزعتر؟
هو أسرع من الفرن، وما في داعي تعملي كمية كبيرة، ممكن تكبري الرغيف وتعملي لكل واحد منقوشة على السريع على الفطور.. وأحلى شيء لما يكون عندك بالبراد دائماً العجين جاهز، طلعيه قبل بنصف ساعة حتى يرخي وافردي وانقشي
خليط الزيت والزعتر حطيته بعد ما قلبت العجينة أول مرة..
يعني حطيت العجينة فقط حتى نشفت شوي، يعني بقيت صفراء اللون.
قلبتها وحطيت الزعتر وطبعاً بدأت من تحت تنخبز ومن فوق تجف أكثر والزيت يسخن والريحة يا سلاااااااااااام