المقادير :
1/2 كيلو رقاق طرى
1/2 كيلو لحم مفروم
1 بصلة مفرومة
بهارات – ملح – فلفل اسود -حبهان – ورق لورا – كارى – قرفة
ثوم مفروم (حوالى 5 فصوص كبيرة)
خضار حسب المتاح (فلفل ألوان – جزر مبشور- مشروم)
زبدة سايحة
شوربة دافئة (لوعايزاه طرى مش مقرمش)
2 ملعقة كبيرة جبنة موزاريللا
الطريقة :
**نتبل اللحم المفروم بالبصل والملح والفلفل والبهارات
**نسخن حلة على النار وننزل باللحم المتبل تششششششششششششش تاخد لون ونقلب شوية ونغطى الحلة ونهدى عليها النار شوية عشان اللحمة تستوى ونضيف الثوم المفروم (أحلى حاجة إنك تضيفى الثوم بالطريقة دى وما تحمريهوش مع البصل )
**نضيف الخضار المتاح وأقلب الخضار مع اللحم ولو كانت اللحمة نشفت من السوايل ممكن حبة ماء صغيرين حوالى معلقتين نقلبهم مع الخضار ونغطى الحلة )
**بافرد الرقاق وأدهنه بالزبدة بما إنى عايزاه مقرمش…..بس لو عايزاه يكون طرى بابلله بالشوربة الدافئة وبادهنه بالزبدة برضه
طبعا الرقاق بيحب الزبدة ……يعنى ندهن الرقاق بافتراء مش هاوصيكم عشان هو ده اللى بيدى اللون الحلو
يعنى رقاق ….يعنى تتخنى ….يعنى تبقلظى يعنى …………..ولا بلاش ههههههههه
والرقاق بيحب الصينية أم حافة قصيرة مهم جدا عشان اللون والذى منه
**نحط حبة من الحشوة ونلف الرقاق زى ورق العنب
دور الجبنة تحطى حبة صغيرين تسدى بيهم الصباع من فوق (رول الرقاق بعد ما اتقطع عمل صباعين ومن هنا جاءت التسمية)
انا بقى لقيت ان الاحسن اقسم الورقة على 4 عشان تبقى رفيعة وكيوت مش مكلبظة
وده شكل الصينية لما رصيتها
**تدخل الفرن تاخد لون من تحت ومن فوق فى نفس الوقت ودى ميزة الصينية أم حافة قصيرة
ولو اللون اللى من فوق مش لطيف ممكن تقلبى الصوابع عشان تاخد لون من فوق زى اللون اللى اتاخد من تحت ودى ميزة استخدام الصوابع
مقرمشة زى ما أنا عايزاها
وعلى فكرة ممكن تطرى لو أنا عايزة بارشها بشوية ماء أو شوربة وأغطيها بالفويل وأدخلها الفرن أو الميكرويف بس طبعا من غير ما أغطيها بالفويل وممكن أغطيها بورق زبدة فى حالة استخدام الميكرويف فتطرى على طول
يارب تعجبكم وتجربوها وعلى فكرة ممكن تنوعوا فى الحشوات
عملت معاها صينية محشى كرنب
خلطة الحشوة فى هذا الرابط
محشى كرنب وورق عنب..مشاركة متواضعة (رحلة فى عالم المحاشى)
بس بعد ما سلقت ورق الكرنب رصيت كمية فى صينية وحطيت الحشو ورصيت ورق تانى وغطيتها بفويل وسويتيها فى الفرن
وكمان بطة مشوية….نظفتها كويس وتبلتها من الليل بالملح والفلفل والبهارات والبصل وحشيتها بصل مبهر مع الكبد والقوانص بتاعتها وحطيتها فى صينية فوق بطاطس وبصل مبهرين وغطيتها بالفويل وطهيتها فى فرن متوسط ساعة ثم دهنتها بالزبد لتحمر
كتبت بواسطة ام بشور 
