الوسم: المصريه

اولا مقاديرها اللي حكتبها ده بتعمل 3 صواني كبار لو انتي عايزه اقل ممكن تعملي نص الكميه بنص المقادير اللي هيا

1 كيلو دقيق
1 ملعقه ملح صغيره
1 ملعقه كبيره خميره فوريه +1 ملعقه كبيره سكر
2 او 3 ملعقه كبيره سمسم حسب الذوق
2 ملعقه كبيره شمر او ينسون او الاتنين برضه حسب الذوق
1 كوب لبن دافي او مايه دافيه للعجن بس الاحسن لبن طبعا
نص كيلو مفرومه + 1 ملعقه قرفه
كوب ونص زيت سخن حامي

الطريقه بقى نبتدي بسم الله
اولا ده الشمر حنحطه في طاسه صغيره على نار هاديه شويه صغيرين خالص وحنطحنه طحن خشن ونحطه على الدقيق في الخطوه اللي جايه

حنجيب صينيه كبييييييره او حله ونحط فيها كيلو الدقيق ونفرفره بايدينا شويه ونرش فوقه السمسم والشمر والينسون ومعلقه الملح

وبعدين نجيب الزيت الحامي نكون مسخنينه في كنكه مثلا او كسروله وبعد ما خلطنا الدقيق نعمل حفره في النص ونحط فيها الزيت وحنلاحظ انه حيفور مع الدقيق

ولو تاخدي بالك انا عملت فتحات من جنب الحفره علشان الزيت ينزل لبقيه الخليط

وحنقلب بالمعلقه الخشب او اي معلقه بس علشان نخلط الزيت مع الدقيق لان الزيت سخن وبعد كده حنضيف عليهم الخميره لــــــــكــــــــــــن خدي بالك … الخميره حتعمليها كالاتي علشان تنجح معاكي
حتحطي في كوبايه معلقه الخميره وعليها معلقه السكر وتخلطيهم بالمعلقه كويس جداا على الناشف الاول وبعدين تحطي فوقهم شويه لبن دافي وتغطيهم وبعد 5 دقايق حتلاقيها خمرت وبقى زي الفل زي الصوره كده علشان كده اول حاجه تعمليها الخميره وتغطيها وسيبيها تخمر لحد ما تعملي خليط الدقيق اللي فات ده

وبعد ما حطيتي الخميره حتقلبي كله بايديكي وتفركيهم بين ايديكي كويس وتفلفليهم كده لحد ما كله يختلط ببعضه والدقيق يشرب الزيت والخميره زي الصوره كده

وبعد كده حتجيبي لبن او مايه -اللي موجود- وتحطي شويه بسيطه في شويه بسيطه وانتي بتعجني بايديكي لحد ما تلاقيها بدأت تلم معاكي وتبقى كوره متماسكه وتلاقيها خلت الصينيه اللي انتي بتعملي فيها فله شمعه منوره زي الصوره كده

وعلشان تعرفي العجينه اتظبطت ولا لأ حتاخدي حته من العجينه وتبططيها بين ايديكي ولو لقتيها اتفردت معاكي يبقى كده مظبوط

وحتسيبي العجينه شويه ترتاح لحد ما تفصصي العجوه
انا بجيب عجوه سايبه وبفصصها انا وبفرمها واحط عليها قرفه وسمسم لاني مره جبت المفرومه جاهزه لقيت اللي انا بفرمها اطعم بكتيييييييييييييييييير
وادي العجوه والبذر بعد ما فصصتها ويا داخل ما بين العجوه وبذرتها ما ينوبك الا حلاوتها

وهنا بعد ما فرمتها وحطيت عليها القرفه وللاسف السمسم خلص لاني حطيته كله على العجينه لكن انا قبل كده كنت بحط على برضه

ونرجع للعجينه تاني وحنقسمها على اربعه علشان نعرف نحشيها

يــــــــــــــتـــــــــــــــــــبــــــــــــــ ــع

ولما تطوليها حتحطيها على الرخامه وتبرميها برمه خفيفه كده وتبططيها براحه كف ايدك

وبعدين تجيبي العجوه وتبرميها برضه وتحطيها في نص العجين بس يستحسن وانتي بتفردي العجين تكون الحروف ارفع من وسط العجينه علشان لما تلفيها تبقى كلها سماكه واحده

وبعدين حتتني اول حرف على زي الصوره كده

وبعدين حتلفيها كمان لفه على الطرف التاني علشان تقفليها

وبعد ما تقفليها حتلاقي الخط اللي تحت ده ممكن يفتح تاني معاكي

فحتبرميها وتلفيها لفه خفيفه بايديكي كده لحد ما تلاقي الخط ده اختفي شويه زي الصوره كده

وبعدين حتخلي الخط ده لتحت وتبططيها بايديكي زي ما بططتيها اول مره علشان تحشيها وبالسكينه حتقطعيها بالورب بميله خفيفه كده

وبعدين حترصيها في الصينيه وخلي فيه فرق بسيط بيهم علشان التخمير ميخليهومش لازقين في بعض وده صورتهم قبل التخمير

وده صورتهم بسم الله ما شاء الله بعد التخمير

وعلى الفرن حنكون مسخنينه على حراره حوالي من 220 ل 240 حسب فرنك وعلى الرف السلك اللي وسط الفرن وتحطي الصواني وحتسيبيهم من تلت لنص ساعه حسب فرنك اذا كان حامي او لأ وحتعرفي انها استوت لما تلاقي وشها بدأ يصفر مش يحمر لان لو احمر معناه ان قعر القرقوشه بقى فحمه فأول ما تلاقيها اصفرت من فوق امسكي واحده واقلبيها حتلاقي قعرها استوي واضغطي عليها حتلاقيها مسكت نفسها ومش طريه يبقى تطفي على طول وتسيبيها في الفرن
وهنا بعد ما استوت وخدي بالك القعر بقى مستوى ازاي

وهنا القرقوشه من جوا ما شاء الله هشه وجميييييييييله اما عن الطعم بقى فرااااااااائع

والف هنا وشفا ومعلش طولت عليكم بس انا كده بحب اشرح بالتفصيييييييييل الممل علشان ساعات اقل غلطه بتبوظ كل حاجه