أخواتي المشرفات .. عندي إقتراح .. إنو نعمل ملف كامل للأكلات القليلة الدسم والخفيفة .. والكل يشارك فيه .. لأنو في ناس ما بيحبو الأكل الدسم أو بيكونو عاملين ريجيم ..
فشو رأيكم بهذا الإقتراح ؟؟
و خصوصا مع فصل الصيف حيث يكثر استعمال الأكل المقلي
الله يجزيك خيرا
يلا نبدأ حبيبتي بصنع الملف 
هلأ أول اشي .. إحنا شو ممكن نعمل .. أي أكلة منحبها نشوف كيف ممكن نخفف الدسم تبعها.. تبديل نوع الزيت من الذرة إلى عباد الشمس أو زيت الزيتون أو الزبدة قليلة الدسم أو حتى الإستغناء عنه أساساً .. ويمنع أستخدام السمنة .. وممكن إستخدام الزيت البخاخ (0% Fat Free)
أستخدام الأرز البني بدل الأبيض .. أو مثلاً الأرز البسمتي بدل المصري (لكثرة إحتوائه على النشويات) طبعاً ما عدا في الحشي..
المعكرونه .. إستخدام المعكرونه البنيه .. أو سلقها فقط بماء دون الحاجة إلى الزيت ..
أسخدام أجزاء معينة من اللحمة .. وتكون هبرة على الآخر .. ويمنع أستخدام الريش مثلاً لكثرة إحتوائها على الدهون..
إستخدام صدرو الدجاج .. لأنها أخف دسم ..
والسمك .. يكون مشوي ..
طبعاً واستبدال معظم القلي بالشوي أو السلق ..
وحتى البيض للي ما بيحب الصفار يقلي بس البياض .. طعمو كمان طيب .. مع بعض الإضافات (من جبنة قليلة الدسم ، بهارات متنوعة، وغيرها)
وهيك تقريباً بنكون حطينا الأساسيات .. حتى نشوف كيف بدنا نبدأ بالأكل ..
يلا اللي عندها فكرة .. تبلش..
يلا نبدأ على بركة الله .. أول طبق ..
المقادير:
– 1 ضمة بقدونس مفرومة فرم ناعم جداً
– 1 ملعقة زعتر أحضر مفروم
– 3 بصلات كبار مبشورين
– 1 حبة كوسا مبشورة
– 1 حبة فليفلة خضرا مبشورة
– 1 حبة جزر مبشورة
– ربع كوب حليب خالي الدسم
-نص ملعقة صغيرة خل أبيض (إختياري)
– ربع كوب دقيق أسمر
– 6 أو 8 بيضات
– 1 ملعقة طعام صغيرة ملح
– 1 ملعقة طعام صغيرة بهارات
– 1 ملعقة صغيرة فلفل أسمر
– نص ملعقة صغيرة بيكنج باودر
– رشة بيكربونات الصوديوم (إختياري)
– زيت بخاخ (0%Fat Free)
– ربع كوب تقريباً بقسماط
الطريقة :
– في جاط نضع البصل وجميع الخضر ونضيف عليها الملح والفلفل والبهارات نحلطهم ونونضعهم جانباً
– في جاط آخر نضيف الدقيق والبكنج باودر وبيكربونات الصوديوم ونخلطهم ونضعهم فوق الخضار (في الجاط الأولي)
– يكسر البيض في جاط آخر ونضيف إليه الحليب والخل ويخفق جيداً ثم يضاف إلى خليط الخضار ويحرك .
– نرش الصينية بالزيت البخاخ وننثر البقسماط فوقها ثم نصب الخليط في الصينية ونضعها في فرن حار من نص إلى ساعة حتى يحمر وجهها .. وتنتفخ قليلاً ..
– تقطع حسب الرغبة وتقدم مع سلطة الخيار باللبن ………….. وصحتين وهنا .. ولا تنسوني من الدعاء لأنكم راح تاكلو أصابعكم وراها وقد ما أكلتو مش حتصدقو خفتها ..
فتة اللبن بالحمص واللحمة (التسقية)
المقادير:
– 3 علب حمص مسلوق وجاهز (يسخن)
– 1 كيلو لبن خالي الدسم
– 5 حبات ثوم مدقوق
– 2 -3 أكواب خبز محمص بالفرن
– 1 ملعقة صغيرة ملح
– ملعقتين كبار صنوبر مقلي (بزيت عباد الشمس)
أنا لما بقلي المكسرات بنشفها على ورق نشاف وبمسحهم منيح حتى ما يضل أثر
– 1ملعقة صغيرة كمون
– 1 ملعقة صغيرة خل
– 1 عصير ليمونه
– نص كيلو لحمة مفرومة (حسب الرغبة إذا بتحبو اللحمة كتير) أنا بحط كيلو ..!!! محمس بالزيت البخاخ وعليه شوية بهارات
الطريقة ..
نخلط في الخلاط الثوم واللبن والخل والملح والليمون ..
نضع في البايركس الخبز المحمص ونسكب الحمص فوقة وهو ساخن مع قليل من مرقته (حتى يتسقسق الخبز) .. ونرش عليه الكمون
نضع فوقة خليط اللبن..
– وننثر فوقة الصنوبر المقلي واللحمة ..
– تقدم ساخنة .. وصحتين على قلوبكم ..
المقادير:
4 قطع من صدور الدجاج المخلية والمسلوقة بالطريقة الإعتيادية
1 كوب عصير ليمون أخضر
ثلاث أرباع الكوب عصير التفاح (الخالي من السكر نوعية الروابي)
2 ملعقة كبيرة نشاء
الطريقة:
في جاط نخلط عصير الليمون مع النشاء وعصير التفاح ونضعه على النار حتى يغلي ..
يحرك من وقت لآخر حتى تتكاثف الصلصة
نقطع صدور الدجاج إلى شرحات متوسطة السمك ونصفها في طبق التقديم ونضع عليها الصلصة .. وتقدم مع البطاطا بيورية ..
طريقة البطاطا بيورية ..
المقادير (حسب الرغبة)
نسلق البطاطا بالطريقة الإعتيادية .. بعد النضج نقشر وتهرس ونضيف عليها:
حليب خالي الدسم
زبدة قليلة الدسم
جبنة كريم (أنكور) قليل الدسم أو جبنة البقرة الضاحكة (قليلة الدسم)
ملح + فلفل أبيض
تخلط المقادير مع بعضها وتقدم ساخنة ….
المقادير :
– 2 بيضة
– 2 ملعقة كبيرة حليب خالي الدسم
– 4 قطع صدرو دجاج (مخلية من العظم والجلد) عليها ملح وفلفل أسمر وشوية بهارات
– كوب بقسماط
– نص كوب جبنة شيدر قليلة الدسم مبشورة
– نص كوب من الكريمة الحامضة (ساور كريم) لايت
الطريقة :
– نحضر صينية الفرن ونرشها بالزيت البخاخ
– يخفق البيض مع الحليب في وعاء .. نغمس صدور الدجاج فيه ثم البقسماط حتى يغطي القطع بالكامل ..
– نصفهم في الصينية ونضعهم في فرن ساخن لمدة 40 دقيقة تقريباً أو حتى يستوي الدجاج ويشقر لون البقسماط ..
– في وعاء نخلط الكريمة مع الجبنة الشيدر ونزين بها الدجاج ..
– تقدم مع الأرز المكسيكي أو الأرز المسلوق ..
صحة وهنا .. 
عنجد شكلو الاكلات كتير بتشهي