REMO
هذي طريقة الكبسة السعودية النجدية .. يعني المنطقة الوسطى
لأن السعودية ماشاء الله كبيرة وتختلف الطرق من منطقة لمنطقة
================================
الرز بمرقة الدجاج أو اللحم
أولاً :تكشنين شوي بصل في شوي زيت تقطعينه بأي شكل تريدين ان بغيتي أرباع موب مشكلة،
وحتى مو ضروري تحمسينه أهم شي وجود البصل
المهم بعد ماتكشنينه
أضيفي الملح والثوم (حسب الرغبة) و البهارات العدلة (الغير مطحونة)
هي : [ هيل، قرفة (دراسين)، فلفل أسود، مسمار(قرنفل) ] ….
وإذا عندك ورق غار حطيه يعطي طعم ممتاز وبعد فيه الكزبرة الناشفة الغير مطحونة جداً ممتازة
وأضيفي الدجاجة والماء
بعدين خلي الدجاجة على النار ساعة إلا ثلث وإذا كنت مسويته باللحم حطيه عالنار ساعة ونص
في هالأثناء خذي مقدار الرز واغسليه ونقعيه شوي
طلعي الدجاجة و إذا بغيتي تحمرينها بتتبيلة معينة
حطي في فنجان شوي زيت وشوي صلصة طماط وشوي بهارات مطحونة
وصبي عليها شوي من مرقة الدجاجة وصبي هالخلطة على الدجاجة
وحطيها في صينية فرن ودخليها الفرن ..
خليه على الدافيء يعني لا تحمرينها الحين وبعدين إذا بغيتي تحمرينها بس شغلي الفرن من فوق
ترا مو ضروري هالخلطة يعني ممكن تحمرين الدجاجة بدون شي
أفضل وقت للتحمير قبل ما تقدمين الأكل بعشر دقايق لأن تحميرها ياخذ أقل من 10 أحياناً
خلاص ؟؟
المهم صفي مرقة الدجاج واسكبيها على الرز
مقابل كل كاس رز كاس ونص ماء إذا كان الرز "بشاور"
أما إذا كان مزة يعني مثل رز أبو كاس زيدي الموية
بحيث يكون الزائد من الماء عن الرز مايقارب الأربع أصابع ..
الحقيقة أنا عشان أضبط كمية الماء مع رز أبو كاس أضع ملعقة الطعام بشكل واقف على سطح الرز "ماأدخلها"
وبعدين لما أسكب المرقه عليها توصل المرقة إلى حد الملعقة أي حد الدائرة اللي نأكل بها (فهمتيني)!!؟؟
طبعاً أنتِ الحين معليه على النار بحيث تشوفين الرز قاعد يغلي،
غطيه شوي وطلي عليه لا تنسينه "يعني ياخذ له فترة بسيطة" وإذا شفتي الرز تخفس يعني نزلت مويته وشفتي فيه زي الحفر بعدها قصري على النار مرررة إلى أقصر درجة وخليه عالنار
الرز البشاور ياخذ له أقل من ربع ساعة وأبو كاس ياخذ له 20 إلى 25 دقيقة تقريباً
المهم فيما الرز قاعد ينطبخ …. حضري الكشنة واللي هي :
بصل مقطع صغار أو شرايح حسب الرغبة
كشنيه في شوي زيت وإذا تشقر حطي عليه بهارات مطحونة وملح و زعفران
لأن الزعفران يعطي نكهة للحمسة وريحة حلووووة.
وممكن تضيفين شوي كمون وشوي قرفة وشوي صلصة طمام لو حبيتي وبس ..
بس انتبهي لا تحترق لأنه بسرعة يتغير لونها إذا ماحركتيها حركيها باستمرار
أو قصري عليها النار وخليها شوي تتسبك
وحطيها على طول على الرز وصكي القدر عشان يتشرب الرز الطعم والريحة.
وإذا كنتي تحبين الصنوبر والزبيب تراه لذيذ فقط ماعليك إلا انك تشوحينه قبل وإذا تشقر طلعيه في صحن
وإذا خلصتي من تكشين البصل اخلطيه معه،
وإذا كنتي تحبين (الفلفل الحار) حطي بعد بس موب مقطع بصراحة الفلفل مرررة يعطي نكهة رااااائعة
ويارب يعجبك
صدقيني الطريقة سهلة لكن الكلام كثير
وأي سؤال أنا حاااضرة